ಸೇನಾ ವಕ್ತಾರ ಸ್ಥಾನದಿಂದ ಆಸಿಫ್​ ಗಫೂರ್​ರನ್ನು ಕೆಳಗಿಳಿಸಿ ಬಾಬರ್​ ಇಫ್ತಿಖರ್ ನೇಮಿಸಿದ ಪಾಕ್​ ಸೇನೆ

ಇಸ್ಲಮಾಬಾದ್​: ಪಾಕಿಸ್ತಾನ ಸೇನಾ ವಕ್ತಾರರಾಗಿದ್ದ ಮೇಜರ್ ಜನರಲ್​ ಆಸಿಫ್​ ಗಫೂರ್​ ಸ್ಥಾನಕ್ಕೆ ಮೇಜರ್​ ಜನರಲ್​ ಬಾಬರ್​ ಇಫ್ತಿಖರ್​​ ಅವರನ್ನು ನೇಮಿಸಲಾಗಿದೆ.

ಗಫೂರ್​ ಅವಧಿ ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಸ್ಥಾನ ಬದಲಾವಣೆ ಮಾಡಲಾಗಿದೆ. ಗಫೂರ್ ಅವರನ್ನು ಸೇನಾ ವಕ್ತಾರ ಸ್ಥಾನದಿಂದ ಕೆಳಗಿಳಿಸಿ ಪಾಕಿಸ್ತಾನ ಪಂಜಾಬ್ ಪ್ರಾಂತ್ಯದ ಒಕಾರಾದಲ್ಲಿರುವ​ ಪಾಕ್​ ಸೇನೆಯ 40ನೇ ಕಾಲಾಳು ಪಡೆಯ ಕಮಾಂಡರ್​ ಆಗಿ ನೇಮಿಸಲಾಗಿದೆ.

ಅಂತರ ಸೇವೆಯ ಸಾರ್ವಜನಿಕ ಸಂಬಂಧ ವಿಭಾದ ಮುಖ್ಯಸ್ಥರಾಗಿದ್ದ ಮೇಜರ್​ ಜನರಲ್​ ಬಾಬರ್​ ಇಫ್ತಿಖರ್​ರನ್ನು ಸೇನಾ ವಕ್ತಾರ ಸ್ಥಾನಕ್ಕೆ ಆಯ್ಕೆ ಮಾಡಲಾಗಿದೆ.

ಐಎಸ್​ಪಿಆರ್​ ವೆಬ್​ಸೈಟ್​ ಪ್ರಕಾರ ಮೇಜರ್​ ಜನರಲ್​ ಗಫೂರ್​ 1988ರಿಂದ ಪಾಕ್​ ಸೇನೆಯಲ್ಲಿ ಸೇವೆ ಆರಂಭಿಸಿದರು. ಮಾಸ್ಟರ್ ಡಿಗ್ರಿ ಪಡೆದಿರುವ ಗಫೂರ್​ ಅವರನ್ನು 2016 ಡಿಸೆಂಬರ್​ನಲ್ಲಿ ಐಎಸ್​ಪಿಆರ್​ ಡೈರೆಕ್ಟರ್​ ಜನರಲ್​ ಆಗಿ ನೇಮಿಸಲಾಯಿತು.

ಪಾಕ್​ ಸೇನಾ ವಕ್ತಾರರಾಗಿ ಆಯ್ಕೆಯಾದ ಬಳಿಕ ಗಫೂರ್ ಸಾಕಷ್ಟು ಪ್ರಮಾದಗಳನ್ನು ಎಸಗಿರುವ ಇತಿಹಾಸವಿದೆ. ಅದರಲ್ಲೂ ಭಾರತ ಬಗ್ಗೆ ಮಾತನಾಡುವಾಗ ಸಾಕಷ್ಟು ಎಡವಟ್ಟುಗಳನ್ನು ಗಫೂರ್​ ಮಾಡಿಕೊಂಡಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ತಪ್ಪು ಮಾಹಿತಿಯನ್ನು ಅನೇಕ ಬಾರಿ ಶೇರ್​ ಮಾಡಿಕೊಂಡು ನಗೆಪಾಟಿಲಿಗೆ ಗುರಿಯಾಗಿದ್ದಾರೆ.

ಒಮ್ಮೆ ಪಾಕಿಸ್ತಾನ ಯುವಕರನ್ನು ಹೊಗಳಲು ಹೋಗಿ ಗಫೂರ್​ ಟ್ರೋಲ್​ ಆಗಿದ್ದರು. ತಮ್ಮ ಟ್ವಿಟರ್​ನಲ್ಲಿ "ಪಾಕಿಸ್ತಾನ ಯುವಕರು ತಮ್ಮ ತಾಯಿನೆಲದ ಬಗೆಗಿರುವ ಜವಾಬ್ದಾರಿಯನ್ನು ಚೆನ್ನಾಗಿ ಅರಿತಿದ್ದಾರೆ. ದೇಶಪ್ರೇಮವನ್ನು ಕೊಂಡುಕೊಳ್ಳಲಾಗುವುದಿಲ್ಲ. ಅದು ಅನುವಂಶೀಯವಾಗಿರುತ್ತದೆ ಎಂದು ಬರೆದುಕೊಂಡಿದ್ದರು. ಅದರಲ್ಲೂ ಇಂಗ್ಲಿಷ್​ನಲ್ಲಿ "Genes" ಎಂದು ಬರೆಯಲು "Jeans" ಎಂದು ಬರೆದು ಟ್ರೋಲ್​ಗೆ ಗುರಿಯಾಗಿದ್ದರು. (ಏಜೆನ್ಸೀಸ್​)