ನನ್ನದು ಸಕ್ಸಸ್ ಸ್ಟೋರಿ ಎಂದು ಹೇಳುವುದಿಲ್ಲ, ಬದಲಾಗಿ ಕರಿಯರ್ ಸ್ಟೋರಿ ಅಂತ ಹೇಳಲು ಇಚ್ಛಿಸುತ್ತೇನೆ. ಮುಂದಿನ ದಿನಗಳಲ್ಲಿ ಸಕ್ಸಸ್ ಸ್ಟೋರಿ ಆಗುತ್ತೆ ಎಂಬ ಭರವಸೆ ಇದೆ. ಇದುವರೆಗೆ 60 ಚಿತ್ರಗಳಲ್ಲಿ ನಟಿಸಿದ್ದೇನೆ. ಎಲ್ಲ ಸಿನಿಮಾಗಳಲ್ಲೂ ಒಳ್ಳೆಯವನೆಂಬ ಇಮೇಜ್ ಇದೆ. 2010ರಿಂದ 2020ರವರೆಗೂ ನನ್ನ ಸಿನಿಮಾಗಳು ಜನರಿಗೆ ರೀಚ್ ಆಗದೇ ಒಂದು ಗ್ಯಾಪ್ ಸೃಷ್ಟಿಯಾಗಿತ್ತು. ಸೋಲಬೇಕು ಅಂತ ಯಾರೂ ಸಿನಿಮಾ ಮಾಡುವುದಿಲ್ಲ. ಆದರೂ ನಾನು ನಟಿಸಿರುವ ಶೇ. 60ರಷ್ಟು ಸಿನಿಮಾಗಳು ಸೋತವು. ನಾವು ಕೇಳಿದ ಕಥೆ ಕೆಲವೊಮ್ಮೆ ಅದೇ ರೀತಿ ತೆರೆಯ ಮೇಲೆ ಬರುವುದಿಲ್ಲ. ಅದಕ್ಕೆ ಬಜೆಟ್, ಪ್ರಚಾರದ ಕೊರತೆ ಮುಂತಾದ ಕಾರಣಗಳಿರುತ್ತವೆ. ಕೆಲವೊಮ್ಮೆ ಚೆನ್ನಾಗಿ ಪ್ರಚಾರ ಮಾಡಿದ್ದರೂ ರಿಲೀಸ್ನಲ್ಲಿ ಹೆಚ್ಚೂಕಮ್ಮಿ ಆಗಿರುತ್ತದೆ. ಅಂದುಕೊಂಡ ಸಮಯಕ್ಕೆ ಸರಿಯಾಗಿ ಶೂಟಿಂಗ್ ಆಗುವುದಿಲ್ಲ. ಚಿತ್ರೀಕರಣ ಮುಗಿದರೂ ರಿಲೀಸ್ ತಡವಾಗುತ್ತದೆ. ನಾನೇನೋ ಒಂದರ ಬಳಿಕ ಮತ್ತೊಂದು ಸಿನಿಮಾ ಮಾಡುತ್ತೇನೆ. ಆದರೆ, ಕೆಲ ಚಿತ್ರಗಳ ಬಿಡುಗಡೆ ತಡವಾಗಿ, ಒಂದೇ ವರ್ಷ ನಾಲ್ಕೈದು ಚಿತ್ರಗಳು ತೆರೆಕಾಣಲು ರೆಡಿಯಾಗಿಬಿಟ್ಟಿರುತ್ತವೆ. ಹಾಗಾಗಿ ಯಶಸ್ಸನ್ನು ನನ್ನದು ಅಂತ ಒಪ್ಪಿಕೊಳ್ಳುವಂತೆ, ಸೋಲನ್ನೂ ನನ್ನದು ಅಂತ ಒಪ್ಪಿಕೊಳ್ಳಬೇಕು. ಜನರು ಒಮ್ಮೆ ನನ್ನಿಂದ ಮುಖ ತಿರುಗಿಸಿಕೊಂಡುಬಿಟ್ಟರೆ, ತಿಪ್ಪರಲಾಗ ಹಾಕಿದರೂ ನನಗೆ ಅವಕಾಶಗಳು ಸಿಗುವುದಿಲ್ಲ. ಅವರ ಮನಸ್ಸಿನಲ್ಲಿ ನನಗೆ ಸ್ವಲ್ಪ ಜಾಗವಿದೆ. ‘ವಿಜಯ್ಗೆ ತುಂಬ ಪ್ರತಿಭೆ ಇದೆ, ಒಳ್ಳೆಯ ಪಾತ್ರ ಬರಬೇಕು’ ಅಂತಾರೆ. ಅದರಿಂದಲೇ ಅವಕಾಶಗಳು ಸಿಗುತ್ತಿವೆ. ‘ಸೀತಾರಾಮ್ ಬಿನೋಯ್’, ‘ಮಾಲ್ಗುಡಿ ಡೇಸ್’, ‘ರಾಘು’, ‘ಮರೀಚಿ’, ‘ಕದ್ದ ಚಿತ್ರ’, ‘ಕೇಸ್ ಆಫ್ ಕೊಂಡಾಣ’, ಇದೀಗ ರಿಲೀಸ್ಗೆ ರೆಡಿಯಾಗಿರುವ ‘ರಿಪ್ಪನ್ ಸ್ವಾಮಿ’ ಚಿತ್ರಗಳಲ್ಲಿ ವಿಭಿನ್ನ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದೇನೆ.
