ಭಾರತ ಚುನಾವಣಾ ಆಯೋಗ ಈ ಬಾರಿಯ ವಿಧಾನಸಭಾ ಚುನಾವಣೆಯಲ್ಲಿ ಅಂಗವಿಕಲರು ಹಾಗೂ 80 ವರ್ಷ ವಯಸ್ಸು ಮೀರಿದವರಿಗೆ ಮನೆ ಬಾಗಿಲಲ್ಲೇ ಮತ ಹಾಕುವ ಅವಕಾಶ ಕಲ್ಪಿಸಿದೆ. ಈ ಅವಕಾಶದತ್ತ ನಿರಾಸಕ್ತಿ ತೋರಿರುವ ಬಹಳಷ್ಟು ಅಂಗವಿಕಲರು ಹಾಗೂ ವೃದ್ಧರು ಮೇ 10ರಂದು ಮತಗಟ್ಟೆಗೆ ತೆರಳಿ ಮತ ಹಾಕಲು ನಿರ್ಧರಿಸಿದಂತಿದೆ. ರಾಜ್ಯದಲ್ಲಿ 58,545 ಮತಗಟ್ಟೆಗಳು ಹಾಗೂ 5,30,85,556 ಮತದಾರರಿದ್ದಾರೆ. ಇವರಲ್ಲಿ್ಲ 80 ವರ್ಷಕ್ಕೂ ಅಧಿಕ ವಯೋಮಾನದ ಪುರುಷರು 5,46,487, ಮಹಿಳೆಯರು 6, 69,417 ಹಾಗೂ ಇತರ 16 ಮಂದಿ ಸೇರಿ 12,15,920 ಮತದಾರರು ಇದ್ದಾರೆ. ಇಷ್ಟು ಮತದಾರರಲ್ಲಿ 80,250 ಮಂದಿ ಮನೆ ಬಳಿ ಮತದಾನಕ್ಕೆ ನೋಂದಾಯಿಸಿಕೊಂಡಿದ್ದಾರೆ. ಪುರುಷ 3,35, 387 ಹಾಗೂ ಮಹಿಳೆ 2,35,833 ಹಾಗೂ ಇತರ 61 ಮಂದಿ ಸೇರಿ ರಾಜ್ಯದಲ್ಲಿ 5,71,281 ಅಂಗವಿಕಲ ಮತದಾರರು ಇದ್ದಾರೆ. ಮತದಾನಕ್ಕೆ ನೋಂದಣಿ ಮಾಡಿಕೊಂಡ ಅಂಗವಿಕಲರ ಸಂಖ್ಯೆ 19,279 ಮಾತ್ರ. ಇನ್ನು, ಅಗತ್ಯ ಸೇವೆಯಲ್ಲಿರುವ 13,771, ಚುನಾವಣಾ ಕಾರ್ಯಕ್ಕೆ ನಿಯೋಜನೆಗೊಂಡಿ 1,78,523 ಮಂದಿ ಹಕ್ಕು ಚಲಾಯಿಸಲು ನೋಂದಣಿ ಮಾಡಿಕೊಂಡಿದ್ದಾರೆ.
