ಪ್ರತಿಭಾ ಪಲಾಯನವನ್ನು ತಡೆಯುವ, ಶಿಕ್ಷಣದ, ಶೈಕ್ಷಣಿಕ ಸಂಸ್ಥೆಗಳ ಗುಣಮಟ್ಟ ಹೆಚ್ಚಿಸುವ ಗುರಿಯನ್ನೂ ಎನ್ಇಪಿ ಒಳಗೊಂಡಿರುವುದು ಗಮನಾರ್ಹ. ಈಗ ಮುಂದಿರುವ ಸವಾಲು ಸೂಕ್ತ ಅನುಷ್ಠಾನದ್ದು. ದೇಶದಲ್ಲಿ ‘ಒಂದು ತೆರಿಗೆ ವ್ಯವಸ್ಥೆ’ (ಜಿಎಸ್ಟಿ) ಜಾರಿಯಾಗಬೇಕಾದರೆ, ಎಲ್ಲ ರಾಜ್ಯ ಸರ್ಕಾರಗಳು ಮಹತ್ವದ ಪಾತ್ರ ವಹಿಸಿದ್ದವು. ಯಾವುದೇ ಹೊಸ ವ್ಯವಸ್ಥೆ ಬಂದಾಗ ಆರಂಭದಲ್ಲಿ ಒಂದಿಷ್ಟು ಸಂದೇಹಗಳು, ಪ್ರಶ್ನೆಗಳು ಉದ್ಭವವಾಗುವುದು ಸಹಜವೇ. ಆದರೆ, ಇವು ಮೂಲ ಉದ್ದೇಶಕ್ಕೆ ಚ್ಯುತಿ ಉಂಟುಮಾಡದಂತೆ ಆರೋಗ್ಯಕರ ಚರ್ಚೆಯ ಮೂಲಕ ಬಗೆಹರಿಸಿಕೊಳ್ಳಬೇಕು. ಈಗಲೂ, ಶಿಕ್ಷಕರಲ್ಲಿ, ಶೈಕ್ಷಣಿಕ ಸಂಸ್ಥೆಗಳಲ್ಲಿ ಒಂದಿಷ್ಟು ಅನುಮಾನಗಳಿವೆ. ಅವುಗಳ ಪರಿಹಾರಕ್ಕೆಂದೆ ಎನ್ಇಪಿ ಬಗ್ಗೆ ಅರಿವು ಮೂಡಿಸುವ ಕಾರ್ಯಕ್ರಮಗಳನ್ನು ನಡೆಸಲಾಗುತ್ತಿದೆ. ಎಲ್ಲ ರಾಜ್ಯ ಸರ್ಕಾರಗಳು ಈ ವಿಷಯದಲ್ಲಿ ರಾಜಕೀಯವನ್ನು, ಪೂರ್ವಗ್ರಹವನ್ನು ಬದಿಗಿರಿಸುವುದು ಅತ್ಯಂತ ಅವಶ್ಯವಾಗಿದೆ. ಹೊಸ ಶಿಕ್ಷಣ ನೀತಿ ಒಳಗೊಂಡಿರುವ ಆಶಯಗಳು ಸಾಕಾರಗೊಳ್ಳುವುದು ಅದರ ಪರಿಣಾಮಕಾರಿ ಅನುಷ್ಠಾನದ ಮೇಲೆ ಅವಲಂಬಿತವಾಗಿದೆ. ಹೊಸ ಪೀಳಿಗೆಯನ್ನು ಆತ್ಮವಿಶ್ವಾಸ ಮತ್ತು ಜ್ಞಾನ-ಕೌಶಲದಿಂದ ಸಮಾಜದ ಆಸ್ತಿಯನ್ನಾಗಿಸಲು ಸಾಮೂಹಿಕ ಸಂಕಲ್ಪ ತಳೆಯಬೇಕಿದೆ. ಆಗಲೇ, ಈ ಎಲ್ಲ ಪ್ರಯತ್ನಗಳಿಗೆ ಸಾರ್ಥಕತೆ ಸಿಗಲು ಸಾಧ್ಯ.
