5, 8ನೇ ತರಗತಿಗೆ ಮೌಲ್ಯಾಂಕನ: 7ನೇ ಕ್ಲಾಸ್​ಗೆ ನಡೆಸುತ್ತಿದ್ದ ಪಬ್ಲಿಕ್ ಪರೀಕ್ಷೆ ಮಾದರಿ; ಯಾರನ್ನೂ ಫೇಲ್ ಮಾಡುವಂತಿಲ್ಲ

ಬೆಂಗಳೂರು: 2022-23ನೇ ಸಾಲಿನಿಂದಲೇ ರಾಜ್ಯ ಪಠ್ಯಕ್ರಮದ ಎಲ್ಲ ಶಾಲೆಗಳಲ್ಲಿ 5 ಮತ್ತು 8ನೇ ತರಗತಿಗಳಿಗೆ ವಾರ್ಷಿಕ ಪರೀಕ್ಷೆ/ ಮೌಲ್ಯಾಂಕನ ಪರೀಕ್ಷೆ ನಡೆಸುವಂತೆ ಶಿಕ್ಷಣ ಇಲಾಖೆ ಸೂಚನೆ ನೀಡಿದೆ. ಪ್ರಸಕ್ತ ಸಾಲಿನಲ್ಲಿ ಅರ್ಧ ಶೈಕ್ಷಣಿಕ ವರ್ಷ ಪೂರ್ಣಗೊಂಡಿದ್ದು, ಈಗಾಗಲೆ ರಚನಾತ್ಮಕ ಮೌಲ್ಯಮಾಪನ (ಎಫ್​ಎ 1 ಮತ್ತು 2) ಹಾಗೂ ಸಂಕಲಾತ್ಮಕ ಮೌಲ್ಯಮಾಪನ (ಎಸ್​ಎ-1) ಪರೀಕ್ಷೆಗಳು ಮುಗಿದಿವೆ.

ಈ ಶೈಕ್ಷಣಿಕ ವರ್ಷ ವಾರ್ಷಿಕ ಪರೀಕ್ಷೆ ನಿರ್ವಹಿಸುವ ಬದಲಾಗಿ ಉಳಿದ ಅರ್ಧ ವರ್ಷಕ್ಕೆ ಸೀಮಿತಗೊಳಿಸಿ ಸಾಂಕೇತಿಕವಾಗಿ ನವೆಂಬರ್-2022ರಿಂದ ಮಾರ್ಚ್-2023ರ ಮೊದಲನೇ ವಾರದೊಳಗೆ ನಿರ್ವಹಿಸಿದ ಪಠ್ಯವಸ್ತು ಆಧರಿಸಿ ಎಸ್​ಎ-2 ಪರೀಕ್ಷೆಗೆ ಮಕ್ಕಳನ್ನು ತಯಾರು ಮಾಡಲು ಅಗತ್ಯ ಕ್ರಮ ವಹಿಸಬೇಕು ಎಂದು ಸಾರ್ವಜನಿಕ ಶಿಕ್ಷಣ ಇಲಾಖೆ ಆಯುಕ್ತ ಡಾ.ಆರ್. ವಿಶಾಲ್ ರಾಜ್ಯ ಪಠ್ಯಕ್ರಮ ಬೋಧಿಸುವ ಎಲ್ಲ ಶಾಲೆಗಳಿಗೆ ಸೂಚಿಸಿದ್ದಾರೆ.

ಮಾ.9ರಿಂದ ಪರೀಕ್ಷೆ: ಮಾ.9ರಿಂದ 17ರವರೆಗೆ ಪರೀಕ್ಷೆ ನಡೆಸಬೇಕು. ಏ.8ರಿಂದ 10ರೊಳಗೆ ಸಮುದಾಯದತ್ತ ಶಾಲೆ ಕಾರ್ಯಕ್ರಮ ನಡೆಸಿ ಫಲಿತಾಂಶ ಪ್ರಕಟಿಸಬೇಕು. ಎಫ್​ಎ-1,2,3,4 ಮತ್ತು ಎಸ್​ಎ-1 ಮತ್ತು 2 ಅನ್ನು ಸೇರಿಸಿ 100 ಅಂಕಗಳಿಗೆ ಪರಿಗಣಿಸಿ ಶೇ.35 ಅಂಕ ಪಡೆದವರನ್ನು ‘ಕಲಿಕಾ ಪ್ರಗತಿ ಸಾಧಿಸಿದ ವಿದ್ಯಾರ್ಥಿ’ ಎಂದು ಪರಿಗಣಿಸಬೇಕು ಎಂದು ಸೂಚಿಸಲಾಗಿದೆ.

ಫೇಲ್ ಮಾಡುವಂತಿಲ್ಲ: ಪರೀಕ್ಷೆಯಲ್ಲಿ ಅನುತ್ತೀರ್ಣರಾದ ವಿದ್ಯಾರ್ಥಿಗಳಿಗೆ ಫಲಿತಾಂಶ ಪ್ರಕಟವಾದ ಎರಡು ತಿಂಗಳೊಳಗೆ ಪೂರಕ ಪರೀಕ್ಷೆ ನಡೆಸಿ ವಿದ್ಯಾರ್ಥಿಗಳ ಕಲಿಕಾ ಪ್ರಗತಿಯನ್ನು ಸುಧಾರಿಸಬೇಕು. ಬಳಿಕ ಮುಂದಿನ ತರಗತಿಗಳಿಗೆ ಕಳುಹಿಸಬೇಕು. ಯಾವುದೇ ಕಾರಣಕ್ಕೂ ಅನುತ್ತೀರ್ಣ ಮಾಡುವಂತಿಲ್ಲ. ಈ ಮೊದಲು 7ನೇ ತರಗತಿಗೆ ನಡೆಸುತ್ತಿದ್ದ ಮೌಲ್ಯಾಂಕನ ಪರೀಕ್ಷೆ ಮಾದರಿಯಲ್ಲಿ ಪರೀಕ್ಷೆ ನಡೆಯಲಿದೆ.

ಅನುಸರಿಸಬೇಕಾದ ನಿಯಮ

• 5ನೇ ತರಗತಿ ಮಕ್ಕಳಿಗೆ 60 ಅಂಕಗಳಿಗೆ ಸಿಸಿಇ ಮೌಲ್ಯಮಾಪನ ಮತ್ತು 40 ಅಂಕಗಳಿಗೆ ಲಿಖಿತ ಪರೀಕ್ಷೆ ನಡೆಸಬೇಕು. ನವೆಂಬರ್​ನಿಂದ ಮಾರ್ಚ್ ಮೊದಲ ವಾರದವರೆಗಿನ ಪಠ್ಯವಸ್ತುವನ್ನು ಮಾತ್ರ ಪರಿಗಣಿಸಬೇಕು
• 8ನೇ ತರಗತಿಗೆ 40 ಸಿಸಿಇ ಮೌಲ್ಯಮಾಪನ, 60 ಅಂಕಕ್ಕೆ ಲಿಖಿತ ಪರೀಕ್ಷೆ ನಡೆಸಬೇಕು. ಜೂನ್​ನಿಂದ ಫೆಬ್ರವರಿ ಅವಧಿಯಲ್ಲಿನ ಪಠ್ಯವಸ್ತು ಪರಿಗಣಿಸಬೇಕು

ಆರ್​ಟಿಇ ಏನು ಹೇಳುತ್ತೆ?: ಉಚಿತ ಮತ್ತು ಕಡ್ಡಾಯ ಶಿಕ್ಷಣ ಹಕ್ಕು ಕಾಯ್ದೆ-2009 (ಆರ್​ಟಿಇ) ಪ್ರಕಾರ, ಯಾವುದೇ ಮಗುವು ಶಿಕ್ಷಣದಿಂದ ವಂಚಿರಾಗಬಾರದು. ಪ್ರತಿ ಶೈಕ್ಷಣಿಕ ವರ್ಷದ ಕೊನೆಯಲ್ಲಿ 5 ಮತ್ತು 8ನೇ ತರಗತಿಗಳಿಗೆ ಪರೀಕ್ಷೆ ನಡೆಸಬೇಕು. ಮುಖ್ಯ ಪರೀಕ್ಷೆಯಲ್ಲಿ ಮಗುವು ಅನುತ್ತೀರ್ಣವಾದಲ್ಲಿ ಫಲಿತಾಂಶ ಪ್ರಕಟವಾದ 2 ತಿಂಗಳೊಳಗೆ ಪೂರಕ ಪರೀಕ್ಷೆ ನಡೆಸುವ ಮೂಲಕ ಮತ್ತೊಂದು ಅವಕಾಶ ಕಲ್ಪಿಸಬೇಕು. ಪೂರಕ ಪರೀಕ್ಷೆಯಲ್ಲಿಯೂ ಮಗುವು ವಿಫಲವಾದರೆ, ಪ್ರಾಥಮಿಕ ಶಿಕ್ಷಣ ಮುಗಿಯುವವರೆಗೆ ಮಗುವನ್ನು ತಡೆಹಿಡಿಯದಿರಲು ಸರ್ಕಾರವು ಸೂಕ್ತ ಕ್ರಮ ವಹಿಸಬೇಕು.

ಕೈಗೊಳ್ಳಬೇಕಾದ ಕ್ರಮಗಳೇನು?

• ಸ್ಯಾಟ್ಸ್ ಸಂಖ್ಯೆ ಆಧಾರಿಸಿ ಪರೀಕ್ಷೆ ನೋಂದಣಿ ಪತ್ರ, ಫಲಿತಾಂಶ, ಅಂಕಗಳ ಕ್ರೋಡೀಕರಣ ನಡೆಯಲಿದೆ. ಆದ್ದರಿಂದ ಪ್ರತಿ ಶಾಲೆಯು ಸ್ಯಾಟ್ಸ್​ನಲ್ಲಿ ದಾಖಲಾಗಿರುವ ವಿದ್ಯಾರ್ಥಿಗಳ ಮಾಹಿತಿಯನ್ನು ದೃಢೀಕರಿಸಿ ಕ್ಷೇತ್ರ ಶಿಕ್ಷಣಾಧಿಕಾರಿಗಳ ಕಚೇರಿಗೆ ಪಟ್ಟಿ ಸಲ್ಲಿಸಬೇಕು
• ಪರೀಕ್ಷೆ ಮತ್ತು ನಿರ್ವಹಣಾ ವೆಚ್ಚವನ್ನು ವಿದ್ಯಾರ್ಥಿಗಳಿಂದ ಪಡೆಯದೆ ಸಂಪೂರ್ಣವಾಗಿ ಕರ್ನಾಟಕ ಪರೀಕ್ಷೆ ಮತ್ತು ಮೌಲ್ಯನಿರ್ಣಯ ಮಂಡಳಿಯಿಂದ ಭರಿಸಲು ಸರ್ಕಾರ ಆದೇಶ
• 5ನೇ ತರಗತಿಗೆ ಪ್ರತಿ 25 ಮತ್ತು 8ನೇ ತರಗತಿಗೆ 50 ಮಕ್ಕಳಿಗೆ ಪರೀಕ್ಷಾ ಕೇಂದ್ರ ನಿರ್ವಿುಸಬೇಕು. 25 ಮಕ್ಕಳು ಲಭ್ಯವಾಗದಿದ್ದಲ್ಲಿ 2 ಕಿಮೀ ವ್ಯಾಪ್ತಿಯಲ್ಲಿರುವ ಶಾಲೆಗಳ ಮಕ್ಕಳನ್ನು ಸೇರಿಸಿ ಕೇಂದ್ರ ಸ್ಥಾಪಿಸಬೇಕು
• ಶಾಲಾ ಹಂತದಲ್ಲಿ ಮುಖ್ಯಶಿಕ್ಷಕರು ಆನ್​ಲೈನ್ ಮೂಲಕ ಮಾಹಿತಿ ಪಡೆದು ಪ್ರವೇಶಪತ್ರ ಮುದ್ರಿಸಿ ಕೊಡಬೇಕು. 5 ಮತ್ತು 8ನೇ ತರಗತಿಗೆ 50 ಅಂಕಗಳಿಗೆ 2 ಗಂಟೆ ಕಾಲ ಪರೀಕ್ಷೆ ನಡೆಸಬೇಕು
• ಡಿಎಸ್​ಇಆರ್​ಟಿ ಸಹಾಯ ಪಡೆದು ಶಾಲಾ ಪರೀಕ್ಷೆ ಮತ್ತು ಮೌಲ್ಯನಿರ್ಣಯ ಮಂಡಲಿ ಪ್ರಶ್ನೆಪತ್ರಿಕೆ ಸಿದ್ಧಪಡಿಸಬೇಕು. 40 ಅಂಕಗಳಿಗೆ ಲಿಖಿತ (20 ಅಂಕಗಳಿಗೆ ಎಂಸಿಕ್ಯೂ, 20 ಅಂಕಗಳಿಗೆ ವಾಕ್ಯರೂಪದ ಪ್ರಶ್ನೆ) ಮತ್ತು 10 ಅಂಕಗಳಿಗೆ ಮೌಖಿಕ ಪರೀಕ್ಷೆ
• ಪರೀಕ್ಷೆ ನಡೆಸಲು ಬೇಕಾದ ಅವಶ್ಯಕ ಮೂಲ ಸೌಕರ್ಯಗಳನ್ನು ಆಯಾ ಪರೀಕ್ಷಾ ಕೇಂದ್ರದ ಶಾಲೆಯವರು ನಿರ್ವಹಿಸುವುದು ಹಾಗೂ ಪರೀಕ್ಷಾ ಕೇಂದ್ರದ ಮುಖ್ಯಸ್ಥರನ್ನಾಗಿ ಶಾಲಾ ಮುಖ್ಯಶಿಕ್ಷಕರು ಹಾಗೂ ಕೊಠಡಿ ಮೇಲ್ವಿಚಾರಕರಾಗಿ ಕ್ಲಸ್ಟರ್ ವ್ಯಾಪ್ತಿಯ ಶಾಲೆಗಳ ಶಿಕ್ಷಕರನ್ನು ಬದಲಾಯಿಸಿ ನಿಯೋಜಿಸಲು ಬಿಇಒಗಳು ಕ್ರಮ ವಹಿಸಬೇಕು
• 5ನೇ ತರೆಗತಿ ಮೌಲ್ಯಮಾಪನವನ್ನು ತಾಲೂಕು ಹಂತದಲ್ಲಿ ಮತ್ತು 8ನೇ ತರಗತಿ ಮೌಲ್ಯಮಾಪನವನ್ನು ಬ್ಲಾಕ್ ಹಂತದಲ್ಲಿ ನಡೆಸಬೇಕು. ತಾಲೂಕು ಹಂತದಲ್ಲಿ ಮೌಲ್ಯಮಾಪನ ಕಾರ್ಯ ಕೈಗೊಳ್ಳಲು ಕ್ರಮ ವಹಿಸಬೇಕು. ಆಂಗ್ಲ ಮಾಧ್ಯಮ ಪರೀಕ್ಷೆಗಳಿಗೆ ಅವಶ್ಯವೆನಿಸಿದರೆ ಖಾಸಗಿ ಶಾಲಾ ಶಿಕ್ಷಕರನ್ನು ನಿಯೋಜಿಸಬಹುದು.

https://www.vijayavani.net/teenage-boy-found-hanging-at-house-wearing-saree-bindi-bangles-and-womens-innerwear/

https://www.vijayavani.net/dead-body-of-private-company-employee-is-found-in-a-car/