ಈ ಸಂದರ್ಭದಲ್ಲಿ ಇಬ್ಬರ ನಡುವೆ ನಡೆದ ಸಂಭಾಷಣೆ ಅತ್ಯಂತ ಅದ್ಭುತವಾಗಿತ್ತು. ಕ್ಯಾಪ್ಟನ್ ಮಚ್ಚಾರ್ ಅವರ ಎಡಗೈಗೆ ಸ್ಲಿಂಗ್ ಹಾಕಿರೋದನ್ನು ಗಮನಿಸಿದ ಯುಎಇ ಅಧ್ಯಕ್ಷರು, ನೀವು ಯಾವಾಗ ಗುಣಮುಖರಾಗುತ್ತೀರಿ..? ಎಂದು ಪ್ರಶ್ನಿಸಿದರು. ಅದಕ್ಕೆ ಪೈಲಟ್, ಬಹುಶಃ ಎರಡು ತಿಂಗಳು ಬೇಕಾಗಬಹುದು ಎಂದರು. ತಕ್ಷಣ ನಗುತ್ತಲೇ ಅಧ್ಯಕ್ಷರು, ಹಾಗಾದರೆ ನಾನೊಂದು ಐಡಿಯಾ ಮಾಡುತ್ತೇನೆ. ನೀವು ಸಂಪೂರ್ಣ ಗುಣಮುಖರಾದ ಬಳಿಕ, ನಿಮಗೆ ಹೋರಾಟ (ಫೈಟಿಂಗ್) ಮಾಡುವುದು ಹೇಗೆ ಎಂದು ತರಬೇತಿ ನೀಡಲು ನಾನೊಂದು ಸೆಷನ್ ಇಟ್ಟುಕೊಳ್ಳುತ್ತೇನೆ ಎಂದು ಹಾಸ್ಯ ಚಟಾಕಿ ಹಾರಿಸಿದರು. ಇದನ್ನು ಕೇಳಿ ಇಬ್ಬರೂ ಒಟ್ಟಿಗೆ ಜೋರಾಗಿ ನಕ್ಕರು. ಬಳಿಕ ಕೃತಜ್ಞತೆ ಸಲ್ಲಿಸಿದ ಮಚ್ಚಾರ್, ಇದು ನನಗೆ ಸಿಕ್ಕಿದ ಅತಿ ದೊಡ್ಡ ಗೌರವ ಎಂದು ಕೈಯನ್ನು ಎದೆ ಮೇಲೆ ಇಟ್ಟು ನಮಸ್ಕರಿಸಿದರು.
ಅಲ್ಲದೆ, ಸಮಾರಂಭದಲ್ಲಿ ಮಾತನಾಡಿದ ಯುಎಇ ಅಧ್ಯಕ್ಷರು, ಫ್ಲೈದುಬೈ ಸಿಬ್ಬಂದಿ ಮತ್ತು ಪ್ರಯಾಣಿಕರನ್ನು ತಮ್ಮ ಕುಟುಂಬ ಎಂದು ಸಂಬೋಧಿಸಿ ಯುಎಇಯ ಸಂಪೂರ್ಣ ಬೆಂಬಲವಿರುವುದಾಗಿ ಭರವಸೆ ನೀಡಿದರು. ನಿಮ್ಮ ಜೀವನದಲ್ಲಿ ಏನೇ ಸಂಭವಿಸಿದ್ದರೂ, ಯುಎಇ ನಿಮ್ಮದೇ ದೇಶ, ಇಲ್ಲಿ ನಿಮಗೊಂದು ಮನೆಯಿದೆ, ಕುಟುಂಬವಿದೆ ಎಂದು ಆತ್ಮಸ್ಥೈರ್ಯ ತುಂಬಿದರು.
