ಹಲವಾರು ಯಜ್ಞಗಳ ಪೈಕಿ, ಪಿತೃಯಜ್ಞ (ನಮ್ಮ ಪಿತೃಗಳಿಗೆ ಕೃತಜ್ಞತಾಪೂರ್ವಕವಾಗಿ ಸಲ್ಲಿಸುವ ಸೇವೆಗಳು), ದೈವಯಜ್ಞ (ಭಗವಂತನಿಗೆ ಸಲ್ಲಿಸುವ ಪೂಜೆ-ಆರಾಧನೆಗಳು) ಪ್ರಮುಖವಾದವುಗಳೆಂದು ಪರಿಗಣಿಸಲ್ಪಟ್ಟಿವೆ. ಆದರೆ ಮೂಲಭೂತ ಅವಶ್ಯಕತೆಗಳಿಂದ ವಂಚಿತರಾದ ಮಾನವರ ಹಾಗೂ ಇತರ ಜೀವಿಗಳ ಅವಶ್ಯಕತೆಗಳನ್ನು ಪೂರೈಸಿ, ಅವರ ದುಃಖವನ್ನು ನೀಗುವ ‘ಭೂತ ಯಜ್ಞ’ವೇ, ಸರ್ವಶ್ರೇಷ್ಠ ಯಜ್ಞವಾಗಿದೆ. ಏಕೆಂದರೆ ಈ ಯಜ್ಞದಲ್ಲಿ, ಹಸಿದವರಿಗೆ ಅನ್ನ, ಬಾಯಾರಿದವರಿಗೆ ನೀರು ಮತ್ತು ವಸ್ತ್ರಹೀನರಿಗೆ ವಸ್ತ್ರಗಳನ್ನು ನೀಡುವುದು, ಸೂರಿಲ್ಲದವರಿಗೆ ಆಶ್ರಯ ಒದಗಿಸುವುದು, ಆರೋಗ್ಯವಿಲ್ಲದವರಿಗೆ ಔಷಧ ಉಪಚಾರ, ಶಿಕ್ಷಣಾವಕಾಶಗಳಿಲ್ಲದವರಿಗೆ ಶಿಕ್ಷಣ ಒದಗಿಸುವುದು ಅಥವಾ ದುಃಖದಲ್ಲಿರುವವರಿಗೆ ಸಾಂತ್ವನ ಹೇಳುವುದು ಇವೆಲ್ಲವನ್ನೂ ನಮ್ಮ ಜೀವನಯಜ್ಞದಲ್ಲಿ ಆಹುತಿಗಳೆಂದು ಪರಿಗಣಿಸಬಹುದು. ಇಂಥ ಸೇವೆ ಮೂಲಕ ನಮ್ಮ ಜೀವನವನ್ನೇ ಯಜ್ಞವನ್ನಾಗಿ ಪರಿವರ್ತಿಸಬಹುದು.
