ಯೂನಿವರ್ಸಿಟಿಗಳಲ್ಲಿ ಹೋಳಿ ಆಚರಣೆ ಬ್ಯಾನ್​ ಮಾಡಿದ ಪಾಕಿಸ್ತಾನ: ಕಾರಣ ಹೀಗಿದೆ…

ಇಸ್ಲಮಾಬಾದ್​: ಪಾಕಿಸ್ತಾನದ ಉನ್ನತ ಶಿಕ್ಷಣ ಆಯೋಗ (ಎಚ್​ಇಸಿ)ವು ಯೂನಿವರ್ಸಿಟಿಗಳಲ್ಲಿ ಹೋಳಿ ಆಚರಣೆಯನ್ನು ಬ್ಯಾನ್​ ಮಾಡಿ ಸುತ್ತೋಲೆ ಹೊರಡಿಸಿದೆ.

ಜೂನ್​ 12ರಂದು ಕ್ವೈಡ್​-ಐ-ಅಜಮ್ ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳು ಹೋಳಿಯನ್ನು ಆಚರಿಸಿದ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆದ ಬೆನ್ನಲ್ಲೇ ಎಚ್​ಇಸಿ ಸುತ್ತೋಲೆಯನ್ನು ಹೊರಡಿಸಿದೆ. ಸಾಮಾಜಿಕ ಸಾಂಸ್ಕೃತಿಕ ಮೌಲ್ಯಗಳನ್ನು ಅನುಸರಿಸಲು ವಿದ್ಯಾರ್ಥಿಗಳು ಈ ಉತ್ಸವವನ್ನು ಆಚರಿಸುವುದನ್ನು ನಿಷೇಧಿಸಲಾಗಿದೆ ಎಂದು ಆಯೋಗವು ನೋಟಿಸ್‌ನಲ್ಲಿ ತಿಳಿಸಿದೆ.

ಇದನ್ನೂ ಓದಿ: 17 ಸಾವಿರ ಕೊಟ್ಟು ಫೇಶಿಯಲ್​ ಮಾಡಿಸಿಕೊಂಡವಳ ಮುಖ ವಿಕಾರ: ಡಾಕ್ಟರ್​ ಹೇಳಿದ್ದನ್ನು ಕೇಳಿ ಸಂತ್ರಸ್ತೆಗೆ ಶಾಕ್​

ಇಸ್ಲಾಮಿಕ್ ಗುರುತು ಮಾಸುತ್ತದೆ

ಹೋಳಿಯಂತಹ ಚಟುವಟಿಕೆಗಳು ದೇಶದ ಸಾಮಾಜಿಕ-ಸಾಂಸ್ಕೃತಿಕ ಮೌಲ್ಯಗಳಿಂದ ಜನರ ಸಂಪರ್ಕವನ್ನು ಕಡಿತಗೊಳಿಸುತ್ತದೆ ಮತ್ತು ದೇಶದ ಇಸ್ಲಾಮಿಕ್ ಗುರುತು ಮಾಸುತ್ತದೆ ಎಂದು ಎಚ್​ಇಸಿ ಹೇಳಿದೆ. ಅಲ್ಲದೆ, ವಿದ್ಯಾರ್ಥಿಗಳು ಮತ್ತು ಅಧ್ಯಾಪಕರು ಶೈಕ್ಷಣಿಕ ಅನ್ವೇಷಣೆಗಳು, ಬೌದ್ಧಿಕ ಚರ್ಚೆಗಳು ಮತ್ತು ಅರಿವಿನ ಕಲಿಕೆಯ ಜೊತೆಗೆ ಪಠ್ಯೇತರ ಚಟುವಟಿಕೆಗಳು ಮತ್ತು ತರ್ಕಬದ್ಧ ಪ್ರವಚನದಲ್ಲಿ ತೊಡಗಿಸಿಕೊಳ್ಳಲು ಸೂಚಿಸಿದೆ.

ಈ ತಿಂಗಳ ಆರಂಭದಲ್ಲಿ ಇಸ್ಲಾಮಾಬಾದ್‌ನ ಕ್ವೈಡ್-ಐ-ಅಜಮ್ ವಿಶ್ವವಿದ್ಯಾಲಯದಲ್ಲಿ ಹೋಳಿ ಆಚರಣೆಯ ವಿಡಿಯೋಗಳು ವೈರಲ್ ಆಗಿದ್ದವು. ವಿಡಿಯೋಗಳಲ್ಲಿ, ವಿದ್ಯಾರ್ಥಿಗಳು ಬಣ್ಣಗಳಿಂದ ಹೋಳಿ ಆಡುವುದನ್ನು ಮತ್ತು ಕಾಲೇಜು ಆವರಣದಲ್ಲಿ ಸಂಭ್ರಮಾಚರಣೆಯನ್ನು ಆನಂದಿಸುತ್ತಿರುವುದನ್ನು ಕಾಣಬಹುದು. ವಿಶ್ವವಿದ್ಯಾನಿಲಯದ ರಾಜಕೀಯೇತರ ಸಾಂಸ್ಕೃತಿಕ ಸಂಘಟನೆಯಾದ ಮೆಹ್ರಾನ್ ವಿದ್ಯಾರ್ಥಿಗಳ ಮಂಡಳಿಯು ಈ ಕಾರ್ಯಕ್ರಮವನ್ನು ಆಯೋಜಿಸಿತ್ತು ಎಂದು ವರದಿಗಳು ತಿಳಿಸಿವೆ. (ಏಜೆನ್ಸೀಸ್​)

https://www.vijayavani.net/congress-ex-mla-bheema-naik-elected-as-a-kmf-president

https://www.vijayavani.net/elon-musk-said-that-after-meeting-pm-modi-tesla-coming-to-india-as-soon-as