ಬ್ರಹ್ಮಾಂಡದ ರಹಸ್ಯ ಬಯಲು: ಅತ್ಯಂತ ದೂರದ ಗ್ಯಾಲಕ್ಸಿಯಲ್ಲಿ ಆಕ್ಸಿಜನ್​ ಪತ್ತೆ, ಭೂಮಿಯಂತೆ ಜೀವನ ಸಾಧ್ಯವೇ? Oxygen Galaxy

Oxygen Galaxy : ಈ ಬ್ರಹ್ಮಾಂಡ ಅಂದರೆ ಯೂನಿವರ್ಸ್​ನಲ್ಲಿ ಅನೇಕ ಗ್ಯಾಲಕ್ಸಿಗಳಿವೆ. ಗ್ಯಾಲಕ್ಷಿ ಅಂದರೆ ನಕ್ಷತ್ರಪುಂಜಗಳಾಗಿದ್ದು, ಅನೇಕ ನಕ್ಷತ್ರಗಳ ಸಂಗ್ರಹವಾಗಿದೆ. ನಾವಿರುವುದು ಮಿಲ್ಕಿವೇ ಗ್ಯಾಲಕ್ಸಿಯಲ್ಲಿ. ಇಂತಹ ಲೆಕ್ಕವಿಲ್ಲದಷ್ಟು ಗ್ಯಾಲಕ್ಸಿಗಳು ನಮ್ಮ ಬ್ರಹ್ಮಾಂಡದಲ್ಲಿದೆ. ಅಂತಹ ಗ್ಯಾಲಕ್ಸಿಗಳಲ್ಲಿ ದೂರದ ಗ್ಯಾಲಕ್ಸಿ ಒಂದು ಆಮ್ಲಜನಕ ಹೊಂದಿದೆ ಎಂದು ವಿಜ್ಞಾನಿಗಳು ಇದೀಗ ತೀರ್ಮಾನಿಸಿದ್ದಾರೆ. ವಾಸ್ತವವಾಗಿ, ಆಮ್ಲಜನಕವು ನಮ್ಮ ಭೂಮಿಯಲ್ಲಿ ಮಾತ್ರ ಕಂಡುಬರುತ್ತದೆ ಎಂದು ಇದುವರೆಗೂ ನಾವು ನಂಬುತ್ತಿದ್ದೆವು.

ಈಗ, ವಿಜ್ಞಾನಿಗಳು ನಮ್ಮ ಗ್ಯಾಲಕ್ಷಿಯಲ್ಲಿ ಮಾತ್ರವಲ್ಲದೆ, ಬಹಳ ದೂರದಲ್ಲಿರುವ ಗ್ಯಾಲಕ್ಷಿಯಲ್ಲೂ ಆಮ್ಲಜನಕದ ಕುರುಹುಗಳಿವೆ ಎಂಬುದನ್ನು ಕಂಡುಹಿಡಿದಿದ್ದಾರೆ. ಈ ಗ್ಯಾಲಕ್ಸಿಯು ಭೂಮಿಯಿಂದ 13.4 ಬಿಲಿಯನ್ (1.340 ಕೋಟಿ) ಜ್ಯೋತಿರ್​ವರ್ಷ (ಲೈಟ್​ ಇಯರ್ಸ್​)ದ ದೂರದಲ್ಲಿದೆ. ಈ ಗ್ಯಾಲಕ್ಸಿಯನ್ನು JADES-GS-z14-0 ಎಂದು ಕರೆಯಲಾಗಿದೆ. ಖಗೋಳಶಾಸ್ತ್ರಜ್ಞರು ಈ ಗ್ಯಾಲಕ್ಸಿಯಲ್ಲಿ ಆಮ್ಲಜನಕ ಮತ್ತು ಇತರ ಭಾರವಾದ ಅಂಶಗಳನ್ನು ಕಂಡುಕೊಂಡಿದ್ದಾರೆ. ನಾಸಾದ ಜೇಮ್ಸ್ ವೆಬ್ ಬಾಹ್ಯಾಕಾಶ ದೂರದರ್ಶಕ (JWST) ಈ ಗ್ಯಾಲಕ್ಸಿಯಲ್ಲಿ ಆಮ್ಲಜನಕದ ಉಪಸ್ಥಿತಿಯನ್ನು ಪತ್ತೆ ಮಾಡಿದೆ.

ಬ್ರಹ್ಮಾಂಡದಲ್ಲಿ ಗ್ಯಾಲಕ್ಸಿಗಳು ಈ ಹಿಂದೆ ನಂಬಿದ್ದಕ್ಕಿಂತ ಹೆಚ್ಚು ವೇಗವಾಗಿ ರೂಪುಗೊಂಡಿವೆ ಎಂದು ಹೇಳಲಾಗುತ್ತದೆ. ಚಿಲಿಯ ಮರುಭೂಮಿಯಲ್ಲಿರುವ ರೇಡಿಯೋ ದೂರದರ್ಶಕಗಳ ಬೃಹತ್ ಜಾಲವಾದ ಅಟಕಾಮಾ ಲಾರ್ಜ್ ಮಿಲಿಮೀಟರ್/ಸಬ್​ಮಿಲೀಮೀಟರ್ ಅರೇ (ALMA) ಸೇರಿದಂತೆ ಮುಂದುವರಿದ ಬಾಹ್ಯಾಕಾಶ ದೂರದರ್ಶಕಗಳನ್ನು ಬಳಸಿಕೊಂಡು ಎರಡು ಸಂಶೋಧನಾ ತಂಡಗಳು ಈ ಆವಿಷ್ಕಾರವನ್ನು ಸ್ವತಂತ್ರವಾಗಿ ಮಾಡಿತು. ಈ ಗ್ಯಾಲಕ್ಸಿಯನ್ನು ಗಮನಿಸಿದ ವಿಜ್ಞಾನಿಗಳು, ಬ್ರಹ್ಮಾಂಡವು ಕೇವಲ 300 ಮಿಲಿಯನ್ ವರ್ಷಗಳಷ್ಟು ಹಳೆಯದಾಗಿದ್ದಾಗ ಈ ಗ್ಯಾಲಕ್ಸಿ ಅಸ್ತಿತ್ವದಲ್ಲಿತ್ತು ಎಂದು ಹೇಳಿದ್ದಾರೆ.

ಇದನ್ನೂ ಓದಿ: ಗಾಳಿಯಿಂದ ನೀರು ತಯಾರಿಸುತ್ತಿದೆ ಭಾರತದ ಈ ಕಂಪನಿ! ಅದು ಹೇಗೆ ಸಾಧ್ಯ? ಇಲ್ಲಿದೆ ಅಚ್ಚರಿ ಮಾಹಿತಿ… Water From Air

ಈ ಗ್ಯಾಲಕ್ಸಿಯನ್ನು ಕಂಡು ವಿಜ್ಞಾನಿಗಳು ಕೂಡ ಆಶ್ಚರ್ಯಚಕಿತರಾಗಿದ್ದಾರೆ. ಲೈಡೆನ್ ವೀಕ್ಷಣಾಲಯದ ಖಗೋಳಶಾಸ್ತ್ರಜ್ಞ ಸ್ಯಾಂಡರ್ ಸ್ಕೌಸ್ ಈ ಆವಿಷ್ಕಾರವನ್ನು "ನವಜಾತ ಶಿಶು" ಎಂದು ಬಣ್ಣಿಸಿದ್ದಾರೆ. ಈ ಗ್ಯಾಲಕ್ಸಿ ಬಹಳ ವೇಗವಾಗಿ ವಿಕಸನಗೊಳ್ಳುತ್ತಿದೆ. ವಿಶ್ವದಲ್ಲಿ ಗ್ಯಾಲಕ್ಸಿಗಳ ರಚನೆಯು ನಾವು ಭಾವಿಸಿದ್ದಕ್ಕಿಂತ ಹೆಚ್ಚು ವೇಗವಾಗಿ ಸಂಭವಿಸುತ್ತದೆ ಎಂದು ಹೇಳಿದರು. ಇಟಾಲಿಯನ್ ಖಗೋಳ ಭೌತಶಾಸ್ತ್ರಜ್ಞ ಸ್ಟೆಫಾನೊ ಕಾರ್ನಿಯಾನಿ ಈ ಆವಿಷ್ಕಾರವನ್ನು "ಒಂದು ಪವಾಡ" ಎಂದು ಬಣ್ಣಿಸಿದ್ದಾರೆ.

ಎಷ್ಟು ಆಮ್ಲಜನಕ ಇದೆ?

ವಾಸ್ತವವಾಗಿ, ಈ ಗ್ಯಾಲಕ್ಸಿಯನ್ನು 2024ರಲ್ಲಿ ಕಂಡುಹಿಡಿಯಲಾಯಿತು. ಆದರೆ, ಈಗ ಈ ಜೇಮ್ಸ್ ವೆಬ್ ಬಾಹ್ಯಾಕಾಶ ದೂರದರ್ಶಕವು ಈ ಗ್ಯಾಲಕ್ಸಿಯನ್ನು ಬೆಳಕಿಗೆ ತಂದಿದೆ. ಆದಾಗ್ಯೂ, ಗ್ಯಾಲಕ್ಸಿಯಲ್ಲಿ ಆಮ್ಲಜನಕ ಯಾವ ರೂಪಗಳಲ್ಲಿ ಇದೆ? ಅದು ಎಷ್ಟಿದೆ ಎಂದು ಕಂಡುಹಿಡಿಯಲು ವಿಜ್ಞಾನಿಗಳು ಕೆಲಸ ಮಾಡುತ್ತಿದ್ದಾರೆ. ಇತ್ತೀಚಿನ ಅಧ್ಯಯನವೊಂದರಲ್ಲಿ, ಡಚ್ ಮತ್ತು ಇಟಾಲಿಯನ್ ಖಗೋಳಶಾಸ್ತ್ರಜ್ಞರು ALMA ರೇಡಿಯೋ ದೂರದರ್ಶಕವನ್ನು ಬಳಸಿಕೊಂಡು JADES-GS-z14-0 ಗ್ಯಾಲಕ್ಸಿಯನ್ನು ಅಧ್ಯಯನ ಮಾಡಿದರು. ಜೇಮ್ಸ್ ವೆಬ್ ದೂರದರ್ಶಕವನ್ನು ಬಳಸಿಕೊಂಡು ನಮ್ಮ ಭೂಮಿಯ ಬಳಿ ಇಲ್ಲಿಯವರೆಗೆ 700ಕ್ಕೂ ಹೆಚ್ಚು ಗ್ಯಾಲಕ್ಸಿಗಳನ್ನು ಪತ್ತೆಹಚ್ಚಲಾಗಿದೆ.

ಯುರೋಪಿಯನ್ ಸದರ್ನ್ ಅಬ್ಸರ್ವೇಟರಿ (ESO) ಪ್ರಕಾರ, ಜೇಮ್ಸ್​ ವೆಬ್​ ಈ ಗ್ಯಾಲಕ್ಸಿಯಲ್ಲಿ ಆಮ್ಲಜನಕದ ಚಿಹ್ನೆಗಳನ್ನು ಕಂಡುಹಿಡಿದಿದೆ. ಕಾಸ್ಮಿಕ್ ಡಾನ್ ಎಂದು ಕರೆಯಲ್ಪಡುವ ಬ್ರಹ್ಮಾಂಡದ ಈ ಯುಗದಲ್ಲಿ, ಹೊಸ ಗ್ಯಾಲಕ್ಸಿಗಳು ಮುಖ್ಯವಾಗಿ ಹೈಡ್ರೋಜನ್ ಮತ್ತು ಹೀಲಿಯಂನಂತಹ ಬೆಳಕಿನ ಅಂಶಗಳನ್ನು ಒಳಗೊಂಡಿರಬೇಕು. ಆದರೆ, ಈ ಗ್ಯಾಲಕ್ಸಿ ನಿರೀಕ್ಷೆಗಿಂತ 10 ಪಟ್ಟು ಹೆಚ್ಚು ಭಾರವಾದ ಅಂಶಗಳನ್ನು ಹೊಂದಿದೆ ಎಂದು ವಿಜ್ಞಾನಿಗಳು ಹೇಳುತ್ತಾರೆ. ಆಮ್ಲಜನಕ ಇದ್ದರೂ ಅಲ್ಲಿ ಜೀವ ಅಸ್ತಿತ್ವದಲ್ಲಿರಬಹುದೇ ಎಂಬ ಪ್ರಶ್ನೆಯನ್ನು ಇದು ಹುಟ್ಟುಹಾಕುತ್ತದೆ. ಆಮ್ಲಜನಕವಿದ್ದರೆ, ಜೀವವೂ ಉದ್ಭವಿಸುವ ಸಾಧ್ಯತೆಯಿದೆ. (ಏಜೆನ್ಸೀಸ್​)

https://www.vijayavani.net/water-from-air-an-indian-company-is-making-water-from-air-how-is-it-possible

https://www.vijayavani.net/alien-or-mermaid-couple-shocked-by-strange-figure-on-the-beach-pictures-leaked