ದೀಪಾವಳಿ ಹಬ್ಬದ ಮುಂಚೆಯಷ್ಟೇ ಪಾತಾಳಕ್ಕೆ ಕುಸಿದು ರೈತರಲ್ಲಿ ಕಣ್ಣೀರು ತರಿಸಿದ್ದ ಈರುಳ್ಳಿ ಬೆಲೆ, ಹಬ್ಬ ಮುಗಿಯುತ್ತಿದ್ದಂತೆ ದಿಢೀರ್ ಜಿಗಿದಿದೆ. ಕ್ವಿಂಟಾಲ್ಗೆ ಗರಿಷ್ಠ 5 ಸಾವಿರ ರೂ. ವರೆಗೂ ಬೆಲೆ ಸಿಕ್ಕಿದ್ದು ರೈತರ ಕಣ್ಣೀರು ಒರೆಸುವಂತಾಗಿದೆ. ಬಾಗಲಕೋಟೆ ಮಾರುಕಟ್ಟೆ ಸೇರಿ ರಾಜ್ಯ ರಾಜಧಾನಿಯಲ್ಲೂ ಒಳ್ಳೆಯ ಬೆಲೆ ಸಿಕ್ಕಿದೆೆ. ಬಾಗಲಕೋಟೆಯಲ್ಲಿ ಗರಿಷ್ಠ 5000 ರೂ. ಬೆಲೆ ಸಿಕ್ಕಿದ್ದರೆ ಬೆಂಗಳೂರಲ್ಲಿ 5200 ರೂ.ವರೆಗೂ ಮಾರಾಟವಾಗಿದೆ. ಕಳೆದ ತಿಂಗಳು ಭಾರಿ ಮಳೆಯಿಂದ ಜಿಲ್ಲೆಯಲ್ಲಿಯೇ 31 ಸಾವಿರ ಹೆಕ್ಟೇರ್ ಪೈಕಿ 10 ಸಾವಿರ ಹೆಕ್ಟೇರ್ ಬೆಳೆ ನಾಶವಾಗಿತ್ತು. ಜತೆಗೆ ಹಬ್ಬದ ವೇಳೆ ಖರೀದಿದಾರರು ಹಾಗೂ ಟ್ರಾನ್ಸ್ಪೋರ್ಟ್ ಸಮಸ್ಯೆಯೂ ಆಗಿತ್ತು. ಹಬ್ಬದ ಅಂಗವಾಗಿ ಬಾಗಲಕೋಟೆ ಎಪಿಎಂಸಿಯಲ್ಲಿ ಒಂದು ವಾರ ಈರುಳ್ಳಿ ಸವಾಲ್ ಬಂದ್ ಆಗಿತ್ತು. ಅಕ್ಟೋಬರ್ 31 ರಂದು ಬೆಂಗಳೂರಲ್ಲಿ ಕನಿಷ್ಠ 100 ರೂ.ಗಳಿಂದ ಗರಿಷ್ಠ 2000 ರೂ. ಮಾತ್ರ ಬೆಲೆ ಸಿಕ್ಕಿತ್ತು. ಅದರಲ್ಲೂ 3, 4ನೇ ದರ್ಜೆಯ ಈರುಳ್ಳಿ ಖರೀದಿ ಮಾಡುವವರು ಇಲ್ಲದೆ ರೈತರು ರಸ್ತೆಗೆ ಚೆಲ್ಲಿ ಬಂದಿದ್ದರು.
