ನಿರ್ಭಯಾ ಅತ್ಯಾಚಾರ ಅಪರಾಧಿಯ ಕ್ಷಮಾದಾನ ಅರ್ಜಿಯೇನೋ ವಜಾ ಆಯ್ತು..ಆದರೆ 22ಕ್ಕೆ ಗಲ್ಲಿಗೇರಿಸಲು ಸಾಧ್ಯವಿಲ್ಲ

ನವದೆಹಲಿ: ರಾಷ್ಟ್ರಪತಿ ರಾಮನಾಥ ಕೋವಿಂದ ಅವರು ದೆಹಲಿ ಅತ್ಯಾಚಾರ ಪ್ರಕರಣದ ಆರೋಪಿ ಮುಕೇಶ್​ ಸಿಂಗ್​ನ ಕ್ಷಮಾದಾನ ಅರ್ಜಿಯನ್ನು ತಿರಸ್ಕರಿಸಿದ್ದಾರೆ.

ಹಾಗಂತ ನಿರ್ಭಯಾ ಅಪರಾಧಿಗಳನ್ನು ಜನವರಿ 22ರಂದು ಬೆಳಗ್ಗೆ 7ಗಂಟೆಗೆ ಗಲ್ಲಿಗೇರಿಸಲು ಸಾಧ್ಯವಿಲ್ಲ. ಅರ್ಜಿ ಸಲ್ಲಿಸಿದಾಗಲೇ ನಾಲ್ವರು ಅಪರಾಧಿಗಳನ್ನು ನೇಣಿಗೇರಿಸುವ ದಿನಾಂಕ ಮುಂದೂಡಲ್ಪಟ್ಟಿತ್ತು. ಈಗ ರಾಷ್ಟ್ರಪತಿ ಅದನ್ನು ವಜಾಗೊಳಿಸಿದ್ದರೂ ಕೂಡ 14 ದಿನಗಳವರೆಗೆ ಅಪರಾಧಿಗಳನ್ನು ನೇಣಿಗೇರಿಸುವಂತಿಲ್ಲ.

ಈ ಮಧ್ಯೆ ಮುಕೇಶ್​ ಸಿಂಗ್​ ತಮ್ಮ ಮರಣದಂಡನೆ ಶಿಕ್ಷೆಯನ್ನು ಮರುಪರಿಶೀಲನೆ ಮಾಡುವಂತೆ ದೆಹಲಿ ಕೋರ್ಟ್​ಗೆ ಅರ್ಜಿ ಸಲ್ಲಿಸಿದ್ದಾನೆ. ಅದನ್ನು ನಿನ್ನೆ ವಿಚಾರಣೆ ನಡೆಸಿದ ನ್ಯಾಯಾಧೀಶರು ಕೂಡ ಇದನ್ನೇ ಪುನರುಚ್ಚರಿಸಿದ್ದಾರೆ.

ಇನ್ನೂ 14 ದಿನಗಳ ಕಾಲದ ಕಾನೂನು ಪ್ರಕ್ರಿಯೆಗಳಿದ್ದ ಗಲ್ಲಿಗೇರಿಸುವ ಹೊಸ ದಿನಾಂಕ ಇನ್ನು ಮುಂದೆ ನಿರ್ಧಾರವಾಗಲಿದೆ.

ಈ ಮಧ್ಯೆ ಉಳಿದ ಅಪರಾಧಿಗಳಾದ ವಿನಯ್​ ಶರ್ಮಾ, ಅಕ್ಷಯ್​ ಠಾಕೂರ್​, ಪವನ್​ ಗುಪ್ತಾ ಇನ್ನೂ ಕ್ಷಮಾದಾನದ ಅರ್ಜಿ ಸಲ್ಲಿಸಿಲ್ಲ. ಅವರೂ ಕೂಡ ಯಾವ ಹಂತದಲ್ಲಾದರೂ ದಯಾ ಅರ್ಜಿ ಸಲ್ಲಿಸಬಹುದು. ಹಾಗಾದರೆ ಗಲ್ಲಿಗೇರಿಸುವ ದಿನಾಂಕ ಮತ್ತಷ್ಟು ಮುಂದೂಡಲ್ಪಡುತ್ತದೆ. (ಏಜೆನ್ಸೀಸ್​)