IPL 2026: ಲಖನೌ ಸೋತರೂ ಅರ್ಜುನ್ ಗೆದ್ದರಾ? ಸಚಿನ್ ತೆಂಡೂಲ್ಕರ್‌ ಪೋಸ್ಟ್ ಹಿಂದಿನ ಅರ್ಥ ಏನು?

ಐಪಿಎಲ್‌ ಈ ಸೀಸನ್‌ನಲ್ಲಿ ಲಖನೌ ತಂಡದ ಕೊನೆಯ ಲೀಗ್ ಪಂದ್ಯದಲ್ಲೇ ಅರ್ಜುನ್‌ಗೆ ಅವಕಾಶ ಸಿಕ್ಕಿತು. ಹಲವಾರು ಪಂದ್ಯಗಳಲ್ಲಿ ಬೆಂಚ್‌ನಲ್ಲೇ ಕುಳಿತುಕೊಂಡಿದ್ದ ಯುವ ಎಡಗೈ ವೇಗಿ, ಅವಕಾಶ ಸಿಕ್ಕಾಗ ಶಾಂತವಾಗಿ ಹಾಗೂ ಆತ್ಮವಿಶ್ವಾಸದಿಂದ ಆಡಿದ ರೀತಿ ಗಮನ ಸೆಳೆಯಿತು. ಇದನ್ನೇ ಉಲ್ಲೇಖಿಸಿದ ಸಚಿನ್‌, “ಅರ್ಜುನ್‌, ಚೆನ್ನಾಗಿ ಆಡಿದ್ದೀಯ. ಈ ಸೀಸನ್‌ ಪೂರ್ತಿ ನೀನು ತೋರಿಸಿದ ಸಹನೆ, ನಿನ್ನ ಸಾಮರ್ಥ್ಯದ ಮೇಲಿನ ನಂಬಿಕೆ, ಮೌನವಾಗಿ ಮಾಡಿದ ಕಠಿಣ ಪರಿಶ್ರಮ ಮತ್ತು ಸಕಾರಾತ್ಮಕ ಮನೋಭಾವ ನನಗೆ ಹೆಮ್ಮೆ ತಂದಿದೆ” ಎಂದು ಬರೆದುಕೊಂಡಿದ್ದಾರೆ.

ಮುಂದುವರಿದು ಮಾತನಾಡಿದ ಸಚಿನ್‌, “ಕ್ರಿಕೆಟ್‌ ಕೌಶಲ್ಯದಷ್ಟೇ ಸಹನೆಯನ್ನು ಕೂಡ ಪರೀಕ್ಷಿಸುತ್ತದೆ. ಇಂದು ನೀನು ಎರಡನ್ನೂ ಚೆನ್ನಾಗಿ ನಿರ್ವಹಿಸಿದ್ದೀಯ. ಸದಾ ನೆಲದ ಮೇಲೆಯೇ ಕಾಲಿರಲಿ. ನೀನು ಯಾವಾಗಲೂ ಆಟವನ್ನು ಪ್ರೀತಿಸುವ ರೀತಿಯೇ ಮುಂದುವರಿಯಲಿ” ಎಂದು ಮಗನಿಗೆ ಸಲಹೆ ನೀಡಿದ್ದಾರೆ. ಈ ಸಂದೇಶ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಅಭಿಮಾನಿಗಳು ಕೂಡ ಅರ್ಜುನ್‌ಗೆ ಶುಭಾಶಯ ಕೋರಿದ್ದಾರೆ.

ಪಂಜಾಬ್ ಕಿಂಗ್ಸ್ ವಿರುದ್ಧ ನಡೆದ ಈ ಪಂದ್ಯದಲ್ಲಿ ಅರ್ಜುನ್ ತೆಂಡೂಲ್ಕರ್ ನಾಲ್ಕು ಓವರ್‌ಗಳಲ್ಲಿ 36 ರನ್ ನೀಡಿ ಒಂದು ವಿಕೆಟ್ ಪಡೆದರು. ಅವರ ಐಪಿಎಲ್‌ ಆರಂಭ ಗಮನಾರ್ಹವಾಗಿತ್ತು. ವಿಶೇಷವಾಗಿ ಪಂಜಾಬ್ ತಂಡದ ಅಪಾಯಕಾರಿ ಬ್ಯಾಟರ್ Prabhsimran Singh ಅವರನ್ನು ಔಟ್ ಮಾಡಿದ್ದು ಗಮನ ಸೆಳೆಯಿತು. ಪ್ರಭ್‌ಸಿಮ್ರನ್ ಕೇವಲ 39 ಎಸೆತಗಳಲ್ಲಿ 69 ರನ್ ಸಿಡಿಸಿ ಏಳು ಬೌಂಡರಿ ಹಾಗೂ ಎರಡು ಸಿಕ್ಸರ್‌ಗಳ ನೆರವಿನಿಂದ ಲಖನೌ ಬೌಲರ್‌ಗಳಿಗೆ ತೊಂದರೆ ನೀಡುತ್ತಿದ್ದರು. ಅಂತಹ ಸಂದರ್ಭದಲ್ಲಿ ಅರ್ಜುನ್ ಮಹತ್ವದ ಬ್ರೇಕ್‌ಥ್ರೂ ತಂದರು.

ಆದರೆ ಪಂದ್ಯದಲ್ಲಿ ಲಖನೌ ಸೂಪರ್ ಜೈಂಟ್ಸ್‌ಗೆ ಸೋಲು ತಪ್ಪಲಿಲ್ಲ. ಮೊದಲು ಬ್ಯಾಟಿಂಗ್ ಮಾಡಿದ ಲಖನೌ ತಂಡ 20 ಓವರ್‌ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 196 ರನ್ ಗಳಿಸಿತು. ತಂಡದ ಪರ Josh Inglis 72 ರನ್‌ಗಳ ಆಕರ್ಷಕ ಇನಿಂಗ್ಸ್ ಆಡಿದರೆ, Abdul Samad ವೇಗದ ಕ್ಯಾಮಿಯೋ ಮೂಲಕ ತಂಡದ ಮೊತ್ತ ಹೆಚ್ಚಿಸಿದರು.

197 ರನ್ ಗುರಿ ಬೆನ್ನತ್ತಿದ ಪಂಜಾಬ್ ಕಿಂಗ್ಸ್ ಆರಂಭದಿಂದಲೇ ದಿಟ್ಟ ಆಟ ಪ್ರದರ್ಶಿಸಿತು. ನಾಯಕ Shreyas Iyer ಅಜೇಯ ಶತಕ ಸಿಡಿಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಐಯರ್ ಕೇವಲ 51 ಎಸೆತಗಳಲ್ಲಿ 101 ರನ್ ಗಳಿಸಿ ಐಪಿಎಲ್‌ನ ತಮ್ಮ ಮೊದಲ ಶತಕ ದಾಖಲಿಸಿದರು. ಇನ್ನೊಂದೆಡೆ ಪ್ರಭ್‌ಸಿಮ್ರನ್ ಸಿಂಗ್ ಕೂಡ ವೇಗದ ಅರ್ಧಶತಕದ ಮೂಲಕ ಉತ್ತಮ ಬೆಂಬಲ ನೀಡಿದರು. ಪರಿಣಾಮ ಪಂಜಾಬ್ ತಂಡ ಇನ್ನೂ ಒಂದು ಓವರ್ ಬಾಕಿ ಇರುವಾಗಲೇ 7 ವಿಕೆಟ್‌ಗಳ ಭರ್ಜರಿ ಜಯ ದಾಖಲಿಸಿತು.

ಈ ಗೆಲುವಿನಿಂದ ಪಂಜಾಬ್ ಕಿಂಗ್ಸ್ ಪ್ಲೇಆಫ್‌ ಆಸೆಯನ್ನು ಮತ್ತಷ್ಟು ಬಲಪಡಿಸಿಕೊಂಡಿದೆ. ಮತ್ತೊಂದೆಡೆ ಅರ್ಜುನ್ ತೆಂಡೂಲ್ಕರ್‌ಗೆ ಈ ಪಂದ್ಯ ಆತ್ಮವಿಶ್ವಾಸ ತುಂಬುವ ಆರಂಭವಾಗಿದ್ದು, ಮುಂದಿನ ಸೀಸನ್‌ಗಳಲ್ಲಿ ಹೆಚ್ಚು ಅವಕಾಶಗಳು ಸಿಗುವ ನಿರೀಕ್ಷೆ ಮೂಡಿಸಿದೆ,(ಏಜೆನ್ಸೀಸ್​).