ಕರೊನಾ ಹಾವಳಿ ವಿರುದ್ಧ ಸಂಘಟಿತ ಹೋರಾಟ ಅಗತ್ಯವೆಂದು ಅರಿತ ಭಾರತ ಈ ನಿಟ್ಟಿನಲ್ಲಿ ಮಹತ್ವದ ಪಾತ್ರ ವಹಿಸಿದೆ. ಭಾನುವಾರ ಸಂಜೆ ಪ್ರಧಾನಿ ನರೇಂದ್ರ ಮೋದಿ ದಕ್ಷಿಣ ಏಷ್ಯಾ ಪ್ರಾದೇಶಿಕ ಸಹಕಾರ ಸಂಘಟನೆಯ (ಸಾರ್ಕ್) ಎಲ್ಲ ನಾಯಕರ ಜತೆ ವಿಡಿಯೋ ಕಾನ್ಪರೆನ್ಸ್ ಮೂಲಕ ಸಂವಾದ ನಡೆಸಿದ್ದು, ಜಂಟಿ ಕಾರ್ಯತಂತ್ರ ರೂಪಿಸಲಾಗಿದೆ. ಮುಖ್ಯವಾಗಿ, ಪರಿಸ್ಥಿತಿಯನ್ನು ನಿಭಾಯಿಸಲು ಮತ್ತು ಆರೋಗ್ಯ ಸೌಲಭ್ಯಗಳ ಕೊರತೆ ಆಗದಂತೆ ನೋಡಿಕೊಳ್ಳಲು ‘ತುರ್ತ ನಿಧಿ’ ಸ್ಥಾಪಿಸಲು ನಿರ್ಧರಿಸಲಾಗಿದ್ದು, ಇದಕ್ಕೆ ಭಾರತ -ಠಿ; 73.95 ಕೋಟಿ ದೇಣಿಗೆ ನೀಡಲಿದೆ. ಕರೊನಾಕ್ಕೆ ಸಂಬಂಧಿಸಿದ ಬೆಳವಣಿಗೆಗಳಿಂದ ಹಲವು ರಾಷ್ಟ್ರಗಳು ಭಯಭೀತಗೊಂಡಿದ್ದು, ಇಂಥ ಸಂದಿಗ್ಧ ಹೊತ್ತಲ್ಲಿ ಮುಂದಾಳತ್ವ ವಹಿಸಿಕೊಂಡಿರುವ ಪ್ರಧಾನಿ ಮೋದಿ ‘ಸೋಂಕನ್ನು ಎದುರಿಸಲು ತಯಾರಾಗಿ, ಭಯ ಪಡಬೇಡಿ’ ಎಂಬ ಸ್ಥೈರ್ಯವನ್ನು ತುಂಬಿರುವುದು ವಿಶೇಷ. ಏನೇ ಆಪತ್ತುಗಳು ಸಂಭವಿಸಲಿ, ನೈಸರ್ಗಿಕ ವಿಕೋಪಗಳಾಗಲಿ ನೆರವಿಗೆ, ಪರಿಹಾರಕ್ಕೆ ಭಾರತ ಮೊದಲು ಮುಂದಾಗುವುದಲ್ಲದೆ, ಆ ಕೆಲಸಗಳು ಪರಿಣಾಮಕಾರಿಯಾಗಿ ನಡೆಯುವಂತೆ ಮಾರ್ಗದರ್ಶನವನ್ನೂ ಮಾಡುತ್ತದೆ. ಕೆಲ ವರ್ಷಗಳ ಹಿಂದಷ್ಟೇ ನೇಪಾಳ ಭೀಕರ ಭೂಕಂಪಕ್ಕೆ ನಲುಗಿದಾಗ ಮೊದಲು ನೆರವಿಗೆ ಧಾವಿಸಿದ್ದು ಭಾರತವೇ. ಯುದ್ಧಪೀಡಿತ ಅಫ್ಘಾನಿಸ್ತಾನದಲ್ಲಿ ಕೈಗೊಂಡಿರುವ ಪುನರ್ ನಿರ್ವಣದ ಕಾಮಗಾರಿಗಳು ಕೂಡ ಗಮನಾರ್ಹ. ಸಂಕಷ್ಟಗಳು ಒಂದಿಲ್ಲ ಒಂದು ರೂಪದಲ್ಲಿ ಬರುತ್ತವೆ. ಆ ಹೊತ್ತಲ್ಲಿ ಆತ್ಮಸ್ಥೈರ್ಯ, ಹೋರಾಟದ ಮನೋಬಲ ಕಳೆದುಕೊಳ್ಳದೆ ಪರಿಹಾರದ ಮಾರ್ಗದಲ್ಲಿ ದೃಢ ಹೆಜ್ಜೆ ಇಡುವುದು ಭಾರತೀಯರಿಗೆ ಸ್ವಭಾವತಃ ಕರಗತವಾಗಿಬಿಟ್ಟಿದೆ. ಹಾಗಾಗಿಯೇ, ಕರೊನಾ ಹೊತ್ತಲ್ಲೂ ಅದೇ ಕಳಕಳಿ ತೋರಲಾಗಿದೆ. ಸರ್ಕಾರದ ಕೆಲ ಕ್ರಮಗಳಿಂದ ಜನಸಾಮಾನ್ಯರ ದೈನಂದಿನ ಜೀವನಕ್ಕೆ ಹಲವು ಅನಾನುಕೂಲಗಳಾಗಿದ್ದರೂ; ಇಂದಿನ ಸ್ಥಿತಿಯಲ್ಲಿ ಅದು ಅನಿವಾರ್ಯ ಕ್ರಮ ಎಂಬುದನ್ನು ಒಪ್ಪಿಕೊಂಡು ಸಾಮಾನ್ಯ ಜನರು ಕೂಡ ಸಹಕಾರ ನೀಡಿದ್ದಾರೆ. ಮೋದಿಯವರ ಮಾತಿಗೆ ಸಾರ್ಕ್ ರಾಷ್ಟ್ರಗಳು ಸಹಮತ ವ್ಯಕ್ತಪಡಿಸಿದ್ದು, ಸೀಮಿತ ಸಂಪನ್ಮೂಲಗಳನ್ನು ಹಂಚಿಕೊಳ್ಳಲು ಮತ್ತು ಕರೊನಾ ಪರಿಸ್ಥಿತಿಯನ್ನು ಒಟ್ಟಾಗಿ ಎದುರಿಸುವ ಬದ್ಧತೆ ವ್ಯಕ್ತಪಡಿಸಿವೆ.
