ಸಿನಿಮಾ ಗೆಲುವಿನ ಸೂತ್ರವೇನು? ಕಂಟೆಂಟ್, ಮೇಕಿಂಗ್ ಗುಣಮಟ್ಟ, ಕಲಾವಿದರ ನಟನೆ, ಸಂಗೀತ ಎಲ್ಲವೂ ಚೆನ್ನಾಗಿರಬೇಕು ಎಂಬ ಉತ್ತರ ಬರುವುದು ಸಾಮಾನ್ಯ. ಆದರೆ, ಆ ಯಾವ ವಿಷಯದಲ್ಲೂ ಗುಣಮಟ್ಟ ಕಾಪಾಡಿಕೊಳ್ಳದ, ತೀರಾ ಕಳಪೆ ಚಿತ್ರವೊಂದು ಸದ್ಯ ಚೀನಾ ಬಾಕ್ಸಾಫಿಸಿನಲ್ಲಿ ಗೆದ್ದು ಬೀಗುತ್ತಿದೆ. ಹೆಸರು "ನಿಯು ಲಾಯ್'. ಕಳೆದ ಆ. 5ರಂದು ಚೀನಾದಲ್ಲಿ ರಿಲೀಸ್ ಆಗಿರುವ ಮಂಡಾರಿನ್ ಭಾಷೆಯ "ನಿಯು ಲಾಯ್' (ದ ಆಕ್ಸ್ ಈಸ್ ಕಮಿಂಗ್) ಆ್ಯನಿಮೇಟೆಡ್ ಚಿತ್ರ ಸದ್ಯ ವಿಶ್ವಾದ್ಯಂತ ಸದ್ದು ಮಾಡುತ್ತಿದೆ. ತಾಯಿ ಕ್ಸಿನ್ ಯುಮೆಂಗ್ ಮತ್ತು ಮಗ ಸುನ್ ಲಿಫಾಂಗ್ ಇಬ್ಬರೇ ಸೇರಿ ಕೇವಲ ಎರಡು ಲಕ್ಷ ರೂ. ಬಜೆಟ್ನಲ್ಲಿ 86 ನಿಮಿಷದ ಈ ಸಿನಿಮಾ ಮಾಡಿದ್ದಾರೆ. ಅವರೇ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು, ಸಂಗೀತ, ನಿರ್ದೇಶನ, ಹಿನ್ನೆಲೆ ಧ್ವನಿ ಸೇರಿ ನಿರ್ಮಾಣದ ಜವಾಬ್ದಾರಿಯನ್ನೂ ನಿರ್ವಹಿಸಿದ್ದಾರೆ. ಹಾಗೇ ಯಾವುದೇ ಟೀಸರ್, ಟ್ರೇಲರ್ ಇಲ್ಲದೇ ಪ್ರಚಾರವನ್ನೂ ಮಾಡದೇ ಚಿತ್ರವನ್ನು ಆ. 5ರಂದು 245 ಥಿಯೇಟರ್ಗಳಲ್ಲಿ ರಿಲೀಸ್ ಮಾಡಲಾಗಿತ್ತು. ಕಳಪೆ ಗುಣಮಟ್ಟದ ಆ್ಯನಿಮೇಷನ್ನಿಂದಾಗಿ ಮೊದಲ ಒಂಬತ್ತು ದಿನಗಳಲ್ಲಿ ಕೇವಲ 236 ಪ್ರೇಕ್ಷಕರು ಚಿತ್ರವನ್ನು ನೋಡಿದ್ದು, ₹1 ಲಕ್ಷ ಕಲೆಕ್ಷನ್ ಮಾಡಿಕೊಂಡಿತ್ತು. ಹೀಗಾಗಿ ಆ. 4ರಂದು ಕೇವಲ 4 ಸ್ಕ್ರೀನ್ಗಳಿಗೆ ಪ್ರದರ್ಶನ ಇಳಿಸಲಾಗಿತ್ತು. ಆದರೆ, ರಾತ್ರೋರಾತ್ರಿ ಈ ಸಿನಿಮಾ ಅದೆಷ್ಟರ ಮಟ್ಟಿಗೆ ನೆಗಟಿವ್ ರೇಟಿಂಗ್ ಮತ್ತು ಟ್ರೋಲ್ಗೆ ಒಳಗಾಯಿತೆಂದರೆ, ಆ. 15ರಿಂದ ಜನ ಚಿತ್ರ ಇನ್ನೆಷ್ಟು ಕೆಟ್ಟದಾಗಿ ಇರಬಹುದು ಎಂಬುದನ್ನು ಥಿಯೇಟರ್ನಲ್ಲೇ ನೋಡಿ ತಿಳಿದುಕೊಳ್ಳಲು, ಮುಗಿಬಿದ್ದರು. ಸದ್ಯ ಥಿಯೇಟರ್ ಸಂಖ್ಯೆ 360 ಮೀರಿದ್ದು, ಕಳೆದ ನಾಲ್ಕು ದಿನಗಳಲ್ಲಿ ಚಿತ್ರದ ಕಲೆಕ್ಷನ್ ಬರೋಬ್ಬರಿ ₹41 ಕೋಟಿ ದಾಟಿದೆ! ಆ ಮೂಲಕ ಅಮ್ಮ&ಮಗನ ಅದೃಷ್ಟವೇ ಬದಲಾಗಿದೆ. ವಿಶ್ವ ಸಿನಿಮಾ ಇತಿಹಾಸದಲ್ಲೇ ಅತಿ ಹೆಚ್ಚು ಲಾಭ ಮಾಡಿದ ಚಿತ್ರ ಎಂಬ ದಾಖಲೆ ಸೃಷ್ಟಿಸಿದ್ದು, ಈ ವರ್ಷ ತೆರೆಕಂಡ ಆ್ಯನಿಮೇಟೆಡ್ ಸಿನಿಮಾಗಳ ಪೈಕಿ ಅತಿಹೆಚ್ಚು ಕಲೆಕ್ಷನ್ ಮಾಡಿಕೊಂಡ ಸಿನಿಮಾಗಳ ಸಾಲಿಗೆ ಸೇರಿದೆ. ಹಾಗೇ ಆ. 14ರಂದು ಚೀನಾದಲ್ಲಿ ಬಿಡುಗಡೆಯಾದ ಕ್ರಿಸ್ಟೋರ್ ನೋಲನ್ರ "ದ ಒಡಿಸ್ಸಿ'ಗೂ ಬಾಕ್ಸಾಫಿಸಿನಲ್ಲಿ "ನಿಯು ಲಾಯ್' ಸವಾಲು ಹಾಕಿದೆ.
_1787318518828.webp?w=480&auto=format%2Ccompress&fit=max)
