ಹಾಲಿ ಋತುವಿನಿಂದ ನೀರಜ್​ ಚೋಪ್ರಾ ಔಟ್​; ಗಾಯದಿಂದಾಗಿ ಏಷ್ಯಾಡ್​ ಸಹಿತ ವರ್ಷದ ಎಲ್ಲ ಸ್ಪರ್ಧೆಗಳಿಗೆ ಅಲಭ್ಯ

ತರಬೇತಿಯ ವೇಳೆ ಪಾದದ ಅಸ್ಥಿರಜ್ಜು ಹರಿದು ಗಾಯವಾಗಿರುವುದಾಗಿ ನೀರಜ್​ ತಿಳಿಸಿದ್ದು, ಇದರಿಂದಾಗಿ ಹಾಲಿ ಋತುವಿನ ಮುಂಬರುವ ಎಲ್ಲ ಸ್ಪರ್ಧೆಗಳಿಂದ ಹೊರಗುಳಿದು ವಿಶ್ರಾಂತಿ ಪಡೆಯಲು ನಿರ್ಧರಿಸಿರುವುದಾಗಿ ಹೇಳಿದ್ದಾರೆ. ಹಾಲಿ ವರ್ಷ ಕಾಮನ್ವೆಲ್ತ್​ ಗೇಮ್ಸ್​ ಸಹಿತ ಮೂರೇ ಸ್ಪರ್ಧೆಗಳಲ್ಲಿ ಭಾಗವಹಿಸಿರುವ ನೀರಜ್​, ಮುಂಬರುವ ಡೈಮಂಡ್​ ಲೀಗ್​ ಫೈನಲ್ಸ್​, ಅಲ್ಟಿಮೇಟ್​ ಚಾಂಪಿಯನ್​ಷಿಪ್​ಅನ್ನೂ ತಪ್ಪಿಸಿಕೊಳ್ಳಲಿದ್ದಾರೆ.

"ಸುದೀರ್ಘ ಕಠಿಣ ಪರಿಶ್ರಮದ ಬಳಿಕ ನಾನು ಕೊನೆಗೂ ಉತ್ತಮ ಲಯ ಕಂಡುಕೊಂಡಿರುವ ಭಾವನೆ ಬಂದಿತ್ತು. ಲೌಸಾನೆ ಡೈಮಂಡ್​ ಲೀಗ್​ನಲ್ಲಿ ನನ್ನ ಹಾಲಿ ಋತುವಿನ ಅತ್ಯುತ್ತಮ ಎಸೆತ ಎಸೆದಿದ್ದೆ. ಆದರೆ ದುರದೃಷ್ಟಕರವಾಗಿ ಮತ್ತೆ ಗಾಯಗೊಂಡಿರುವೆ. ವೈದ್ಯರು ಮತ್ತು ನನ್ನ ತಂಡದೊಂದಿಗೆ ಚರ್ಚಿಸಿದ ಬಳಿಕ ಹಾಲಿ ಋತುವಿನಿಂದ ವಿಶ್ರಾಂತಿ ಪಡೆಯಲು ನಿರ್ಧರಿಸಿರುವೆ' ಎಂದು ನೀರಜ್​ ಹೇಳಿದ್ದಾರೆ.

"ಗಾಯದಿಂದ ಚೇತರಿಸಿಕೊಳ್ಳುವುದಕ್ಕೆ ಸದ್ಯ ಮೊದಲ ಆದ್ಯತೆ ನೀಡುವೆ. ಬಳಿಕ ಮುಂದಿನ ವರ್ಷ ಬಲಿಷ್ಠವಾಗಿ ಮರಳಿ ಕಣಕ್ಕಿಳಿಯುವೆ' ಎಂದು ಅವರು ಹೇಳಿದ್ದು, ಇನ್ನು ಪುನಶ್ಚೇತನದತ್ತ ಗಮನಹರಿಸಲಿದ್ದಾರೆ. ನಾನು ಲಯಕ್ಕೆ ಮರಳುವ ಹಂತದಲ್ಲೇ ಈ ಗಾಯವಾಗಿರುವುದು ತೀವ್ರ ಬೇಸರ ತಂದಿದೆ ಎಂದೂ ಅವರು ಹೇಳಿದ್ದಾರೆ.

2021ರ ಟೋಕಿಯೊ ಒಲಿಂಪಿಕ್ಸ್​ನಲ್ಲಿ ಚಿನ್ನ, 2024ರ ಪ್ಯಾರಿಸ್​ ಒಲಿಂಪಿಕ್ಸ್​ನಲ್ಲಿ ರಜತ ಜಯಿಸಿದ್ದ ನೀರಜ್​, ಜಾಗತಿಕ ಜಾವೆಲಿನ್​ ಥ್ರೋ ಸ್ಪರ್ಧೆಯಲ್ಲಿ ಕಳೆದ ಕೆಲ ವರ್ಷಗಳಿಂದ ನಿರಂತರವಾಗಿ ಸ್ಥಿರ ನಿರ್ವಹಣೆ ತೋರಿಸಿದ ಏಕೈಕ ಎಸೆತಗಾರರೆನಿಸಿದ್ದಾರೆ. ವಿಶ್ವ ಚಾಂಪಿಯನ್​ಷಿಪ್​ನಲ್ಲಿ ಚಿನ್ನ ಗೆದ್ದ ಮೊದಲ ಭಾರತೀಯರೆನಿಸಿರುವ ಅವರು, ಭಾರತ ಮಾತ್ರವಲ್ಲದೆ ನೆರೆಯ ಪಾಕಿಸ್ತಾನ ಮತ್ತು ಶ್ರೀಲಂಕಾದ ಜಾವೆಲಿನ್​ ಎಸೆತಗಾರರಿಗೂ ಸ್ಫೂರ್ತಿಯಾಗಿದ್ದಾರೆ.

ನೀರಜ್​ ಚೋಪ್ರಾ ಗೈರು ಏಷ್ಯಾಡ್​ನಲ್ಲಿ ಭಾರತದ ಚಿನ್ನದ ಪದಕ ಆಸೆಗೆ ಹೊಡೆತ ನೀಡಿದೆ. ಏಷ್ಯಾಡ್​ ಜಾವೆಲಿನ್​ನಲ್ಲಿ ಇನ್ನು ಭಾರತ ರೋಹಿತ್​ ಯಾದವ್​ ಮೇಲೆ ಪದಕ ನಿರೀೆ ಇಡಬೇಕಿದೆ. ನೀರಜ್​ 2022ರ ಏಷ್ಯಾಡ್​ನಲ್ಲಿ ಚಿನ್ನದ ಪದಕ ಗೆದ್ದಿದ್ದರು.