ಅಧಿವೇಶನಕ್ಕೆ ಮುನ್ನವೇ ಸಭೆ: ಪರಸ್ಪರ ಸಹಕಾರ, ಸಮನ್ವಯದ ದೃಷ್ಟಿಯಿಂದ ಈ ಬಾರಿ ಅಧಿವೇಶನಕ್ಕೆ ಮುನ್ನವೇ ಶಾಸಕಾಂಗ ಪಕ್ಷದ ಸಭೆ ನಡೆಸಲು ಯೋಚಿಸಲಾಗಿದೆ ಎಂದು ಹಿರಿಯ ನಾಯಕರೊಬ್ಬರು ತಿಳಿಸಿದ್ದಾರೆ. ಮಾಜಿ ಸಿಎಂ ಬಸವರಾಜ ಬೊಮ್ಮಾಯಿ, ವಿಧಾನ ಪರಿಷತ್ ಪ್ರತಿಪಕ್ಷ ನಾಯಕರಾಗಿದ್ದ ಕೋಟ ಶ್ರೀನಿವಾಸ ಪೂಜಾರಿಯವರು ಲೋಕಸಭೆ ಪ್ರವೇಶಿಸಿಯಾಗಿದೆ. ಅನುಭವಿಗಳಿಬ್ಬರ ‘ಕೊರತೆ’ ತುಂಬಿಕೊಳ್ಳುವುದು ಅಷ್ಟೇ ಮುಖ್ಯವಾಗಿದೆ. ಆಡಳಿತ, ತಾಂತ್ರಿಕವಾಗಿ ವಿಷಯಗಳನ್ನು ಪ್ರಸ್ತುತಪಡಿಸುವಲ್ಲಿ ಇಬ್ಬರದೂ ಎತ್ತಿದ ಕೈಯಾಗಿತ್ತು. ಕೋಟ ಮತ್ತು ಬೊಮ್ಮಾಯಿ ಅನುಪಸ್ಥಿತಿ ಕಾಡದಂತೆ ನೋಡಿಕೊಳ್ಳುವುದು ಉಳಿದ ಶಾಸಕರ ಜವಾಬ್ದಾರಿಯಾಗಿದೆ. ಮುಂಚಿತವಾಗಿ ಶಾಸಕಾಂಗ ಪಕ್ಷದ ಸಭೆ ನಡೆಸುವುದೇ ಸೂಕ್ತವೆಂಬ ಸಲಹೆ ನಾಯಕರು ಪರಿಗಣಿಸಿದ್ದಾರೆ. ಈ ನಡುವೆ ವಿಧಾನಸಭೆ ಪ್ರತಿಪಕ್ಷ ನಾಯಕ ಆರ್.ಅಶೋಕ್ ರಾಜ್ಯ ಪ್ರವಾಸ ಕೈಗೊಂಡು, ಆಯಾ ಜಿಲ್ಲೆ ವಸ್ತುಸ್ಥಿತಿ, ಸಮಸ್ಯೆಗಳು, ಪರಿಹಾರೋಪಾಯಗಳ ಮಾಹಿತಿ ಸಂಗ್ರಹಿಸಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
