ಎರಡನೇ ಹಂತದ ಕಲಿಗಳಿಗೆ ಕರ್ಫ್ಯೂ ಗುಮ್ಮ - ತಡರಾತ್ರಿ ಕಾರ್ಯಾಚರಣೆಗೆ ಬೀಳುತ್ತ ಬ್ರೇಕ್?

| ಡಿಪಿಎನ್ ಶ್ರೇಷ್ಠಿ ಚಿತ್ರದುರ್ಗ

ಕೋವಿಡ್ ರೂಪಾಂತರಿ ವೈರಾಣು ಭೀತಿಯ ಹಿನ್ನೆಲೆಯಲ್ಲಿ ರಾತ್ರಿ ಕರ್ಫ್ಯೂ ಜಾರಿಯಾಗುತ್ತಿರುವುದು ಗ್ರಾಮ ಪಂಚಾಯಿತಿ 2ನೇ ಹಂತದ ಚುನಾವಣೆ ಕಲಿಗಳಿಗೆ ಆತಂಕವನ್ನು ತಂದೊಡ್ಡಿದೆ. ಮೊದಲ ಹಂತದಲ್ಲಿ ಅಭ್ಯರ್ಥಿಗಳು ಮತದಾರರ ಮನವೊಲಿಸಲು ನಾನಾ ಕಸರತ್ತು ನಡೆಸಿದ್ದರು. ರಾತ್ರಿ ವೇಳೆ ಹಲವೆಡೆ ಗುಂಡು- ತುಂಡಿನ ಪಾರ್ಟಿ ಕೂಡ ಭರ್ಜರಿಯಾಗಿ ನಡೆದಿತ್ತು. ಮತದಾನದ ಹಿಂದಿನ 2-3 ದಿನಗಳ ಕಾಲ ಹಲವು ಅಭ್ಯರ್ಥಿಗಳು, ಅವರ ಬೆಂಬಲಿಗರು ನಿದ್ರೆಗೆಟ್ಟು ಗೆಲುವಿಗೆ ಅಗತ್ಯ ತಂತ್ರಗಾರಿಕೆಗಳ ಅನುಷ್ಠಾನಕ್ಕೆ ಶ್ರಮಿಸಿದ್ದರು. ಆ ಅವಕಾಶ ಎರಡನೇ ಹಂತದ ಅಭ್ಯರ್ಥಿಗಳಿಗೆ ಇಲ್ಲದಂತಾಗಿದೆ.

ರಾಜ್ಯದ 5,762 ಗ್ರಾಪಂಗಳ 92,121 ಸ್ಥಾನಗಳಿಗೆ ಡಿ.22 ಹಾಗೂ ಡಿ.27ರಂದು ಮತದಾನ. ಡಿ.30ರಂದು ಎಣಿಕೆ ನಿಗದಿಯಾಗಿತ್ತು. ಈಗಾಗಲೇ 117 ತಾಲೂಕು, 3019 ಗ್ರಾಪಂಗಳ 43238 ಸ್ಥಾನಗಳಿಗೆ ಮತದಾನ ನಡೆದಿದೆ. ಉಳಿದ ಗ್ರಾಪಂಗಳ ಸ್ಥಾನಗಳ ಸ್ಪರ್ಧಿಗಳಿಗೆ ಉಳಿದಿದ್ದ ಮೂರು ದಿನಗಳು ಪ್ರೖೆಮ್ ಟೈಮ್ ಎನಿಸಿತ್ತು. ಈಗ ರಾತ್ರಿ ಕರ್ಪ್ಯೂ, ಗೆಲುವಿನ ಸೋಲಿನ ಲೆಕ್ಕಾಚಾರವನ್ನೇ ಉಲ್ಟಾ ಮಾಡಬಹುದೆಂಬ ಆತಂಕ ಹಲವರದು. ಬಿಂದಾಸ್ ಆಗಿ ಖರ್ಚು ಮಾಡುತ್ತಿದ್ದವರಿಗೆ ಬ್ರೇಕ್ ಬಿತ್ತೆಂಬುದು ಕೆಲ ಸ್ಪರ್ಧಿಗಳ ಸಮಾಧಾನ. ಮಾದರಿ ನೀತಿ ಸಂಹಿತೆ ಖಡಕ್ ಅನುಷ್ಠಾನಕ್ಕೆ ಇದು ನೆರವಾಗಲಿದೆ ಎನ್ನುತ್ತಾರೆ ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು.

ತೋಟ, ತುಡಿಕೆ, ಹೊಸ ಲೇಔಟ್​ಗಳಲ್ಲಿ ನಡೆಯಬೇಕಿದ್ದ ಭರ್ಜರಿ ಪಾರ್ಟಿಗಳಿಗೂ ಕಡಿವಾಣ ಬೀಳುವಂತಾಗಿದ್ದು, ಮೋಜು, ಮಸ್ತಿ ನಿರೀಕ್ಷೆಯಲ್ಲಿದ್ದವರಿಗೆ ಈಗ ಪೊಲೀಸ್ ಸೈರನ್ ಸದ್ದು ಭಯ ತರಲಿದೆ.

ಕ್ಷಣ ಕ್ಷಣದ ಸುದ್ದಿಗಳ ಅಪ್ಡೇಟ್ಸ್​ಗಾಗಿ ನಮ್ಮ ಫೇಸ್​ಬುಕ್​ ಪುಟ ಲೈಕ್ ಮಾಡಿ ಮತ್ತು ಫಾಲೋ ಮಾಡಿ..

https://www.vijayavani.net/cabinet-approves-revised-dth-guidelines-license-for-20-years-100-pc-fdi/