ಚಿತ್ರಮಂದಿರ ಉಳಿಸಲು ಇದೊಂದೇ ಮಾರ್ಗ? ಪ್ರೇಕ್ಷಕರನ್ನು ಕರೆತರಲು ಟಾಲಿವುಡ್ ಹೊಸ ಪ್ಲ್ಯಾನ್​​ | Tollywood

ಹೈದರಾಬಾದ್​: ಸಂಕ್ರಾಂತಿ ಹಬ್ಬಕ್ಕೆ ಹಲವು ರಜೆಗಳಿದ್ದ ಹಿನ್ನೆಲೆ ಸ್ಟಾರ್​ ನಟರ ಸಿನಿಮಾ ಸೇರಿದಂತೆ ಹೊಸಬರ ಚಿತ್ರಗಳು ಚಿತ್ರಮಂದಿರ ಮತ್ತು ಮಲ್ಟಿಪ್ಲೆಕ್ಸ್​ಗಳಿಗೆ ಎಂಟ್ರಿಕೊಟ್ಟಿತು. ಒಂದಷ್ಟು ಪ್ರೇಕ್ಷಕರ ಗಮನ ಸೆಳೆದರೆ, ಇನ್ನೂ ಕೆಲವು ಫ್ಲಾಪ್​ ಸಾಲಿಗೆ ಸೇರಿತು. ಈ ಮಧ್ಯೆ, ಫೆಬ್ರವರಿಗೆ ಕಾಲಿಟ್ಟಿರುವ ಚಿತ್ರೋದ್ಯಮಗಳು, ಹೆಚ್ಚು ರಜೆಗಳಿಲ್ಲದ ತಿಂಗಳಲ್ಲಿ ಯಾವ ಸಿನಿಮಾಗಳನ್ನು ತೆರೆಗೆ ತರುವುದು ಎಂಬ ಲೆಕ್ಕಾಚಾರಗಳನ್ನು ಹಾಕಿಕೊಂಡಿದೆ. ಇದೆಲ್ಲದಕ್ಕಿಂತ ಹೆಚ್ಚಾಗಿ, ಖಾಲಿ ಹೊಡೆಯುತ್ತಿರುವ ಚಿತ್ರಮಂದಿರಗಳಿಗೆ ಜನರನ್ನು ಕರೆತರುವುದಾದರೂ ಹೇಗೆ? ಎಂದು ಗೊಂದಲದಲ್ಲಿದೆ.

ಸ್ಟಾರ್​ ನಟರ ಸಿನಿಮಾಗಳಿಗೆ ಕಾಯುತ್ತ ಕೂರಲು ಇಚ್ಛಿಸದ ತೆಲುಗು ಚಿತ್ರರಂಗ, ಹಳೆಯ ಸೂಪರ್​ಹಿಟ್​ ಸಿನಿಮಾಗಳನ್ನು ಮತ್ತೊಮ್ಮೆ ತೆರೆಗೆ ತರುವ ಮೂಲಕ ಚಿತ್ರಮಂದಿರಗಳನ್ನು ಉಳಿಸಲು ಹಾಗೂ ಪ್ರೇಕ್ಷಕರನ್ನು ಹೆಚ್ಚಿನ ಸಂಖ್ಯೆಯಲ್ಲಿ ಕರೆತರಲು ಸಜ್ಜಾಗಿದೆ. ಆಂಧ್ರಪ್ರದೇಶ ಮತ್ತು ತೆಲಂಗಾಣ ಚಿತ್ರಮಂದಿರಗಳು ಹಳೆಯ ಸಿನಿಮಾಗಳನ್ನು ಪ್ರದರ್ಶಿಸಲು ಈಗಾಗಲೇ ಚಿತ್ರಗಳ ಪಟ್ಟಿಯನ್ನು ಕೂಡ ರೆಡಿ ಮಾಡಿಕೊಂಡಿದೆ.

ಫೆ.6ರಂದು ‘3’, ಫೆ. 7ರಂದು 4K ರೀ-ಮಾಸ್ಟರಿಂಗ್​ನಲ್ಲಿ ‘ಆರೆಂಜ್’, ಮತ್ತು ವ್ಯಾಲೆಂಟೈನ್ಸ್ ವಾರಕ್ಕೆ ‘ಲವ್ ಸ್ಟೋರಿ’, ‘ಮನಸಂತ ನುವ್ವೆ’ ಮತ್ತು ‘ಯೇ ಮಾಯಾ ಚೆಸಾವೆ’ ಚಿತ್ರಗಳಂತ ಬ್ಲಾಕ್​ಬಸ್ಟರ್​ಗಳನ್ನು ಮರುಬಿಡುಗಡೆ ಮಾಡಲು ಟಾಲಿವುಡ್​ ನಿರ್ಧರಿಸಿದೆ. ಇದರೊಟ್ಟಿಗೆ, ಹಾರರ್​-ಕಾಮಿಡಿ ಸೂಪರ್​ಹಿಟ್​ 'ಕಾಂಚನಾ' ಚಿತ್ರವನ್ನು ಮಾರ್ಚ್‌ನಲ್ಲಿ ತೆರೆಗೆ ತರಲು ಮುಂದಾಗಿದೆ. ಈ ಮೂಲಕ ಫೆಬ್ರವರಿಯಲ್ಲಿ ಹೊಸ ಸಿನಿಮಾಗಳಿಗಿಂತ ಹಳೆ​ ಚಿತ್ರಗಳ ರೀ-ರಿಲೀಸ್ ಟ್ರೆಂಡ್​ ಹೆಚ್ಚಾಗಿದೆ.

ಈ ಸಮಸ್ಯೆ ಕೇವಲ ಒಂದು ಚಿತ್ರರಂಗಕ್ಕೆ ಮಾತ್ರವಲ್ಲ. ಬದಲಿಗೆ ಹಲವು ಚಿತ್ರಮಂದಿರಗಳ ಸಮಸ್ಯೆಯಾಗಿದೆ. ಒಟಿಟಿ ಬಂದಿರುವ ಹಿನ್ನೆಲೆ ಇಂದು ಥಿಯೇಟರ್​ಗೆ ಬಂದು ಸಿನಿಮಾಗಳನ್ನು ನೋಡುವ ಪ್ರವೃತ್ತಿ ಕುಂಠಿತವಾಗಿದೆ. ಇದು ಆಯಾ ಚಿತ್ರಮಂದಿರಗಳ ಮಾಲೀಕರಿಗೆ ದೊಡ್ಡ ನಷ್ಟವನ್ನು ಉಂಟು ಮಾಡುತ್ತಿದೆ. ಸ್ಟಾರ್​ ನಟರ ಸಿನಿಮಾಗಳಿದ್ದರೆ ಮಾತ್ರ ಥಿಯೇಟರ್​ಗೆ ಜನರು ಹೆಚ್ಚಿನ ಸಂಖ್ಯೆಯಲ್ಲಿ ಬರ್ತಾರೆ. ಇಲ್ಲ, ಖಾಲಿ ಹೊಡೆಯುತ್ತವೆ. ಇದು ದೊಡ್ಡ ಮಟ್ಟದ ನಷ್ಟ ತಂದೊಡ್ಡುತ್ತಿದೆ ಮತ್ತು ಚಿತ್ರಮಂದಿರಗಳನ್ನು ಅಳಿವಿನಂಚಿಗೆ ನೂಕುತ್ತಿರುವುದು ದುರಂತವೇ ಸರಿ.

ಈ ರೀ-ರಿಲೀಸ್​ ಸಿನಿಮಾಗಳು ಚಿತ್ರಮಂದಿರಗಳ ಮಾಲೀಕರಿಗೆ ದೊಡ್ಡ ಮಟ್ಟದ ಸುಧಾರಣೆ ನೀಡಲಿದೆ ಎಂಬುದು ಲೆಕ್ಕಾಚಾರ. ಹೊಸ ಸಿನಿಮಾಗಳನ್ನು ನೋಡಲು ಬಾರದ ಪ್ರೇಕ್ಷಕರು, ರೀ-ರಿಲೀಸ್​ ಚಿತ್ರಗಳನ್ನು ವೀಕ್ಷಿಸಲು ಬರುತ್ತಾರೆ ಎಂಬ ಭರವಸೆ ಸದ್ಯ ಟಾಲಿವುಡ್​ನಲ್ಲಿ ಮೂಡಿದೆ,(ಏಜೆನ್ಸೀಸ್).