ದೇಶ

ನಟಿ ತ್ವಿಶಾ ಶರ್ಮಾ ನಿಗೂಢ ಸಾವು: ಎರಡನೇ ಶವ ಪರೀಕ್ಷೆಗೆ ನ್ಯಾಯಾಲಯ ನಕಾರ; ಪಾಲಕರಿಗೆ ಪೊಲೀಸ್​ ನೋಟಿಸ್​! Twisha Sharma Death

ನಟಿ ತ್ವಿಶಾ ಶರ್ಮಾ ನಿಗೂಢ ಸಾವು ಪ್ರಕರಣ
ನಟಿ ತ್ವಿಶಾ ಶರ್ಮಾ ನಿಗೂಢ ಸಾವು ಪ್ರಕರಣ
Published on: 

ಪ್ರಮುಖ ಮುಖ್ಯಾಂಶಗಳು

  • ನಟಿ ತ್ವಿಶಾ ಶರ್ಮಾ ನಿಗೂಢ ಸಾವು ಪ್ರಕರಣಕ್ಕೆ ಬಿಗ್ ಟ್ವಿಸ್ಟ್!
  • ಮರು ಶವಪರೀಕ್ಷೆಗೆ ಕೋರ್ಟ್ ನಿರಾಕರಣೆ
  • 'ಏಮ್ಸ್‌ನಲ್ಲಿ ಸೌಲಭ್ಯವಿಲ್ಲ, ಶವ ಕೊಳೆಯಬಹುದು' ಎಂದು ಪೋಷಕರಿಗೆ ಪೊಲೀಸರು ತುರ್ತು ನೋಟಿಸ್
ಭೋಪಾಲ್​: ದೇಶಾದ್ಯಂತ ಸಂಚಲನ ಮೂಡಿಸಿರುವ ಮಾಡೆಲ್ ಹಾಗೂ ನಟಿ ತ್ವಿಶಾ ಶರ್ಮಾ ಅವರ ನಿಗೂಢ ಸಾವಿ (Twisha Sharma Death) ನ ಪ್ರಕರಣ ದಿನಕ್ಕೊಂದು ತಿರುವು ಪಡೆಯುತ್ತಿದೆ. ತನಿಖೆಯಲ್ಲಿ ಭಾರಿ ಲೋಪ ನಡೆದಿದೆ ಎಂದು ಆರೋಪಿಸಿ ತ್ವಿಶಾ ಕುಟುಂಬಸ್ಥರು ಎರಡನೇ ಬಾರಿ ಮರಣೋತ್ತರ ಪರೀಕ್ಷೆ (Post-Mortem) ನಡೆಸಲು ಪಟ್ಟು ಹಿಡಿದಿದ್ದಾರೆ.
ಆದರೆ, ಇದಕ್ಕೆ ನ್ಯಾಯಾಲಯ ಸ್ಪಷ್ಟವಾಗಿ ನಿರಾಕರಿಸಿದೆ. ಇದರ ಬೆನ್ನಲ್ಲೇ ಭೋಪಾಲ್ ಪೊಲೀಸರು ನಟಿಯ ತಂದೆಗೆ ಬರೆದಿರುವ ಪತ್ರವೊಂದು ಈಗ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.

ಏಮ್ಸ್‌ನಲ್ಲಿ ಸೌಲಭ್ಯವಿಲ್ಲ, ಶವ ಕೊಳೆಯಬಹುದು!

ಕತಾರಾ ಹಿಲ್ಸ್ ಪೊಲೀಸ್ ಠಾಣೆಯ ಹಿರಿಯ ಅಧಿಕಾರಿಗಳು ತ್ವಿಶಾ ಅವರ ತಂದೆ ನವನಿಧಿ ಶರ್ಮಾ ಅವರಿಗೆ ತುರ್ತು ಪತ್ರವೊಂದನ್ನು ಬರೆದಿದ್ದಾರೆ. ಭೋಪಾಲ್‌ನ ಏಮ್ಸ್ (AIIMS) ಆಸ್ಪತ್ರೆಯ ಶವಾಗಾರದಲ್ಲಿ ತೀವ್ರ ತಾಪಮಾನದ ಕೊರತೆ ಇರುವುದರಿಂದ ನಟಿಯ ದೇಹ ಕೊಳೆಯಲು ಪ್ರಾರಂಭಿಸಬಹುದು, ಆದ್ದರಿಂದ ತಕ್ಷಣವೇ ಶವವನ್ನು ವಶಕ್ಕೆ ತೆಗೆದುಕೊಳ್ಳಿ ಎಂದು ಪೊಲೀಸರು ಎಚ್ಚರಿಸಿದ್ದಾರೆ.
ಏಮ್ಸ್‌ನ ವಿಧಿವಿಜ್ಞಾನ ಮತ್ತು ರೋಗಶಾಸ್ತ್ರ ವಿಭಾಗದ ತಜ್ಞರ ಪ್ರಕಾರ, ಇಷ್ಟು ದಿನಗಳ ಕಾಲ ಶವವನ್ನು ಸುರಕ್ಷಿತವಾಗಿಡಲು ಮೈನಸ್ 80 ಡಿಗ್ರಿ ತಾಪಮಾನದ (-80°C) ಅಲ್ಟ್ರಾ-ಲೋ ಸ್ಟೋರೇಜ್ ಸೌಲಭ್ಯ ಬೇಕು. ಆದರೆ, ಸದ್ಯ ಏಮ್ಸ್‌ನಲ್ಲಿ ಕೇವಲ ಮೈನಸ್ 4 ಡಿಗ್ರಿ (-4°C) ಸೌಲಭ್ಯ ಮಾತ್ರ ಇದೆ. ಹೀಗಾಗಿ ದೇಹದ ಸ್ಥಿತಿ ಹದಗೆಡುವ ಮುನ್ನವೇ ಅಂತ್ಯಸಂಸ್ಕಾರಕ್ಕೆ ಅಥವಾ ಮುಂದಿನ ಪ್ರಕ್ರಿಯೆಗೆ ಒಯ್ಯುವಂತೆ ಪೊಲೀಸರು ಕುಟುಂಬಕ್ಕೆ ತಿಳಿಸಿದ್ದಾರೆ.

ಏನಿದು ಘಟನೆ? ಕುಟುಂಬದ ಅನುಮಾನವೇನು?

ಕಳೆದ ಮೇ 12 ರಂದು ಭೋಪಾಲ್‌ನ ಕತಾರಾ‌ ಹಿಲ್ಸ್‌ನಲ್ಲಿರುವ ತನ್ನ ಪತಿಯ ಮನೆಯಲ್ಲಿ ತ್ವಿಶಾ ಶರ್ಮಾ ಶವವಾಗಿ ಪತ್ತೆಯಾಗಿದ್ದರು. ಮರುದಿನವೇ ಅಂದರೆ ಮೇ 13 ರಂದು ಮೊದಲ ಮರಣೋತ್ತರ ಪರೀಕ್ಷೆ ನಡೆದಿತ್ತು. ಆದರೆ, ಈ ಮೊದಲ ವರದಿಯಲ್ಲಿ ಹಲವು ಅನುಮಾನಾಸ್ಪದ ಅಂಶಗಳು ಹೊರಬಂದಿವೆ.
ವರದಿಯ ಪ್ರಕಾರ, ತ್ವಿಶಾ ಕುತ್ತಿಗೆಯ ಮೇಲೆ ಎರಡು ಗಂಭೀರವಾದ ಗುರುತುಗಳಿದ್ದವು (Ligature Marks). ಅಷ್ಟೇ ಅಲ್ಲದೆ ಅವರ ಕೈಗಳು, ಮುಂಗೈ ಮತ್ತು ಬೆರಳುಗಳ ಮೇಲೆಯೂ ಗಾಯದ ಕಲೆಗಳು ಪತ್ತೆಯಾಗಿದ್ದವು. ಯಾರೋ ಅವರ ಮೇಲೆ ಹಲ್ಲೆ ನಡೆಸಿ ಕೊಂದಿದ್ದಾರೆ ಎಂದು ಕುಟುಂಬಸ್ಥರು ಗಟ್ಟಿಯಾಗಿ ನಂಬಿದ್ದಾರೆ.
ಮೊದಲ ಶವಪರೀಕ್ಷೆಯ ವರದಿಯಲ್ಲಿ ವೈದ್ಯರು ಮತ್ತು ಪೊಲೀಸರು ಕೆಲವು ಮುಖ್ಯ ವಿಚಾರಗಳನ್ನು ಮುಚ್ಚಿಟ್ಟಿದ್ದಾರೆ ಎಂದು ಆರೋಪಿಸಿರುವ ಪೋಷಕರು, ಮತ್ತೊಮ್ಮೆ ಸ್ವತಂತ್ರ ವೈದ್ಯರಿಂದ ಶವಪರೀಕ್ಷೆ ನಡೆಸಬೇಕು ಎಂದು ಹಠ ಹಿಡಿದಿದ್ದಾರೆ.

ಪೊಲೀಸರು ಹೇಳುವುದೇನು?

ಕುಟುಂಬಸ್ಥರು ಎರಡನೇ ಬಾರಿ ಪೋಸ್ಟ್‌ಮಾರ್ಟಂ ಮಾಡಿಸಲು ನಮಗೆ ಯಾವುದೇ ಆಕ್ಷೇಪಣೆ ಇಲ್ಲ. ಕೋರ್ಟ್ ಆದೇಶ ನೀಡಿದರೆ ನಾವು ಅದಕ್ಕೆ ಸಿದ್ಧರಿದ್ದೇವೆ. ಆದರೆ ದೇಹವನ್ನು ಇನ್ನು ದೀರ್ಘಕಾಲ ಇಟ್ಟರೆ ಅದು ಕೊಳೆಯುವ ಸಾಧ್ಯತೆ ಹೆಚ್ಚಿದೆ ಎಂದು ಪೊಲೀಸ್ ಅಧಿಕಾರಿಗಳು ಹೇಳಿದ್ದಾರೆ.
ಇನ್ನೊಂದೆಡೆ, ಈ ಪ್ರಕರಣದ ಕುರಿತು ಮಾತನಾಡಿರುವ ಭೋಪಾಲ್ ಪೊಲೀಸ್ ಆಯುಕ್ತ ಸಂಜಯ್ ಕುಮಾರ್, ಇದುವರೆಗಿನ ಪ್ರಾಥಮಿಕ ತನಿಖೆ ಮತ್ತು ಸಾಕ್ಷ್ಯಗಳು ಇದು ಕೊಲೆಯಲ್ಲ, ಬದಲಿಗೆ ಆತ್ಮಹತ್ಯೆ ಎಂಬುದರ ಕಡೆಗೆ ಬೆರಳು ಮಾಡುತ್ತಿವೆ. ಆದರೂ ಕುಟುಂಬದ ಅನುಮಾನ ಹಾಗೂ ಬೇಡಿಕೆಯನ್ನು ನಾವು ಕೇಸ್ ಡೈರಿಯಲ್ಲಿ ದಾಖಲಿಸಿಕೊಂಡಿದ್ದೇವೆ ಎಂದು ಸ್ಪಷ್ಟಪಡಿಸಿದ್ದಾರೆ.

ನ್ಯಾಯಾಲಯದ ನಿರಾಕರಣೆಯಿಂದ ತಂದೆಗೆ ಆಘಾತ

ತಮ್ಮ ಮಗಳಿಗೆ ನ್ಯಾಯ ಸಿಗಬೇಕು ಎಂದು ಹೋರಾಡುತ್ತಿರುವ ತಂದೆ ನವನಿಧಿ ಶರ್ಮಾ ಅವರಿಗೆ ಕೋರ್ಟ್ ನಡೆ ಆಘಾತ ತಂದಿದೆ. ಎರಡನೇ ಶವಪರೀಕ್ಷೆಗೆ ಕೋರ್ಟ್ ಅನುಮತಿ ನಿರಾಕರಿಸಿದ ಬೆನ್ನಲ್ಲೇ, ಇತ್ತ ಪೊಲೀಸರು ಕೂಡ ದೇಹ ಕೊಳೆಯುವ ಎಚ್ಚರಿಕೆ ನೀಡಿರುವುದರಿಂದ ಇಡೀ ಕುಟುಂಬ ಅಸಹಾಯಕ ಸ್ಥಿತಿಗೆ ತಲುಪಿದೆ. ಗ್ಲಾಮರ್ ದುನಿಯಾದಲ್ಲಿದ್ದ ಪ್ರತಿಭಾವಂತ ನಟಿಯ ಸಾವು ನಿಜಕ್ಕೂ ಆತ್ಮಹತ್ಯೆಯೋ ಅಥವಾ ಇದರ ಹಿಂದೆ ಬೇರೆ ಯಾವುದಾದರೂ ಕರಾಳ ಸಂಚಿದೆಯೋ ಎಂಬುದು ತನಿಖೆಯಿಂದಷ್ಟೇ ಹೊರಬರಬೇಕಿದೆ,(ಏಜನ್ಸೀಸ್​).
Trending
Crime
Bhopal
kannadanews
VijayavaniNews
twishasharmacase
twishasharma
modeldeath
aiimsbhopal
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net