ದಕ್ಷಿಣ ಭಾರತದಲ್ಲಿ ದೀಪಾವಳಿಯನ್ನಷ್ಟೇ ಆಚರಿಸಲಾಗುತ್ತದೆ. ನಮ್ಮ ಕಡೆಗೆ ದೀಪಾವಳಿಯ ಸಂದರ್ಭದಲ್ಲಿ ಧನ್ತೇರಸ್ ಆಚರಣೆ ಜೋರಾಗಿಯೇ ಇರುತ್ತದೆ. ಚಿನ್ನ, ಬೆಳ್ಳಿ ಖರೀದಿಗೆ ಹೇಳಿ ಮಾಡಿಸಿದ ದಿನವೆಂದು ಈ ಹಬ್ಬಕ್ಕೆ ಕರೆಯುತ್ತಾರೆ. ಇದೆಲ್ಲದರ ಜತೆಗೆ ಮನೆಯಲ್ಲಿನ ಹಣದ ಲಾಕರ್ಗಳನ್ನು, ಚೆಕ್ಬುಕ್, ಪಠ್ಯಪುಸ್ತಕ, ಚಿನ್ನ ಬೆಳ್ಳಿಯನ್ನು ಲಕ್ಷ್ಮೀ ದೇವಿಯ ಮುಂದಿಟ್ಟು ಪೂಜೆ ಮಾಡಲಾಗುತ್ತದೆ. ದೀಪಾವಳಿಯ ಜತೆಗೆ ಈ ಹಬ್ಬ ಬರುವುದರಿಂದ ಉತ್ತರ ಭಾರತದಲ್ಲಿ ಡಬಲ್ ಸಂಭ್ರಮ ಇರುತ್ತದೆ. ರಾಜಸ್ಥಾನ್, ಗುಜರಾತ್, ಪಂಜಾಬ್, ಉತ್ತರ ಪ್ರದೇಶ ಸೇರಿ ಬಹುತೇಕ ಉತ್ತರ ಭಾರತದ ಎಲ್ಲ ಮನೆಗಳಲ್ಲೂ ಈ ಹಬ್ಬದ ಆಚರಣೆ ಇರುತ್ತದೆ. ಬಗೆಬಗೆಯ ಸಿಹಿ ತಿನಿಸು ಒಂದೆಡೆಯಾದರೆ, ಹೊಸ ಬಟ್ಟೆ ಧರಿಸಿ ಮನೆ ಮಂದಿಯೆಲ್ಲ ಒಂದೆಡೆ ಸೇರಿ ಆಚರಣೆ ಮಾಡುತ್ತೇವೆ. ಈ ಹಬ್ಬದ ಸಂದರ್ಭದಲ್ಲಿ ಚಿನ್ನ ಖರೀದಿ ಮಾಡಲಾಗುತ್ತದೆ. ನಾನೂ ಸಹ ಈ ಹಬ್ಬದಂದೇ ಚಿನ್ನ ಖರೀದಿ ಮಾಡುತ್ತೇನೆ. ಮನೆಯಲ್ಲಿನ ಆಚರಣೆಗೆ ಬರುವುದಾದರೆ, ಮಣ್ಣಿನ ಗಣೇಶ ಮತ್ತು ಲಕ್ಷ್ಮೀ ದೇವಿಯ ಪ್ರತಿಮೆಯನ್ನು ಮಾಡಿ, ಪೂಜೆ ಮಾಡಲಾಗುತ್ತದೆ. ಅದರ ಜತೆಗೆ ಲಕ್ಷ್ಮೀ ದೇವರ ವಿಗ್ರಹವನ್ನೂ ಪ್ರತಿಷ್ಠಾಪಿಸಿ, ಚಿನ್ನದ ಒಡವೆಗಳಿಂದ ಅಲಂಕಾರ ಮಾಡುತ್ತೇವೆ. ನೈವೇದ್ಯಕ್ಕೆ ಲಪ್ಸಿ ಅನ್ನೋ ವಿಶೇಷ ಖಾದ್ಯವನ್ನು ಮಾಡುವುದು ನಮ್ಮ ಭಾಗದ ಸಂಪ್ರದಾಯ.
