ಬಂಗಾಳದಲ್ಲಿ ಮಮತಾ ಸಾಮ್ರಾಜ್ಯ ಪತನ: 'ದೀದಿ' ಕೋಟೆ ಕುಸಿಯಲು ಕಾರಣವಾಯಿತೇ ಆ ಒಂದು ಘಟನೆ..? TMC Fall in Bengal

ಟಿಎಂಸಿ ಪತನಕ್ಕೆ ಅತಿ ದೊಡ್ಡ ಹೊಡೆತ ನೀಡಿದ್ದು ಆರ್.ಜಿ. ಕರ್ ವೈದ್ಯಕೀಯ ಕಾಲೇಜಿನಲ್ಲಿ ನಡೆದ ಭೀಕರ ಅತ್ಯಾಚಾರ ಮತ್ತು ಕೊಲೆ ಪ್ರಕರಣ. ಈ ಘಟನೆಯನ್ನು ರಾಜ್ಯ ಸರ್ಕಾರ ನಿರ್ವಹಿಸಿದ ರೀತಿ ಜನರ ಆಕ್ರೋಶಕ್ಕೆ ಕಾರಣವಾಯಿತು. ಕೇವಲ ವೈದ್ಯಕೀಯ ವಲಯವಷ್ಟೇ ಅಲ್ಲದೆ, ಇಡೀ ರಾಜ್ಯದ ಮಹಿಳೆಯರು ಮತ್ತು ಯುವಜನತೆ ಬೀದಿಗೆ ಇಳಿದು ಪ್ರತಿಭಟಿಸಿದರು.

ರತ್ನ ದೇವನಾಥ್ ಅಸ್ತ್ರ: ಸಂತ್ರಸ್ತೆಯ ತಾಯಿ ರತ್ನ ದೇವನಾಥ್ ಅವರನ್ನು ಪಾನಿಹಟಿ ಕ್ಷೇತ್ರದಿಂದ ಬಿಜೆಪಿ ಕಣಕ್ಕಿಳಿಸಿದ್ದು ಟಿಎಂಸಿಗೆ ದೊಡ್ಡ ಹಿನ್ನಡೆಯಾಯಿತು. ಇದು ಭಾವನಾತ್ಮಕವಾಗಿ ಮತದಾರರನ್ನು ಸೆಳೆಯುವಲ್ಲಿ ಯಶಸ್ವಿಯಾಯಿತು.

ಟಿಎಂಸಿ ನಾಯಕ ಪಾರ್ಥ ಚಟರ್ಜಿ ಅವರ ಆಪ್ತೆಯ ಮನೆಯಲ್ಲಿ ಪತ್ತೆಯಾದ ಕೋಟಿ ಕೋಟಿ ಹಣದ ರಾಶಿ ಮಮತಾ ಬ್ಯಾನರ್ಜಿ ಅವರ ಪ್ರಾಮಾಣಿಕತೆಯ ಬಿಂಬಕ್ಕೆ ದೊಡ್ಡ ಪೆಟ್ಟು ನೀಡಿತು. ಉದ್ಯೋಗ ಹಗರಣಗಳು ಮತ್ತು ಹಣದ ವಶಪಡಿಸಿಕೊಳ್ಳುವಿಕೆಯು ಸಾಮಾನ್ಯ ಜನರ ಮತ್ತು ನಿರುದ್ಯೋಗಿ ಯುವಕರ ಕೆಂಗಣ್ಣಿಗೆ ಗುರಿಯಾಯಿತು.

ಬಂಗಾಳದ ಯುವಜನತೆ ಮತ್ತು ಮಧ್ಯವಯಸ್ಕರು ಟಿಎಂಸಿಯ ಕೆಳಮಟ್ಟದ ಕಾರ್ಯಕರ್ತರ ಗೂಂಡಾಗಿರಿ ಮತ್ತು ಕಟ್-ಮನಿ (ಕಮಿಷನ್) ಸಂಸ್ಕೃತಿಯಿಂದ ಬೇಸತ್ತಿದ್ದರು. ಯಾವುದೇ ಸರ್ಕಾರಿ ಸವಲತ್ತು ಪಡೆಯಬೇಕಾದರೂ ಟಿಎಂಸಿ ಕಾರ್ಯಕರ್ತರಿಗೆ ಹಣ ನೀಡಬೇಕಾದ ಪರಿಸ್ಥಿತಿ ಜನರ ಸಹನೆಯ ಕಟ್ಟೆ ಒಡೆಯುವಂತೆ ಮಾಡಿತು.

ಮಮತಾ ಬ್ಯಾನರ್ಜಿ ಅವರು ಸದಾ ಬಿಜೆಪಿಯನ್ನು ಹೊರಗಿನವರು ಎಂದು ಟೀಕಿಸುತ್ತಿದ್ದರು. ಆದರೆ, ಈ ಬಾರಿ ಈ ತಂತ್ರ ಫಲ ನೀಡಲಿಲ್ಲ. ಪ್ರಧಾನಿ ಮೋದಿ ಮತ್ತು ಅಮಿತ್ ಷಾ ಅವರು ರಾಜ್ಯದ ಸ್ಥಳೀಯ ಸಮಸ್ಯೆಗಳಾದ ಭ್ರಷ್ಟಾಚಾರ, ಒಳನುಸುಳುವಿಕೆ ಮತ್ತು ಅಭಿವೃದ್ಧಿ ಕುಂಠಿತವಾಗಿರುವ ಬಗ್ಗೆ ನಿರಂತರವಾಗಿ ಧ್ವನಿ ಎತ್ತಿದರು. ಬಂಗಾಳದ ಮತದಾರ ಈ ಬಾರಿ ಬಂಗಾಳಿ ಅಸ್ಮಿತೆಗಿಂತ 'ಬದಲಾವಣೆಗೆ ಆದ್ಯತೆ ನೀಡಿದ್ದಾನೆ.

ಮತುವಾ ಸಮುದಾಯದ ಪೌರತ್ವದ ಬಗ್ಗೆ ಟಿಎಂಸಿ ಹರಡಿದ್ದ ಗೊಂದಲಗಳನ್ನು ಬಿಜೆಪಿ ಯಶಸ್ವಿಯಾಗಿ ಮೆಟ್ಟಿ ನಿಂತಿತು. ಬಾಂಗ್ಲಾದೇಶದಿಂದ ಬಂದ ಹಿಂದೂಗಳಿಗೆ ಪೌರತ್ವ ಸಿಗಲಿದೆ ಎಂಬ ಬಿಜೆಪಿ ನಾಯಕರ ಭರವಸೆಯು ಈ ಸಮುದಾಯದ ಮತಗಳು ಬಿಜೆಪಿಗೆ ಧ್ರುವೀಕರಣಗೊಳ್ಳುವಂತೆ ಮಾಡಿತು.

ಬಾಂಗ್ಲಾದೇಶದಿಂದ ಆಗುತ್ತಿರುವ ಒಳನುಸುಳುವಿಕೆ ಮತ್ತು ಮಮತಾ ಬ್ಯಾನರ್ಜಿ ಅವರ ಅಲ್ಪಸಂಖ್ಯಾತ ಓಲೈಕೆಯ ರಾಜಕಾರಣವನ್ನು ಬಿಜೆಪಿ ಪ್ರಬಲವಾಗಿ ವಿರೋಧಿಸಿತು. ಇದು ಬಹುಸಂಖ್ಯಾತ ಹಿಂದೂ ಮತಗಳ ಏಕೀಕರಣಕ್ಕೆ ದಾರಿಯಾಯಿತು.

ಸೋಲಿನ ಮುನ್ಸೂಚನೆ ಇದ್ದರೂ ಮಮತಾ ಬ್ಯಾನರ್ಜಿ ಅವರು ಸೋಲೊಪ್ಪಲು ಸಿದ್ಧರಿಲ್ಲ. ಸೂರ್ಯ ಮುಳುಗಿದ ಮೇಲೆ ಪವಾಡ ನಡೆಯಲಿದೆ, ಬಿಜೆಪಿ ಮೊದಲು ಮುನ್ನಡೆ ತೋರಿಸುತ್ತದೆ, ನಂತರ ನಾವು ಗೆಲ್ಲುತ್ತೇವೆ ಎಂದು ಕಾರ್ಯಕರ್ತರಿಗೆ ಧೈರ್ಯ ತುಂಬುತ್ತಿದ್ದಾರೆ. ಆದರೆ, ಅಂಕಿಅಂಶಗಳು ಮಾತ್ರ ಬಂಗಾಳದಲ್ಲಿ ಹೊಸ ಯುಗದ ಆರಂಭವನ್ನು ಸಾರುತ್ತಿವೆ,(ಏಜೆನ್ಸೀಸ್​).