ಕಾರು ಅಪಘಾತದಲ್ಲಿ ಮೃತರಾದ ನೌಕಾಪಡೆ ಅಧಿಕಾರಿ; ಇನ್ನಿಬ್ಬರಿಗೆ ತೀವ್ರ ಗಾಯ

ನೊಯ್ಡಾ: ಉತ್ತರ ಪ್ರದೇಶದ ಗ್ರೇಟರ್​ ನೊಯ್ಡಾ ಬಳಿ ಅಪಘಾತದಲ್ಲಿ ನೌಕಾಪಡೆ ಅಧಿಕಾರಿಯೋರ್ವರು ಮೃತಪಟ್ಟಿದ್ದು, ಮತ್ತಿಬ್ಬರು ಸಿಬ್ಬಂದಿ ತೀವ್ರವಾಗಿ ಗಾಯಗೊಂಡು, ಆಸ್ಪತ್ರೆಗೆ ದಾಖಲಾಗಿದ್ದಾರೆ.

ಮೂವರೂ 35 ವರ್ಷದ ಆಸುಪಾಸಿನವರಾಗಿದ್ದು, ಕಾರಿನಲ್ಲಿ ದೆಹಲಿಯಿಂದ ಅಲಹಾಬಾದ್​ಗೆ ತೆರಳುತ್ತಿದ್ದರು. ಯಮುನಾ ಎಕ್ಸ್​ಪ್ರೆಸ್​ವೇ ಹೆದ್ದಾರಿಯಲ್ಲಿ ಅವರ ವಾಹನ ಅಪಘಾತಕ್ಕೀಡಾಗಿದೆ. ಬುಧವಾರ ಮುಂಜಾನೆ ಸುಮಾರು 3.25ಗಂಟೆಯಲ್ಲಿ ಅಪಘಾತ ಸಂಭವಿಸಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮೃತಪಟ್ಟ ನೇವಿ ಅಧಿಕಾರಿಯನ್ನು ಸತೀಶ್​ ಚಂದ್​​ ಗಂಗ್ವಾರ್​ ಎಂದು ಗುರುತಿಸಲಾಗಿದೆ. ಕುಲದೀಪ್​ ದಾಸ್​ ಮತ್ತು ಧನಂಜಯ್​ ದಾಸ್​ ಎಂಬುವರು ತೀವ್ರವಾಗಿ ಗಾಯಗೊಂಡಿದ್ದಾರೆ ಎಂದು ಸ್ಥಳೀಯ ಪೊಲೀಸರು ಮಾಹಿತಿ ನೀಡಿದ್ದಾರೆ. ಆದರೆ ಇವರ ಕಾರಿಗೆ ಡಿಕ್ಕಿಯಾದ ವಾಹನ ಯಾವುದು ಎಂಬುದು ಇನ್ನೂ ಗೊತ್ತಾಗಲಿಲ್ಲ ಎಂದಿದ್ದಾರೆ.

ಈ ಮೂವರೂ ಅಲಹಾಬಾದ್​ನ ನಿವಾಸಿಗಳು ಎಂದು ತಿಳಿದುಬಂದಿದೆ. (ಏಜೆನ್ಸೀಸ್​)

https://www.vijayavani.net/paid-to-join-congress-sachin-pilot-camp-hits-back-at-ashok-gehlot/