ಕರೊನಾ ವೈರಸ್ ಬೇರೆ ಸಾಂಕ್ರಾಮಿಕ ಕಾಯಿಲೆಗಳಂತಲ್ಲ. ಲಕ್ಷಣವಿಲ್ಲದಿದ್ದರೂ ಕಾಯಿಲೆ ಹರಡುವ ಸಾಧ್ಯತೆಯಿದೆ. ಪ್ರಪಂಚದ ಶೇ.60ರಿಂದ ಶೇ. 70 ಜನರು ಈ ವೈರಸ್ ದಾಳಿಗೆ ಒಳಗಾಗುತ್ತಾರೆ. ನಮ್ಮಲ್ಲಿ ಇನ್ನೂ ಕರೊನಾ ನಿರೋಧಕ ಲಸಿಕೆ ಸಿದ್ಧವಾಗಿಲ್ಲ. 2009-10ರಲ್ಲಿ ಅಮೆರಿಕದಲ್ಲಿ ಫ್ಲೂ ನಿಯಂತ್ರಣಕ್ಕೆ ಲಸಿಕೆ ಕಂಡುಹಿಡಿಯಲಾಗಿತ್ತು. ಅದರಿಂದ 15 ಲಕ್ಷ ಜನರನ್ನು ಸೋಂಕಿನಿಂದ ರಕ್ಷಿಸಿಕೊಳ್ಳಲಾಯಿತು. ಕರೊನಾ ಫ್ಲೂಗಿಂತ ಬೇಗ ಹರಡುವ ಸಾಮರ್ಥ್ಯ ಹೊಂದಿದೆ. ಕರೊನಾ ಲಸಿಕೆ ಸಿದ್ಧವಿಲ್ಲದ ಕಾರಣ ಈ ರೋಗ 2022ರವರೆಗೆ ಮುಂದುವರಿಯಲಿದೆ ಎಂದು ತಿಳಿಸಲಾಗಿದೆ. ಮಂದಗತಿಯಲ್ಲಿ ಬಹುಕಾಲ, ಸಣ್ಣಪುಟ್ಟ ಏರಿಳಿತದೊಂದಿಗೆ 2021ರಲ್ಲಿ ಈಗಿನಕ್ಕಿಂತ ಹೆಚ್ಚು ಪ್ರಮಾಣದಲ್ಲಿ ಸೋಂಕು ಹರಡುವ ಸಾಧ್ಯತೆ ಇದೆ. ವಿಶ್ವವು ಮುಂದಿನ ವರ್ಷದಲ್ಲಿ ಬಹುದೊಡ್ಡ ಸಂಖ್ಯೆಯಲ್ಲಿ ಸೋಂಕನ್ನು ಎದುರಿಸಲು ಸಿದ್ಧವಾಗಬೇಕಿದೆ ಎಂದು ವರದಿ ಹೇಳಿದೆ. ಸಿಐಡಿಆರ್ಎಪಿಯ ನಿರ್ದೇಶಕ ಮೈಕೆಲ್ ಏಸ್ಟರ್ಹೋಮ್ ವೈದ್ಯಕೀಯ ನಿರ್ದೇಶಕ ಕ್ರಿಸ್ಟನ್ ಮೂರ್, ಆರೋಗ್ಯ ಇತಿಹಾಸಕಾರ ಜಾನ್ ಬ್ಯಾರಿ ಮತ್ತು ಸಾಂಕ್ರಾಮಿಕ ರೋಗಶಾಸ್ತ್ರಜ್ಞ ಮಾರ್ಕ್ ಲಿಪ್ಸಿಟ್ ಈ ಅಧ್ಯಯನವನ್ನು ನಡೆಸಿ ವರದಿ ತಯಾರಿಸಿದ್ದಾರೆ.
