ಆಯುರ್ವೆದ ಈ ಋತುವಿನಲ್ಲಿ ಸ್ವಲ್ಪ ಹೆಚ್ಚಿನ ಪ್ರಮಾಣದಲ್ಲಿ ಕೊಬ್ಬನ್ನು ಸೇವಿಸಲು ಹೇಳುತ್ತದೆ. ಹೆಚ್ಚಿನ ಪ್ರಮಾಣದಲ್ಲಿ ಕೊಬ್ಬನ್ನು ಸೇವಿಸಿದಾಗ ಸಹಜವಾಗಿ ಚರ್ಮದ ಒಣಗುವಿಕೆ ಕಡಿಮೆಯಾಗುತ್ತದೆ. ಮನೆಯಲ್ಲಿ ತಯಾರಿಸಿದ ತುಪ್ಪ, ಗಾಣದಿಂದ ತೆಗೆದ ಎಳ್ಳೆಣ್ಣೆ, ಕೊಬ್ಬರಿ ಎಣ್ಣೆಯಂತಹ ಎಣ್ಣೆಗಳು, ಒಣ ಹಣ್ಣುಗಳು, ಬಾದಾಮಿ, ಶೇಂಗಾ, ಗೋಡಂಬಿಯಂತಹ ನಟ್ಗಳು ಒಳ್ಳೆಯ ಕೊಬ್ಬಿಗೆ ಉದಾಹರಣೆಗಳು. ಬೇರೆ ಕಾಲಗಳಿಗಿಂತ ಸ್ವಲ್ಪ ಹೆಚ್ಚಿನ ಪ್ರಮಾಣದಲ್ಲಿ ಚಳಿಗಾಲದಲ್ಲಿ ನಾವು ನೀರನ್ನು ಸೇವಿಸಬೇಕು. ಅಥವಾ ಬೂದುಗುಂಬಳದ ಜ್ಯೂಸ್, ಯಾವುದಾದರೂ ಸೊಪ್ಪಿನ ಅಥವಾ ಹಣ್ಣಿನ ಜ್ಯೂಸ್ಗಳನ್ನು ಕೂಡ ಸೇವಿಸಬಹುದು. ಲಭ್ಯವಿದ್ದರೆ ತಾಜಾ ಗರಿಕೆ ಹುಲ್ಲನ್ನು ತಂದು ಸ್ವಲ್ಪ ನೀರು ಹಾಕಿ ರುಬ್ಬಿ ಸೋಸಿ ಸೇವಿಸುವುದು ಒಳ್ಳೆಯದು. ಇದರಿಂದ ಚರ್ಮದ ಸೌಂದರ್ಯ ವೃದ್ಧಿಯಾಗಲು ಸಹಾಯವಾಗುತ್ತದೆ.
