ಕೋವಿಡ್-19 ಲಾಕ್ಡೌನ್ ಸಮಯದಲ್ಲಿ ಒಬ್ಬರನ್ನೊಬ್ಬರು ಭೇಟಿಯಾಗಲು ಸಾಧ್ಯವಾಗದಿದ್ದಾಗ ಸ್ನೇಹಿತರು, ಸಮಾನ ಮನಸ್ಕರೊಡನೆ ಮುಕ್ತವಾಗಿ ರ್ಚಚಿಸುವ ವೇದಿಕೆಯಾಗಿ ರೂಪುಗೊಂಡಿರುವ ಕ್ಲಬ್ಹೌಸ್ ಆಪ್ನಲ್ಲಿ ಅಪಾಯದ ಸೈರನ್ ಕೂಡ ಪ್ರತಿಧ್ವನಿಸಲಾರಂಭಿಸಿದೆ. ಆರೋಗ್ಯಕರ ಮಾತುಕತೆ ಜತೆಗೆ ದೇಶ, ಧರ್ಮದ ವಿಚಾರವಾಗಿ ಕೋಮುದ್ವೇಷ, ರಾಜಕೀಯ ವೈಷಮ್ಯ, ಡೇಟಿಂಗ್, ಲೈಂಗಿಕತೆ ವಿಚಾರಗಳು ಅಂಕೆಯಿಲ್ಲದ ಈ ವೇದಿಕೆಯಲ್ಲಿ ಮುಕ್ತವಾಗಿ ಹೊರಹೊಮ್ಮುತ್ತಿರುವುದು ಸಂಭಾವ್ಯ ಅಪಾಯದ ಮುನ್ಸೂಚನೆ ಹೊರಹಾಕಿದೆ. ದಿನಕಳೆದಂತೆ ಈ ಆಪ್ ಭಾರತದಲ್ಲಿ ಹೆಚ್ಚು ಜನಪ್ರಿಯವಾಗತೊಡಗಿದೆ. ಪ್ರತಿನಿತ್ಯ ಹತ್ತಾರು ಭಾಷೆಗಳಲ್ಲಿ ಸಾವಿರಾರು ಚರ್ಚೆಗಳು ನಡೆಯುತ್ತಿವೆ. ಸಾಮಾಜಿಕ ಜಾಲತಾಣ ಗಳಾದ ಫೇಸ್ಬುಕ್, ಟ್ವಿಟರ್ನಲ್ಲಿ ಅಕ್ಷರ, ವಿಡಿಯೋಗಳ ಮೂಲಕ ಸಂವಹನ ನಡೆದರೆ ಸಹಜ ರೀತಿಯ ಆಡಿಯೋ ಸಂವಹನಕ್ಕೆ ಕ್ಲಬ್ಹೌಸ್ ಜನಪ್ರಿಯವಾಗುತ್ತಿದೆ. ಯಾರು, ಏನು ಬೇಕಾದರೂ ಮಾತನಾಡಲು ಇರುವ ಈ ವೇದಿಕೆ ಮೇಲೆ ಕಾನೂನು ಕ್ರಮ ಕೈಗೊಳ್ಳಲೂ ಕಷ್ಟಕರವಾಗುವ ಅಪಾಯವಿದೆ.
