ಛತ್ತೀಸ್​ಗಢದಲ್ಲಿ ಮುಂದುವರೆದ ನಕ್ಸಲರ ಶರಣಾಗತಿ; ಕಂಕೇರ್​ನಲ್ಲಿ 13 ಮಹಿಳೆಯರು ಸೇರಿ 21 ಮಂದಿ ಪೊಲೀಸರ ಮುಂದೆ ಶರಣು|Naxal surrender

ರಾಯ್‌ಪುರ: ಛತ್ತೀಸ್​ಗಢದಲ್ಲಿ ನಕ್ಸಲರ ಶರಣಾಗತಿ(Naxal surrender) ಮುಂದುವರೆದಿದ್ದು, ನಿಷೇಧಿತ ಸಂಘಟನೆ ಸಿಪಿಐ (ಮಾವೋವಾದಿ) ಸಂಘಟನೆಯ 13 ಮಹಿಳೆಯರು ಸೇರಿದಂತೆ ಒಟ್ಟು 21 ಮಂದಿ ಭಾನುವಾರ(ಅ. 26) ಕಂಕೇರ್ ಜಿಲ್ಲೆಯಲ್ಲಿ 18 ಶಸ್ತ್ರಾಸ್ತ್ರಗಳೊಂದಿಗೆ ಪೊಲೀಸರ ಮುಂದೆ ಶರಣಾಗಿದ್ದಾರೆ.

ಈ 21 ಮಂದಿ ಕೇಶ್ಕಲ್ ವಿಭಾಗದ (ಉತ್ತರ ಉಪ ವಲಯ ಬ್ಯೂರೋ) ಕುಮರಿ/ಕಿಸ್ಕೋಡೋ ಪ್ರದೇಶ ಸಮಿತಿಯಿಂದ ಬಂದವರಾಗಿದ್ದು, 'ಪೂನಾ ಮಾರ್ಗಮ್: ಪುನರ್ ಸಂಯೋಜನೆ ಮೂಲಕ ಪುನರ್ವಸತಿ' ಉಪಕ್ರಮದಡಿಯಲ್ಲಿ ಅವರು ಶಸ್ತ್ರಾಸ್ತ್ರಗಳನ್ನು ತ್ಯಜಿಸಲು ನಿರ್ಧರಿಸಿದ್ದಾರೆ. ವಿಭಾಗ ಸಮಿತಿ ಕಾರ್ಯದರ್ಶಿ ಮುಖೇಶ್ ಕೂಡ ಸೇರಿದ್ದಾರೆ.

ಈ ಕುರಿತು ಮಾತನಾಡಿರುವ  ಬಸ್ತಾರ್ ರೇಂಜ್ ಇನ್ಸ್​ಪೆಕ್ಟರ್ ಜನರಲ್ ಆಫ್ ಪೊಲೀಸ್ ಸುಂದರರಾಜ್ ಪ್ಯಾಟ್ಲಿಂಗಮ್, ಪೂನಾ ಮಾರ್ಗಮ್: ಪುನರ್ ಸಂಯೋಜನೆ ಮೂಲಕ ಪುನರ್ವಸತಿ' ಉಪಕ್ರಮದ ಅಡಿಯಲ್ಲಿ ಇಂದು ಕಂಕೇರ್​ನಲ್ಲಿ ಮತ್ತೊಂದು ಮಹತ್ವದ ಕಾರ್ಯವನ್ನು ಸಾಧಿಸಲಾಗಿದೆ. ಸುಮಾರು 21 ಮಾವೋವಾದಿ ಕಾರ್ಯಕರ್ತರು ಸಶಸ್ತ್ರವನ್ನು, ಹಿಂಸಾಚಾರವನ್ನು ಆಧರಿಸಿದ ಸಿದ್ಧಾಂತವನ್ನು ತ್ಯಜಿಸಿದ್ದಾರೆ. ಗೌರವಾನ್ವಿತ ಜೀವನವನ್ನು ನಡೆಸಲು ಸಾಮಾಜಿಕ ಮುಖ್ಯವಾಹಿನಿಗೆ ಸೇರಿದ್ದಾರೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ: ಆಸ್ಪತ್ರೆಯಲ್ಲಿ ರಕ್ತ ವರ್ಗಾವಣೆ ಬಳಿಕ ಥಲಸ್ಸೆಮಿಯಾ ಪೀಡಿತ ಮಕ್ಕಳಿಗೆ ಹೆಚ್​ಐವಿ ಪಾಸಿಟಿವ್; ಐವರನ್ನು ಅಧಿಕಾರಿಗಳು ಸಸ್ಪೆಂಡ್| HIV Positive 

ಶರಣಾದವರಲ್ಲಿ ನಾಲ್ವರು ವಿಭಾಗೀಯ ಸಮಿತಿ ಸದಸ್ಯರು (DVCM), ಒಂಬತ್ತು ಮಂದಿ ಪ್ರದೇಶ ಸಮಿತಿ ಸದಸ್ಯರು (ACM) ಹಾಗೂ ನಿಷೇಧಿತ ಸಂಘಟನೆಯ ಇತರ ಎಂಟು ಸದಸ್ಯರು ಸೇರಿದ್ದಾರೆ. ಮೂರು AK-47 ರೈಫಲ್‌ಗಳು, ನಾಲ್ಕು ಸ್ವಯಂ-ಲೋಡಿಂಗ್ ರೈಫಲ್‌ಗಳು (SLR), ಎರಡು INSAS ಅಸಾಲ್ಟ್ ರೈಫಲ್‌ಗಳು, ಆರು .303 ರೈಫಲ್‌ಗಳು, ಎರಡು ಸಿಂಗಲ್-ಶಾಟ್ ರೈಫಲ್‌ಗಳು ಹಾಗೂ ಒಂದು ಬ್ಯಾರೆಲ್ ಗ್ರೆನೇಡ್ ಲಾಂಚರ್ (BGL) ಅನ್ನು ಹಸ್ತಾಂತರಿಸಿದ್ದಾರೆ. ಇಲ್ಲಿಯವರೆಗೆ ಅಕ್ಟೋಬರ್ ತಿಂಗಳ ಒಂದರಲ್ಲೇ 300ಕ್ಕೂ ಅಧಿಕ ಮಂದಿ ಶರಣಾಗಿದ್ದಾರೆ. (ಏಜೆನ್ಸೀಸ್​)

https://www.vijayavani.net/if-india-alliance-comes-to-power-we-will-throw-the-waqf-act-in-the-dustbin-tejashwi-yadav