ಪತ್ನಿಗೆ ಗರ್ಭಪಾತ; ದೇವರು ಕೋಪಗೊಂಡಿದ್ದಾನೆ ಎಂದು ನೆರೆ ಮನೆಯ ಇಬ್ಬರನ್ನು ಪೂಜೆಗೆ ಕರೆಸಿ ಶಿರಚ್ಚೇದನ ಮಾಡಿದ ಪತಿ: ವಾಮಾಚಾರ ಶಂಕೆ | behead

ಭೋಪಾಲ್: ಮಧ್ಯಪ್ರದೇಶದ ಸಿಂಗ್ರೌಲಿ ಜಿಲ್ಲೆಯಲ್ಲಿ ಗುರುವಾರ(ಫೆ. 12) ಹೆಂಡತಿ ಗರ್ಭಪಾತಕ್ಕೆ ದೇವರು ಕೋಪಗೊಂಡಿರುವುದು ಕಾರಣ ಎಂದು ವಿಶೇಷ ಪೂಜೆ ಆಯೋಜಿಸಿ ನೆರೆ ಮನೆಯ ಇಬ್ಬರನ್ನು ಕರೆದು, ಅವರ ಶಿರಚ್ಚೇದನ ಮಾಡಿ ಬಲಿಕೊಟ್ಟ(behead) ಆರೋಪ ಕೇಳಿ ಬಂದಿದೆ. ಮತ್ತು ಅದನ್ನು ತಡೆಯಲು ಬಂದ ಮತ್ತಿಬ್ಬರ ಮೇಲೆ ಹಲ್ಲೆ ಮಾಡಲಾಗಿದೆ ಎನ್ನಲಾಗಿದೆ.

ಸಿಂಗ್ರೌಲಿ ಜಿಲ್ಲೆಯ ಅತರ್ವಾ ಗ್ರಾಮದಲ್ಲಿ ನಿನ್ನೆ(ಫೆ.12) ಬೆಳಗಿನ ಜಾವ 4 ರಿಂದ 5 ಗಂಟೆಯ ನಡುವೆ ಈ ಘಟನೆ ನಡೆದಿದೆ. ಬಲಿಯಾದವರು ನೆರೆ ಮನೆಯ ಫೂಲ್ ಕುಮಾರಿ ಸಿಂಗ್ (50) ಮತ್ತು ಕೆಮ್ಲಾ ಸಿಂಗ್ (65) ಎಂದು ಗುರುತಿಸಲಾಗಿದೆ. ಆರೋಪಿ 21 ವರ್ಷದ ಛತ್ರಪತಿ ಸಿಂಗ್ ಮನೆಗೆ ಪೂಜೆಗೆ ಆಹ್ವಾನಿಸಿ ಕೊಲೆ ಮಾಡಿದ್ದು, ಕಿರುಚಾಟ ಕೇಳಿ ಬಂದ ಸುಮಿತ್ರಾ ಸಿಂಗ್ ಮತ್ತು ರಾಮ್ಭಜನ್ ಸಿಂಗ್ ಎಂಬುವರ ಮೇಲೂ ಹಲ್ಲೆ ಮಾಡಿದ್ದಾನೆ ಎಂದು ಆರೋಪಿಸಲಾಗಿದೆ.

ಪ್ರಾಥಮಿಕ ಮಾಹಿತಿ ಪ್ರಕಾರ, ಈ ಹತ್ಯೆ ವಾಚಾಚಾರಕ್ಕೆ ಸಂಬಂಧವಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ. ಇತ್ತೀಚಿಗೆ ಆರೋಪಿ ಛತ್ರಪತಿ ಸಿಂಗ್ ಪತ್ನಿಗೆ ಗರ್ಭಪಾತವಾಗಿತ್ತು. ದೇವರು ಕೋಪಗೊಂಡಿದ್ದರಿಂದ ಈ ರೀತಿಯಾಗಿದೆ. ಅದಕ್ಕೆ ಸಮಾಧಾನ ಮಾಡಲು ಧಾರ್ಮಿಕ ಬಲಿದಾನ ನೀಡಬೇಕು ಎಂದು ಕೊಂಡಿದ್ದನು ಎನ್ನಲಾಗಿದೆ.

ಘಟನೆ ನಡೆಯವ ಕೆಲವು ದಿನಗಳ ಮೊದಲು ಆರೋಪಿ ತನ್ನ ಮನೆಯ ಮುಂದೆ ಮಣ್ಣಿನ ವೇದಿಕೆ ನಿರ್ಮಿಸಿದ ವಿಶೇಷ ಪೂಜೆ ನಡೆಸಿದ್ದನು ಎನ್ನಲಾಗಿದೆ. ಮತ್ತು ಗುರುವಾರ ಬೆಳಗ್ಗೆ ವಿಶೇಷ ಪೂಜೆ ಇದೆ ಬನ್ನಿ ಎಂದು ನೆರೆಹೊರೆಯವರಿಗೆ ಹೇಳಿದ್ದಾನೆ. ಅದರಂತೆ ಮೃತರಾದ ಇಬ್ಬರು ಬೆಳಗಿನ ಜಾವ ಪೂಜೆಗೆ ಆಗಮಿಸಿದಾಗ ಅವರ ಮೇಲೆ ಹಲ್ಲೆ ಮಾಡಿದ್ದಾನೆ ಎಂದು ಪೊಲೀಸರು ಕಂಡುಕೊಂಡಿದ್ದಾರೆ.

ಈ ಕುರಿತು ಮಾತನಾಡಿರುವ ಉಪವಿಭಾಗೀಯ ಪೊಲೀಸ್ ಅಧಿಕಾರಿ ಗಾಯತ್ರಿ ತಿವಾರಿ, ಕರಣದಲ್ಲಿ ವಾಮಾಚಾರದ ಶಂಕೆ ಇದೆ. ಘಟನೆ ನಡೆದ ಸ್ಥಳದಲ್ಲಿ ತೆಂಗಿನಕಾಯಿ ಸೇರಿದಂತೆ ಧಾರ್ಮಿಕ ಸಾಮಗ್ರಿಗಳನ್ನು ವಶಪಡಿಸಿಕೊಳ್ಳಲಾಗಿದೆ. ನಮ್ಮ ವಿಧಿವಿಜ್ಞಾನ ತಂಡ ಸ್ಥಳದಲ್ಲೇ ಸಾಕ್ಷ್ಯಗಳನ್ನು ಪರಿಶೀಲಿಸುತ್ತಿದೆ. ಮೃತದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದು ತಿಳಿಸಿದ್ದಾರೆ.

ಆರೋಪಿ ಮತ್ತು ಬಲಿಪಶುಗಳು ಒಂದೇ ಸಮುದಾಯಕ್ಕೆ ಸೇರಿದವರಾಗಿದ್ದಾರೆ. ದೂರದ ಸಂಬಂಧಿಗಳು ಎನ್ನಲಾಗಿದೆ. ಈಗಾಗಲೇ ಆರೋಪಿಯನ್ನು ಬಂಧಿಸಲಾಗಿದ್ದು ವಿಚಾರಣೆ ನಡೆಯುತ್ತಿದೆ ಎಂದು ಹೇಳಿದ್ದಾರೆ (ಏಜೆನ್ಸೀಸ್).