ಗೂಗಲ್, ಫೇಸ್​ಬುಕ್ ವಿರುದ್ಧ ಹೊಸ ಪ್ರಕರಣ

ವಾಷಿಂಗ್ಟನ್: ಜಾಹೀರಾತು ಮಾರುಕಟ್ಟೆ ಮೇಲೆ ಪಾರಮ್ಯ ಸಾಧಿಸುವ ಉದ್ದೇಶದಿಂದ ಗೂಗಲ್ ಹಾಗೂ ಫೇಸ್​ಬುಕ್ ಅಕ್ರಮ ಒಪ್ಪಂದ ಮಾಡಿಕೊಂಡಿವೆ ಎಂದು ಅಮೆರಿಕದ 10 ರಾಜ್ಯಗಳು ಬುಧವಾರ ದಾವೆ ಹೂಡಿವೆ.

ಟೆಕ್ಸಾಸ್ ರಾಜ್ಯ ಈ ಮೊಕದ್ದಮೆಯ ನೇತೃತ್ವ ವಹಿಸಿದೆ. ಬೆಲೆ ನಿಯಂತ್ರಣ ಮುಂತಾದ ವಿಚಾರಗಳನ್ನು ಒಳಗೊಂಡಂತೆ ಹರಾಜಿನಲ್ಲಿ ಅಕ್ರಮ ನಡೆಸಲು ಗೂಗಲ್ ಏಕಸ್ವಾಮ್ಯ ಅಧಿಕಾರವನ್ನು ಬಳಸಿಕೊಂಡಿದೆ. ಇದು ನ್ಯಾಯದ ಉಲ್ಲಂಘನೆಯಾಗಿದೆ ಎಂದು ಟೆಕ್ಸಾಸ್​ನ ಅಟಾರ್ನಿ ಜನರಲ್ ಕೆನ್ ಪಾಕ್ಸ್​ಟನ್ ಹೇಳಿದ್ದಾರೆ. ಅವರು ಈ ಸಂಬಂಧ ಟ್ವಿಟರ್​ನಲ್ಲಿ ವಿಡಿಯೋ ಅಪ್​ಲೋಡ್ ಮಾಡಿದ್ದಾರೆ.

ಮುಕ್ತ ಮಾರುಕಟ್ಟೆ ಒಂದು ಬೇಸ್​ಬಾಲ್ ಆಟವೆಂದು ಪರಿಗಣಿಸಿದರೆ ಗೂಗಲ್ ತಾನೇ ಪಿಚ್ಚರ್, ಬ್ಯಾಟರ್ ಮತ್ತು ಅಂಪಾಯರ್​ನಂತೆ ವರ್ತಿಸಿದೆ’ ಎಂದು ಪಾಕ್ಸ್​ಟನ್ ಮಾರ್ವಿುಕವಾಗಿ ವರ್ಣಿಸಿದ್ದಾರೆ. ಗೂಗಲ್ ವಿರುದ್ಧ ಅಮೆರಿಕ ನ್ಯಾಯ ಇಲಾಖೆ ಅಕ್ಟೋಬರ್​ನಲ್ಲಿ ಏಕಸ್ವಾಮ್ಯ ಮೊಕದ್ದಮೆ ಹೂಡಿದ ನಂತರ ದಾಖಲಾಗುತ್ತಿರುವ ಎರಡನೇ ದಾವೆ ಇದಾಗಿದೆ.

ಏನು ಆರೋಪ?: ಡಿಸ್​ಪ್ಲೇ ಜಾಹಿರಾತು ಮಾರುಕಟ್ಟೆ ಮೇಲೆ ಆವಿಷ್ಕಾರದ ಮೂಲಕ ಗೂಗಲ್ ಪಾರಮ್ಯ ಸಾಧಿಸಿಲ್ಲ. ಎದುರಾಳಿಗಳನ್ನು ಸ್ಪರ್ಧೆಯಿಂದ ಹೊರಗಿಡುವ ತಂತ್ರವನ್ನು ಗೂಗಲ್ ಅನುಸರಿಸಿದೆ. ಈ ಮೂಲಕ ಸ್ಪರ್ಧೆಯ ಕತ್ತು ಹಿಸುಕಿದೆ ಎಂಬುದು ಟೆಕ್ಸಾಸ್ ಮತ್ತಿತರ ರಾಜ್ಯಗಳ ವಾದವಾಗಿದೆ.