ಏನಿದು 'ಸಂಚಾರ್​ ಸಾಥಿ​'? ಪ್ರತಿಯೊಬ್ಬರ ಫೋನ್​ನಲ್ಲಿ ಈ ಆ್ಯಪ್​ ಬಳಕೆಯ ಉದ್ದೇಶವೇನು? ಇಲ್ಲಿದೆ ಪೂರ್ಣ ವಿವರ

ನವದೆಹಲಿ: ದೇಶದ ಎಲ್ಲ ಮೊಬೈಲ್ ಫೋನ್ ತಯಾರಕರು ಟೆಲಿಕಾಂ ಇಲಾಖೆ ಅಭಿವೃದ್ಧಿಪಡಿಸಿದ ಸೈಬರ್ ಸೆಕ್ಯುರಿಟಿ ಅಪ್ಲಿಕೇಶನ್ ಆದ 'ಸಂಚಾರ್ ಸಾಥಿ'ಯನ್ನು ಇನ್​​ಬಿಲ್ಟ್​ ಆಗಿ ಸ್ಥಾಪಿಸಲು ಕೇಂದ್ರ ಸರ್ಕಾರ ಈಗಾಗಲೇ ಆದೇಶ ಹೊರಡಿಸಿದೆ.

ಕಳೆದ ವರ್ಷ, ಈ ನಿರ್ದೇಶನವನ್ನು 90 ದಿನಗಳಲ್ಲಿ ಜಾರಿಗೆ ತರಬೇಕು ಮತ್ತು 120 ದಿನಗಳಲ್ಲಿ ಇಲಾಖೆಗೆ ವರದಿಯನ್ನು ಸಲ್ಲಿಸಬೇಕು ಎಂದು ಕೇಂದ್ರ ಸ್ಪಷ್ಟಪಡಿಸಿತು. ನಕಲಿ ಹ್ಯಾಂಡ್‌ಸೆಟ್‌ಗಳು, ಒಂದೇ IMEI ಸಂಖ್ಯೆ ಬಳಸಿ ಹಲವು ಸ್ಮಾರ್ಟ್ಫೋನ್‌ಗಳ ಉಪಯೋಗ, ನಕಲಿ ಸಿಮ್ ಕಾರ್ಡ್‌ಗಳು, ಸಂಪರ್ಕಗಳನ್ನು ತಡೆಗಟ್ಟಲು ಈ ಆ್ಯಪ್​ ಅನ್ನು ವಿಶೇಷವಾಗಿ ಡಿಸೈನ್​ ಮಾಡಲಾಗಿದೆ ಎಂಬುದು ಗಮನಾರ್ಹ.

ಈ ಆ್ಯಪ್​ ಬಳಕೆದಾರರಿಗೆ ಸ್ನೇಹಿಯಾಗಿರಬೇಕು. ಪ್ರಸ್ತುತ ಮಾರಾಟದಲ್ಲಿರುವ ಮಾದರಿಗಳಲ್ಲಿ ಸಾಫ್ಟ್‌ವೇರ್ ಅಪ್ಡೇಟ್​ಗಳ ಮೂಲಕ ಆ್ಯಪ್​ ಅನ್ನು ರನ್​ ಮಾಡಬೇಕು. ಭಾರತದಲ್ಲಿ ಮೊದಲ ಬಾರಿಗೆ ಪೂರ್ವ ಸ್ಥಾಪಿತ ಅಪ್ಲಿಕೇಶನ್ ಅನ್ನು ಕಡ್ಡಾಯಗೊಳಿಸುವುದರ ಬಗ್ಗೆ ಕಾಂಗ್ರೆಸ್​ನಿಂದ ಟೀಕೆಗಳು ವ್ಯಕ್ತವಾಗಿವೆ. ಸರ್ಕಾರವು ಸಂಚಾರ್ ಸಾಥಿ ಮೂಲಕ ಗ್ರಾಹಕರ ಫೋನ್ ಅನ್ನು ಟ್ರ್ಯಾಕ್ ಮಾಡಬಹುದಾಗಿದೆ ಎಂಬುದು ಕಾಂಗ್ರೆಸ್​ನ ಆರೋಪ.

ಕಳೆದ ವರ್ಷ ನ.28ರಂದು ಹೊರಡಿಸಲಾದ ಆದೇಶದ ಪ್ರಕಾರ, ಯಾವುದೇ ಹೊಸ ಹ್ಯಾಂಡ್‌ಸೆಟ್‌ನ ಆರಂಭಿಕ ಸೆಟಪ್ ಸಮಯದಲ್ಲಿ ಸಂಚಾರಿ ಸಾಥಿ ಆ್ಯಪ್​ ಇನ್​ಸ್ಟಾಲ್​ ಆಗಿರಬೇಕು ಮತ್ತು ಬಳಸಲು ಸುಲಭವಾಗಿರಬೇಕು ಎಂದು ತಿಳಿಸಲಾಗಿದೆ. ತಯಾರಕರು ಅದರ ಯಾವುದೇ ವೈಶಿಷ್ಟ್ಯಗಳನ್ನು ಮರೆಮಾಡಲು, ನಿಷ್ಕ್ರಿಯಗೊಳಿಸಲು ಅಥವಾ ನಿರ್ಬಂಧಿಸಲು ಅನುಮತಿ ಇಲ್ಲ. ಕಂಪನಿಗಳು ಆದೇಶವನ್ನು ಫಾಲೋ ಮಾಡಲು 90 ದಿನಗಳು ಮತ್ತು ಅನುಸರಣೆಯ ವರದಿಯನ್ನು ಸಲ್ಲಿಸಲು 120 ದಿನಗಳು ಮಾತ್ರ ಉಳಿದಿವೆ ಎಂದು ತಿಳಿಸಿತು.

ಸಂಚಾರ್ ಸಾಥಿ ಎಂಬುದು ಸೈಬರ್ ವಂಚನೆಯನ್ನು ಎದುರಿಸಲು ಮತ್ತು ದೂರಸಂಪರ್ಕ ಭದ್ರತೆಯನ್ನು ಬಲಪಡಿಸುವ ಉದ್ದೇಶದಿಂದ ರಚಿಸಲಾದ ಅಪ್ಲಿಕೇಶನ್​. ಪೋರ್ಟಲ್ ಮತ್ತು ಆ್ಯಪ್​ ಮೂಲಕ ಬಳಕೆದಾರರು ಇದರ ಸದುಪಯೋಗವನ್ನು ಪಡೆದುಕೊಳ್ಳಬಹುದಾಗಿದೆ.

1. ಮೊಬೈಲ್​ನ IMEI ಸಂಖ್ಯೆ ಬಳಸಿಕೊಂಡು ನೀವು ಬಳುಸುತ್ತಿರುವ ಫೋನ್​ ಅಸಲಿಯೇ ಎಂಬುದನ್ನು ಪರಿಶೀಲಿಸಬಹುದು

2. ಫೇಕ್​ ಕಾಲ್ಸ್ ಅಥವಾ ಸಂದೇಶಗಳು ಎಂದು ನಿಮಗೆ ಅನಿಸಿದ್ರೆ, ಅವುಗಳನ್ನು ತಕ್ಷಣವೇ ರಿಪೋರ್ಟ್​ ಮಾಡಬಹುದು

3. ಕಳೆದುಹೋದ ಅಥವಾ ಕದ್ದ ಫೋನ್‌ಗಳ ಬಗ್ಗೆ ಆ್ಯಪ್​ನಲ್ಲಿ ರಿಪೋರ್ಟ್​ ಮಾಡಬಹುದು

4. ಫೋನ್​ ಯಾರ ಹೆಸರಿನಲ್ಲಿದೆ ಎಂಬ ಸಂಪೂರ್ಣ ವಿವರ ಹಾಗೂ ಸಂಪರ್ಕಗಳನ್ನು ಟ್ರಾಕ್​ ಮಾಡಬಹುದು,(ಏಜೆನ್ಸೀಸ್).