ನರೇಗಾ ಕಾಮಗಾರಿ: ಆಯವ್ಯಯ ಘೋಷಣೆಗಳ ಅನುಷ್ಠಾನ ಆರಂಭ

ಬೆಂಗಳೂರು: ನರೇಗಾ 2023-24ನೇ ಸಾಲಿನ ಆಯವ್ಯಯ ಘೋಷಣೆಗಳ ಕಾಲಮಿತಿ ಅನುಷ್ಠಾನ ಆರಂಭಿಸಲಾಗಿದೆ.

ಗೋಮಾಳ, ಬಹುವಾರ್ಷಿಕ ಹುಲ್ಲು ಅಭಿವೃದ್ಧಿ, ವಿಪತ್ತು ನಿರ್ವಹಣೆ, ಬೋರ್ ವೆಲ್ ರೀಚಾರ್ಜ್, ಶಾಲಾ ಶೌಚಾಲಯ, ಶಾಂತಿಧಾಮ, ಕೂಸಿನ ಮನೆ, ವಿದ್ಯಾಧಾಮ, ಗ್ರಾಮೀಣ ಸಂತೆ ಮತ್ತಿತರ ಕಾರ್ಯಕ್ರಮ ಜಾರಿಗೆ ಗ್ರಾಮೀಣಾಭಿವೃದ್ಧಿ ಆಯುಕ್ತಾಲಯದಿಂದ ಸೂಚನೆ ನೀಡಲಾಗಿದೆ.

ಈಗಾಗಲೇ ಅನುಮೋದನೆಗೊಂಡಿರುವ 2023-24ನೇ ಸಾಲಿನ ಕ್ರಿಯಾ ಯೋಜನೆಯಲ್ಲಿ ಅಳವಡಿಸಿಕೊಳ್ಳದೇ ಇದ್ದಲ್ಲಿ ಅಂತಹ ಗ್ರಾಮ ಪಂಚಾಯಿತಿಗಳು ಹೆಚ್ಚುವರಿಯಾಗಿ ಕ್ರಿಯಾ ಯೋಜನೆ ತಯಾರಿಸಿ ಸಲ್ಲಿಸಲು ಕಾಲಮಿತಿ ನಿಗದಿಪಡಿಸಿ ನಿರ್ದೇಶನ ನೀಡಲಾಗಿದೆ.

ಘೋಷಿತ ಕಾಮಗಾರಿಗಳನ್ನು ನಿಗದಿ ವರ್ಷದಲ್ಲಿಯೇ ಪೂರ್ಣಗೊಳಿಸಬೇಕು. ಸ್ಮಶಾನ ಅಭಿವೃದ್ಧಿ ಕಾಮಗಾರಿಯಲ್ಲಿ ಯೋಜನೆಯಡಿ ಅನುಮೋದಿತ ಕಾಮಗಾರಿಗಳನ್ನು ಮಾತ್ರವೇ ಕೈಗೊಳ್ಳತಕ್ಕದ್ದು. ಸ್ಮಶಾನ ಭೂಮಿಗೆ ಕಾಂಪೌಂಡ್ ನಿರ್ಮಿಸಲು ಯೋಜನೆಯಡಿ ಅವಕಾಶವಿಲ್ಲ. ಆದ್ದರಿಂದ ಸ್ಮಶಾನ ಭೂಮಿ ಒತ್ತುವರಿ ತಡೆಯಲು ಸುತ್ತಮುತ್ತ ಸಸಿಗಳನ್ನು ನೆಡುವಂತೆ ತಿಳಿಸಲಾಗಿದೆ.

ನರೇಗಾ ಯೋಜನೆಯಡಿ ಸರ್ಕಾರಿ ಶಾಲೆಗಳು ಮತ್ತು ಪದವಿ ಪೂರ್ವ ಕಾಲೇಜುಗಳಿಗೆ ಶೌಚಾಲಯ ನಿರ್ಮಿಸಲು ೋಷಿಸಲಾಗಿದೆ. ಪ್ರಸ್ತುತ ಆಯವ್ಯಯದಲ್ಲಿ ಪದವಿ ಕಾಲೇಜುಗಳಿಗೆ ಶೌಚಾಲಯ ನಿರ್ಮಿಸಲು ಘೋಷಿಸಲಾಗಿದ್ದು, ಯೋಜನೆಯಡಿ ಅನುಮತಿ ಇರುವ ಸಮುದಾಯ ಶೌಚಾಲಯ ಸಂಕೀರ್ಣವನ್ನು ಪದವಿ ಕಾಲೇಜು ಆವರಣದಲ್ಲಿ ನಿರ್ಮಿಸುವಂತೆ ಸೂಚಿಸಲಾಗಿದೆ.