ನಾಮಪತ್ರದಲ್ಲಿ ಸಹಿಯೂ ಇಲ್ಲ, ಅಭ್ಯರ್ಥಿಯೂ ನಾಪತ್ತೆ!.. ಚುನಾವಣೆಗೂ ಮುನ್ನ ವಿಜಯ್​ಗೆ ಅತಿದೊಡ್ಡ ಹಿನ್ನಡೆ | Edappadi TVK Candidate

ಆಯೋಗದ ನಿಯಮಗಳ ಪ್ರಕಾರ, ಪ್ರತಿಯೊಂದು ನಾಮಪತ್ರಕ್ಕೆ ಕನಿಷ್ಠ 10 ಸೂಚಕರ (Proposers) ಬೆಂಬಲದ ಸಹಿ ಇರಬೇಕು. ಆದರೆ, ಟಿವಿಕೆ ಅಭ್ಯರ್ಥಿ ಅರುಣ್‌ಕುಮಾರ್ ಎಂ. ಸಲ್ಲಿಸಿದ ಪತ್ರಗಳಲ್ಲಿ ಕೇವಲ ಎಂಟು ಸಹಿಗಳಿದ್ದವು. ಇತ್ತ ಪರ್ಯಾಯ ಅಭ್ಯರ್ಥಿ ನಿತ್ಯಾರ ಪತ್ರದಲ್ಲಿ ಏಳು ಸಹಿಗಳಿದ್ದವು ಎನ್ನುವ ಕಾರಣಕ್ಕೆ ಇವರ ನಾಮಪತ್ರವೂ ತಿರಸ್ಕೃತಗೊಂಡಿದೆ. ಇದರಿಂದಾಗಿ ಎಐಎಡಿಎಂಕೆ ಮುಖ್ಯಸ್ಥ ಎಡಪ್ಪಾಡಿ ಕೆ. ಪಳನಿಸ್ವಾಮಿ ಭದ್ರಕೋಟೆಯಲ್ಲಿ ವಿಜಯ್ ಪಕ್ಷಕ್ಕೆ ಅಭ್ಯರ್ಥಿಯೇ ಇಲ್ಲದಂತಾಗಿದೆ.

ಈ ರಾಜಕೀಯ ಬೆಳವಣಿಗೆಯ ನಡುವೆ ಪ್ರಕರಣವು ಮತ್ತೊಂದು ಗಂಭೀರ ತಿರುವು ಪಡೆದುಕೊಂಡಿದ್ದು, ನಾಮಪತ್ರ ತಿರಸ್ಕೃತಗೊಂಡ ಬೆನ್ನಲ್ಲೇ ಟಿವಿಕೆ ಅಭ್ಯರ್ಥಿ ಅರುಣ್‌ಕುಮಾರ್ ನಾಪತ್ತೆಯಾಗಿದ್ದಾರೆ ಎಂದು ವರದಿಯಾಗಿದ್ದು, ನಾಮಪತ್ರಗಳ ಪರಿಶೀಲನೆಯ ಸಮಯದಲ್ಲೂ ಅವರು ಗೈರುಹಾಜರಾಗಿರುವುದು ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ.

ತಮ್ಮ ಅಭ್ಯರ್ಥಿಯನ್ನು ಅಪಹರಿಸಿರಬಹುದು ಎಂದು ವಿಜಯ್ ಬೆಂಬಲಿಗರು ಮತ್ತು ಪಕ್ಷದ ಕಾರ್ಯಕರ್ತರು ಗಂಭೀರ ಆರೋಪ ಮಾಡುತ್ತಿದ್ದು, ಈ ಬೆಳವಣಿಗೆಯ ವಿರುದ್ಧ ದೊಡ್ಡ ಮಟ್ಟದ ಪ್ರತಿಭಟನೆ ನಡೆಸುತ್ತಿದ್ದಾರೆ. ಇದು ಪಕ್ಷದ ಒಳಗೆ ಬೇರೆಯದ್ದೇ ರೀತಿಯ ಬಿಕ್ಕಟ್ಟಿನ ವಾತಾವರಣ ನಿರ್ಮಿಸಿದೆ. ಚುನಾವಣಾ ಆಯೋಗವು ಅಭ್ಯರ್ಥಿ ನಾಪತ್ತೆಯಾದ ವಿಷಯದ ಕುರಿತು ಈವರೆಗೆ ಯಾವುದೇ ಔಪಚಾರಿಕ ಹೇಳಿಕೆ ನೀಡಿಲ್ಲ.

ಇತ್ತ ವಿಪಕ್ಷ ನಾಯಕ ಎಡಪ್ಪಾಡಿ ಕೆ. ಪಳನಿಸ್ವಾಮಿ ತಮ್ಮ ಸ್ವಕ್ಷೇತ್ರದಿಂದ ಆರನೇ ಬಾರಿಗೆ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದು, ಆಡಳಿತಾರೂಢ ಡಿಎಂಕೆ ಪರವಾಗಿ ಸಿ. ಕಾಸಿ ಕಣದಲ್ಲಿದ್ದಾರೆ. ಈ ಎರಡೂ ನಾಮಪತ್ರಗಳು ಕ್ರಮಬದ್ಧವಾಗಿದ್ದು ಅಂಗೀಕರಿಸಲ್ಪಟ್ಟಿದ್ದು, ದಳಪತಿ ವಿಜಯ್ ತಮ್ಮ ಚೊಚ್ಚಲ ಚುನಾವಣಾ ಹೋರಾಟದಲ್ಲೇ ಪ್ರಬಲ ಎದುರಾಳಿ ಪಳನಿಸ್ವಾಮಿ ವಿರುದ್ಧ ಅಭ್ಯರ್ಥಿಯನ್ನು ಕಣಕ್ಕಿಳಿಸಿ ಸೆಡ್ಡು ಹೊಡೆಯಲು ಯೋಜಿಸಿದ್ದರು. ಆದರೆ ತಾಂತ್ರಿಕ ಕಾರಣ ಮತ್ತು ಅಭ್ಯರ್ಥಿಯ ನಾಪತ್ತೆಯಿಂದಾಗಿ ಟಿವಿಕೆಗೆ ಈ ಕ್ಷೇತ್ರದಲ್ಲಿ ಮುಖಭಂಗ ಉಂಟಾಗಿದೆ.

ತಮಿಳುನಾಡು ವಿಧಾನಸಭೆಯ 234 ಸ್ಥಾನಗಳಿಗೆ ಏಪ್ರಿಲ್ 23 ರಂದು ಮತದಾನ ನಡೆಯಲಿದ್ದು, ಮೇ 4 ರಂದು ಫಲಿತಾಂಶ ಪ್ರಕಟವಾಗಲಿದೆ. ರಾಜ್ಯಾದ್ಯಂತ ಚುನಾವಣಾ ಕಾವು ಏರುತ್ತಿರುವ ಸಂದರ್ಭದಲ್ಲಿಯೇ, ವಿಜಯ್ ಪಕ್ಷದ ಅಭ್ಯರ್ಥಿ ನಾಪತ್ತೆಯಾಗಿರುವುದು ಮತ್ತು ನಾಮಪತ್ರ ರದ್ದಾಗಿರುವುದು ತಮಿಳುನಾಡು ರಾಜಕೀಯದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಅರುಣ್‌ಕುಮಾರ್ ಕಣ್ಮರೆಯಾಗಿರುವ ಪ್ರಕರಣ ರಾಜಕೀಯ ಪಿತೂರಿಯ ಭಾಗವೇ ಎಂಬ ಆತಂಕ ಪಕ್ಷದ ವಲಯದಲ್ಲಿ ಮನೆಮಾಡಿದೆ(ಏಜೆನ್ಸೀಸ್​).