ಬಂಗಾಳದ 'ಪ್ರೆಸಿಡೆನ್ಸಿ' ಕೋಟೆಗೆ ಲಗ್ಗೆ ಇಟ್ಟ ಬಿಜೆಪಿ: ದೀದಿ ಆಡಳಿತಕ್ಕೆ ಖೇಲಾ ಶೇಷ್! ಹೂಗ್ಲಿಯಲ್ಲಿ ಅಟ್ಟರ್ ಫ್ಲಾಪ್ ಆದ ಖೇಲಾ ಹೋಬೆ ಮಾಂತ್ರಿಕ! West Bengal Election result

2021ರಲ್ಲಿ ವೈರಲ್ ಆಗಿದ್ದ ಖೇಲಾ ಹೋಬೆ ಗೀತೆಯ ಸೃಷ್ಟಿಕರ್ತ ದೇಬಾಂಶು ಭಟ್ಟಾಚಾರ್ಯ ಅವರನ್ನು ಈ ಬಾರಿ ಹೂಗ್ಲಿಯ ಚುಂಚುರಾ ಕ್ಷೇತ್ರದಿಂದ ಕಣಕ್ಕಿಳಿಸಲಾಗಿತ್ತು. ಹಾಲಿ ಶಾಸಕ ಅಸಿತ್ ಮುಜುಂದಾರ್ ಅವರನ್ನು ಬದಿಗೊತ್ತಿ, ಯುವ ಸಂವೇದನೆಯ ದೇಬಾಂಶು ಮೇಲೆ ಮಮತಾ ಪಣ ಹೂಡಿದ್ದರು. ಆದರೆ, ಮತದಾರರು ಈ ಖೇಲಾಗೆ ಅಂತ್ಯ ಹಾಡಿದ್ದಾರೆ. ಇದು ಕೇವಲ ಒಬ್ಬ ವ್ಯಕ್ತಿಯ ಸೋಲಲ್ಲ, ಬದಲಿಗೆ ಇಡೀ ಪ್ರೆಸಿಡೆನ್ಸಿ ವಲಯದಲ್ಲಿ ಟಿಎಂಸಿಯ ಅವನತಿಯ ಸಂಕೇತವಾಗಿದೆ.

ಕೋಲ್ಕತ್ತಾ, ಹೌರಾ, ಹೂಗ್ಲಿ, ಉತ್ತರ ಮತ್ತು ದಕ್ಷಿಣ 24 ಪರಗಣ ಜಿಲ್ಲೆಗಳನ್ನು ಒಳಗೊಂಡ 'ಪ್ರೆಸಿಡೆನ್ಸಿ' ವಲಯವು ಬಂಗಾಳದ ಅತಿ ದೊಡ್ಡ ರಾಜಕೀಯ ವಲಯವಾಗಿದೆ.

ಕಳೆದ ಬಾರಿ ಕೇವಲ 14 ಸ್ಥಾನ ಗೆದ್ದಿದ್ದ ಬಿಜೆಪಿ, ಈ ಬಾರಿ ತನ್ನ ಬಲವನ್ನು 54ಕ್ಕೇರಿಸುವ ಮೂಲಕ ದೀದಿ ಸಾಮ್ರಾಜ್ಯದ ಬುನಾದಿಯನ್ನೇ ಅಲುಗಾಡಿಸಿದೆ. ಕಳೆದ ಮೂರು ದಶಕಗಳ ಎಡರಂಗದ ಆಡಳಿತ ಅಂತ್ಯವಾಗುವಾಗ ಇಂತಹುದೇ ಬದಲಾವಣೆ ಕಂಡುಬಂದಿತ್ತು.

ಯಾವಾಗಲೂ ಮಮತಾ ಬ್ಯಾನರ್ಜಿ ಅವರ ಬೆನ್ನಿಗೆ ನಿಲ್ಲುತ್ತಿದ್ದ ಕೋಲ್ಕತ್ತಾದ ಪ್ರಮುಖ ಕ್ಷೇತ್ರಗಳಾದ ಶ್ಯಾಂಪುಕೂರ್, ಎಂಟಾಲಿ, ಬೆಲೆಘಾಟಾ ಮತ್ತು ಮಾಣಿಕ್ತಾಲಾಗಳಲ್ಲಿ ಬಿಜೆಪಿ ಭರ್ಜರಿ ಮುನ್ನಡೆ ಸಾಧಿಸಿದೆ. ಅಷ್ಟೇ ಅಲ್ಲದೆ, ಅಭಿಷೇಕ್ ಬ್ಯಾನರ್ಜಿ ಅವರ ಪ್ರಭಾವಿ ಕ್ಷೇತ್ರ ಎನ್ನಲಾದ ಡೈಮಂಡ್ ಹಾರ್ಬರ್ನಲ್ಲಿ ಬಿಜೆಪಿಯ ದೀಪಕ್ ಕುಮಾರ್ ಹಲ್ದಾರ್ ಮುನ್ನಡೆ ಸಾಧಿಸಿರುವುದು ರಾಜಕೀಯ ವಲಯದಲ್ಲಿ ಅಚ್ಚರಿ ಮೂಡಿಸಿದೆ.

ಸ್ವತಃ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಸ್ಪರ್ಧಿಸಿರುವ ಭವಾನಿಪುರದಲ್ಲಿ ಪರಿಸ್ಥಿತಿ ಕ್ಷಣಕ್ಕೊಂದು ತಿರುವು ಪಡೆಯುತ್ತಿದೆ. ಅವರ ಪರಮ ಎದುರಾಳಿ ಸುವೇಂದು ಅಧಿಕಾರಿ ಮತ್ತು ಮಮತಾ ನಡುವೆ 'ಸೀ-ಸಾ' ಮಾದರಿಯ ಜಿದ್ದಾಜಿದ್ದಿನ ಪೈಪೋಟಿ ನಡೆಯುತ್ತಿದೆ. ಒಂದು ಸುತ್ತಿನಲ್ಲಿ ದೀದಿ ಮುನ್ನಡೆದರೆ, ಮತ್ತೊಂದು ಸುತ್ತಿನಲ್ಲಿ ಸುವೇಂದು ಮುನ್ನಡೆಯುತ್ತಿದ್ದಾರೆ.

ಉತ್ತರ ಬಂಗಾಳದ ಭದ್ರಕೋಟೆ: ಅಲಿಪುರದ್ವಾರ್ ಮತ್ತು ಜಲ್ಪೈಗುರಿಗಳಲ್ಲಿ ಬಿಜೆಪಿ ತನ್ನ ಹಿಡಿತವನ್ನು ಮುಂದುವರಿಸಿದೆ.

ಮೇದಿನಿಪುರದಲ್ಲಿ ಪ್ರಾಬಲ್ಯ: ಬುಡಕಟ್ಟು ಪ್ರಾಬಲ್ಯದ ಮೇದಿನಿಪುರ ಜಿಲ್ಲೆಯಾದ್ಯಂತ ಬಿಜೆಪಿ ಅಲೆ ಎದ್ದಿದೆ.

ಹೌರಾದಲ್ಲಿ ವಿಭಜನೆ: ಹೌರಾ ಉತ್ತರ ಮತ್ತು ದಕ್ಷಿಣದಲ್ಲಿ ಬಿಜೆಪಿ ಮುನ್ನಡೆದಿದ್ದರೆ, ಮಧ್ಯ ಹೌರಾದಲ್ಲಿ ಮಾತ್ರ ಟಿಎಂಸಿ ಅಲ್ಪ ಚೇತರಿಕೆ ಕಂಡಿದೆ.

ಪ್ರೆಸಿಡೆನ್ಸಿ ವಲಯದಲ್ಲಿನ ಕುಸಿತವು ಮಮತಾ ಬ್ಯಾನರ್ಜಿ ಅವರ ಸತತ 15 ವರ್ಷಗಳ ಆಡಳಿತಕ್ಕೆ ತೆರೆ ಎಳೆಯುವ ಮುನ್ಸೂಚನೆ ನೀಡಿದೆ. ಅಕ್ರಮಗಳ ಆರೋಪ, SIR ವಿವಾದ ಮತ್ತು ಹಿಂಸಾಚಾರದ ನಡುವೆಯೂ ಬಂಗಾಳದ ಮತದಾರ ಈ ಬಾರಿ ಖೇಲಾ ಶೇಷ್ (ಆಟ ಮುಗಿಯಿತು) ಎಂಬ ಸ್ಪಷ್ಟ ಸಂದೇಶ ನೀಡಿದ್ದಾನೆ.

ಸಂಜೆ ವೇಳೆಗೆ ಅಂತಿಮ ಫಲಿತಾಂಶ ಹೊರಬೀಳಲಿದ್ದು, ಬಂಗಾಳದ ಇತಿಹಾಸದಲ್ಲಿ ಹೊಸ ಅಧ್ಯಾಯ ಆರಂಭವಾಗುವುದು ಬಹುತೇಕ ಖಚಿತವಾದಂತಿದೆ,(ಏಜೆನ್ಸೀಸ್​).