ತಮಿಳುನಾಡಿನಲ್ಲಿ ದಳಪತಿ ಸುನಾಮಿ: ಡಿಎಂಕೆ ಕೋಟೆಗೆ ಲಗ್ಗೆ ಇಟ್ಟ ವಿಜಯ್! ದ್ರಾವಿಡ ರಾಜಕಾರಣದ ರಕ್ತ ಮತ್ತು ನಂಬಿಕೆ ಈಗ ಟಿವಿಕೆ ಪಾಲು! Tamil Nadu Results 2026

ಪ್ರಾಶಾಂತ್ ಕಿಶೋರ್ ಅವರ ಭವಿಷ್ಯವಾಣಿ ಮತ್ತು ಆಕ್ಸಿಸ್ ಮೈ ಇಂಡಿಯಾ ಎಕ್ಸಿಟ್ ಪೋಲ್ ಅಂದಾಜಿನಂತೆಯೇ ವಿಜಯ್ ಅವರ ಪಕ್ಷ ಭರ್ಜರಿ ಮುನ್ನಡೆ ಸಾಧಿಸಿದೆ.

ವಿಶೇಷವೆಂದರೆ, ವಿಜಯ್ ಅವರ ಈ ಗೆಲುವು ಬಿಜೆಪಿ ಅಥವಾ ಎಐಎಡಿಎಂಕೆಗೆ ಅತಿ ಹೆಚ್ಚು ಹಾನಿ ಮಾಡುವ ಬದಲು, ಆಡಳಿತಾರೂಢ ಡಿಎಂಕೆಯ ಸಾಂಪ್ರದಾಯಿಕ ಮತಬ್ಯಾಂಕ್ ಅನ್ನು ಗುಡಿಸಿ ಹಾಕಿದೆ. ಚೆನ್ನೈ, ಕೊಯಮತ್ತೂರು ಮತ್ತು ಮಧುರೈನಂತಹ ಪ್ರಮುಖ ನಗರಗಳಲ್ಲಿ ಡಿಎಂಕೆ ಬೆಂಬಲಿಸುತ್ತಿದ್ದ ಯುವ ಮತದಾರರು ಈ ಬಾರಿ ನೇರವಾಗಿ ಟಿವಿಕೆ ಪರ ನಿಂತಿದ್ದಾರೆ.

ರಾಜಕೀಯ ವಿಶ್ಲೇಷಕರ ಪ್ರಕಾರ, ಟಿವಿಕೆ ಪಕ್ಷವು ಡಿಎಂಕೆಯ ದ್ರಾವಿಡ ವ್ಯಾಕರಣವನ್ನೇ ಬಳಸಿಕೊಂಡು ಹೊಸ ರೂಪದಲ್ಲಿ ಜನರ ಮುಂದೆ ಬಂದಿದೆ.

ಒಂದೇ ಸಿದ್ಧಾಂತದ ಬೇರು: ಪೆರಿಯಾರ್, ಅಂಬೇಡ್ಕರ್ ಮತ್ತು ಕಾಮರಾಜ್ ಅವರ ತತ್ವಗಳನ್ನು ಅಪ್ಪಿಕೊಂಡಿರುವ ವಿಜಯ್, ಸಾಮಾಜಿಕ ನ್ಯಾಯ ಮತ್ತು ಜಾತ್ಯತೀತ ಮೌಲ್ಯಗಳನ್ನೇ ತನ್ನ ಪಕ್ಷದ ಅಡಿಪಾಯವಾಗಿಸಿಕೊಂಡಿದ್ದಾರೆ. ಇದು ಡಿಎಂಕೆಯ ಮತದಾರರಿಗೆ ಪರ್ಯಾಯ ಮತ್ತು ಆಕರ್ಷಕ ವೇದಿಕೆಯಾಗಿ ಕಂಡಿದೆ.

ಭ್ರಷ್ಟಾಚಾರದ ವಿರುದ್ಧ ಆಕ್ರೋಶ: ಸ್ಟಾಲಿನ್ ಸರ್ಕಾರದ ವಿರುದ್ಧವಿದ್ದ ಆಡಳಿತ ವಿರೋಧಿ ಅಲೆ, ಉದ್ಯೋಗ ಸೃಷ್ಟಿಯಲ್ಲಿನ ವೈಫಲ್ಯ ಮತ್ತು ಡ್ರಗ್ಸ್ ಮುಕ್ತ ತಮಿಳುನಾಡಿನ ಭರವಸೆ ವಿಜಯ್ ಅವರ ಕೈ ಹಿಡಿದಿದೆ.

ವಂಶಪಾರಂಪರ್ಯ ರಾಜಕಾರಣಕ್ಕೆ ಪೆಟ್ಟು: ಉದಯನಿಧಿ ಸ್ಟಾಲಿನ್ ಅವರ ರಾಜಕೀಯ ಏರಿಕೆಯನ್ನು ಟೀಕಿಸುತ್ತಾ ಬಂದಿದ್ದ ವಿಜಯ್, ಡಿಎಂಕೆಯನ್ನು ತನ್ನ ರಾಜಕೀಯ ಶತ್ರು ಎಂದು ಕರೆದಿದ್ದರು. ಇದು ಯುವಜನತೆಯನ್ನು ಆಕರ್ಷಿಸಿದೆ.

ತಮಿಳುನಾಡಿನಲ್ಲಿ ನಟರು ರಾಜಕಾರಣಿಗಳಾಗುವುದು ಹೊಸತಲ್ಲ. ಎಂಜಿ ರಾಮಚಂದ್ರನ್ (MGR) ಮತ್ತು ಜಯಲಲಿತಾ ಅವರು ಸಿನಿಮಾ ಜನಪ್ರಿಯತೆಯನ್ನು ರಾಜಕೀಯ ಶಕ್ತಿಯನ್ನಾಗಿ ಪರಿವರ್ತಿಸಿದ್ದರು. ಆದರೆ ವಿಜಯ್ ಅವರ ಸಾಧನೆ ಇವರಿಬ್ಬರಿಗಿಂತಲೂ ವೇಗವಾಗಿದೆ. ಕೇವಲ ಎರಡು ವರ್ಷಗಳಲ್ಲಿ ಪಕ್ಷ ಕಟ್ಟಿ, ಯಾವುದೇ ಮೈತ್ರಿ ಇಲ್ಲದೆ 234 ಕ್ಷೇತ್ರಗಳಲ್ಲಿ ಏಕಾಂಗಿಯಾಗಿ ಸ್ಪರ್ಧಿಸಿ ಈ ಮಟ್ಟದ ಯಶಸ್ಸು ಕಂಡಿರುವುದು ರಾಜಕೀಯ ಪವಾಡವೇ ಸರಿ. ಇದನ್ನು ವಿಶ್ಲೇಷಕರು MGR-Plus ಯಶಸ್ಸು ಎಂದು ಕರೆದಿದ್ದಾರೆ.

ವಿಜಯ್ ಅವರ ಗೆಲುವು ತಮಿಳುನಾಡಿನಲ್ಲಿ ನೆಲೆಯೂರಲು ಪ್ರಯತ್ನಿಸುತ್ತಿದ್ದ ಬಿಜೆಪಿಗೆ ದೊಡ್ಡ ತಡೆಗೋಡೆಯಾಗಿದೆ. ವಿಜಯ್ ಅವರು ಬಿಜೆಪಿಯನ್ನು ತನ್ನ ಸೈದ್ಧಾಂತಿಕ ಶತ್ರು ಮತ್ತು 'ಫ್ಯಾಸಿಸ್ಟ್ ಶಕ್ತಿ' ಎಂದು ಕರೆಯುವ ಮೂಲಕ ತಮಿಳು ಅಸ್ಮಿತೆಯನ್ನು ಎತ್ತಿ ಹಿಡಿದಿದ್ದಾರೆ. ಇದರಿಂದಾಗಿ ಬಿಜೆಪಿ ಮತ್ತು ಎಐಎಡಿಎಂಕೆ ಮೈತ್ರಿಗೆ ಸಿಗಬೇಕಿದ್ದ ಆಡಳಿತ ವಿರೋಧಿ ಮತಗಳು ವಿಜಯ್ ಅವರ ಪಾಲಾಗಿವೆ.

ಏಪ್ರಿಲ್ 23 ರಂದು ನಡೆದ ಮತದಾನದಲ್ಲಿ ದಾಖಲೆಯ ಶೇ. 85ರಷ್ಟು ಮತದಾನವಾಗಿತ್ತು. ಗೆಲುವು ನಿಶ್ಚಿತ ಎಂಬ ಘೋಷಣೆಯೊಂದಿಗೆ ಮತಗಟ್ಟೆಗೆ ಬಂದ ಯುವ ಮತದಾರರು, ಸಿನಿಮಾ ಅಭಿಮಾನಿಗಳ ಸಂಘವನ್ನು ರಾಜಕೀಯ ಶಕ್ತಿಯನ್ನಾಗಿ ಬದಲಿಸಿದ್ದಾರೆ. ನಿರುದ್ಯೋಗ, ಶಿಕ್ಷಣ ಮತ್ತು ಭ್ರಷ್ಟಾಚಾರ ಮುಕ್ತ ಆಡಳಿತದ ವಿಜಯ್ ಅವರ ಭರವಸೆಗೆ ತಮಿಳು ಜನತೆ ಜೈ ಎಂದಿದ್ದಾರೆ.

ತಮಿಳುನಾಡಿನಲ್ಲಿ ಈಗ ಡಿಎಂಕೆ ಮತ್ತು ಎಐಎಡಿಎಂಕೆಯ ದ್ವಿಪಕ್ಷೀಯ ಆಳ್ವಿಕೆ ಅಂತ್ಯಗೊಂಡಿದೆ. ವಿಜಯ್ ನೇತೃತ್ವದ ಟಿವಿಕೆ ಈಗ ರಾಜ್ಯದ ಪ್ರಬಲ ಶಕ್ತಿಯಾಗಿ ಉದಯಿಸಿದೆ. ಇದು ಕೇವಲ ನಟನೊಬ್ಬನ ಗೆಲುವಲ್ಲ, ಬದಲಿಗೆ ಹಳೆಯ ದ್ರಾವಿಡ ರಾಜಕಾರಣದ ಮೇಲಿನ ಜನರ ಬೇಸರ ಮತ್ತು ಹೊಸ ಬದಲಾವಣೆಯ ಹಂಬಲದ ಫಲಿತಾಂಶವಾಗಿದೆ,(ಏಜೆನ್ಸೀಸ್​).