ಬಲೂನ್​ ಊದುವಾಗ ಗಂಟಲಲ್ಲಿ ಸಿಲುಕಿ 6 ವರ್ಷದ ಬಾಲಕ ದುರಂತ ಸಾವು: ಮುಗಿಲು ಮುಟ್ಟಿದ ಪಾಲಕರ ಆಕ್ರಂದನ! Balloon Stuck in Throat

ಚೆನ್ನೈ: ಮಕ್ಕಳ ಆಟಿಕೆಗಳಾಗಿ ಬಳಸುವ ಬಲೂನ್‌ಗಳು ಕೆಲವೊಮ್ಮೆ ಎಷ್ಟೊಂದು ಅಪಾಯಕಾರಿ ಹಾಗೂ ಪ್ರಾಣಾಂತಿಕವಾಗಿ ಪರಿಣಮಿಸಬಹುದು ಎಂಬುದಕ್ಕೆ ತಮಿಳುನಾಡಿನ ಪಚೂರ್‌ನಲ್ಲಿ ನಡೆದ ಒಂದು ಹೃದಯ ವಿದ್ರಾವಕ ಘಟನೆಯೇ ( Balloon Stuck in Throat ) ಜೀವಂತ ನಿದರ್ಶನವಾಗಿದೆ. ಮನೆಯಲ್ಲಿ ಆಡುತ್ತಾ ಖುಷಿಪಡುತ್ತಿದ್ದ ಪುಟ್ಟ ಬಾಲಕನೊಬ್ಬ ಬಲೂನ್‌ನಿಂದಾಗಿ ಪ್ರಾಣ ಕಳೆದುಕೊಂಡಿರುವ ದುರಂತ ಘಟನೆಯು ಇಡೀ ಕುಟುಂಬದಲ್ಲಿ ಮಾತ್ರವಲ್ಲದೆ ಆ ಪ್ರದೇಶದಲ್ಲೇ ತೀವ್ರ ಶೋಕವನ್ನುಂಟು ಮಾಡಿದೆ.

ಮಕ್ಕಳು ಯಾವುದೇ ಜಾತ್ರೆ, ಹುಟ್ಟುಹಬ್ಬದ ಪಾರ್ಟಿಗಳು ಹಾಗೂ ಇತರೆ ಸಣ್ಣಪುಟ್ಟ ಸಮಾರಂಭಗಳಲ್ಲಿ ಬಲೂನ್‌ಗಳೊಂದಿಗೆ ಆಟವಾಡುವುದು ಬಹಳ ಸಾಮಾನ್ಯವಾಗಿದೆ. ಆದರೆ, ತಮಿಳುನಾಡಿನ ಪಚೂರ್‌ನಲ್ಲಿ ಜವಳಿ ವ್ಯಾಪಾರಿ ಸತ್ಯಕುಮಾರ್ ದಂಪತಿಯ ಅವಳಿ ಗಂಡು ಮಕ್ಕಳಲ್ಲಿ ಒಬ್ಬನಾದ ಆರು ವರ್ಷದ ಸೋಮನಾಥ್ ಎಂಬ ಬಾಲಕನಿಗೆ ಇಂತಹದೊಂದು ಆಟವೇ ಮೃತ್ಯುವಾಗಿ ಪರಿಣಮಿಸಿದೆ.

ಸೋಮವಾರದಂದು ಸಂಜೆ ಸೋಮನಾಥ್ ಮನೆಯಲ್ಲಿ ಬಲೂನ್‌ನೊಂದಿಗೆ ಆಟವಾಡುತ್ತಾ ಅದನ್ನು ಬಾಯಿಯಿಂದ ಊದುತ್ತಿದ್ದನು. ಹೀಗೆ ಬಲೂನ್ ಊದುವ ಸಂದರ್ಭದಲ್ಲಿ ಆ ಬಲೂನ್ ಅಚಾನಕ್ಕಾಗಿ ಬಾಲಕನ ಗಂಟಲಲ್ಲಿ ಸಿಲುಕಿಕೊಂಡಿದೆ. ಇದರ ಪರಿಣಾಮವಾಗಿ ಆತನಿಗೆ ಉಸಿರಾಡಲು ಸಾಧ್ಯವಾಗದೆ ತಕ್ಷಣವೇ ಪ್ರಜ್ಞೆತಪ್ಪಿ ಬಿದ್ದಿದ್ದಾನೆ. ಕೂಡಲೇ ಎಚ್ಚೆತ್ತ ಕುಟುಂಬದವರು ಆ ಬಾಲಕನನ್ನು ಆಸ್ಪತ್ರೆಗೆ ಧಾವಿಸಿ ಕರೆದುಕೊಂಡು ಹೋಗಿದ್ದಾರೆ. ಆದರೆ, ಆಸ್ಪತ್ರೆಗೆ ತಲುಪುವಷ್ಟರಲ್ಲಿ ಬಾಲಕ ಮೃತಪಟ್ಟಿರುವುದಾಗಿ ವೈದ್ಯರು ಅಧಿಕೃತವಾಗಿ ದೃಢಪಡಿಸಿದ್ದಾರೆ.

ವೈದ್ಯರು ಬಾಲಕನ ಗಂಟಲಿನಲ್ಲಿ ಸಿಲುಕಿಕೊಂಡಿದ್ದ ಬಲೂನನ್ನು ಹೊರತೆಗೆದರಾದರೂ, ಅಷ್ಟರಲ್ಲಾಗಲೇ ಕಾಲಮೀರಿ ಹೋಗಿತ್ತು. ಸ್ವಲ್ಪ ಸಮಯದ ಹಿಂದೆಷ್ಟೇ ಆಡುತ್ತಾ, ಹಾಡುತ್ತಾ, ನಗುತ್ತಾ ಎಲ್ಲರೊಂದಿಗೆ ಸಂತೋಷದಿಂದ ಕಾಲ ಕಳೆದ ಮಗು ಅನಿರೀಕ್ಷಿತವಾಗಿ ಸಾವಿಗೀಡಾಗಿದ್ದನ್ನು ಕಂಡು ಪಾಲಕರು ಹಾಗೂ ಕುಟುಂಬದ ಸದಸ್ಯರು ಕಣ್ಣೀರಾಕುತ್ತಾ ದುಃಖದಲ್ಲಿ ಮುಳುಗಿದ್ದಾರೆ.

ಮಗುವಿನ ಈ ಅಕಾಲಿಕ ಹಾಗೂ ಆಘಾತಕಾರಿ ಸಾವು ಇಡೀ ಪಚೂರ್ ಪ್ರದೇಶದಲ್ಲಿ ಮೌನ ಹಾಗೂ ದುಃಖದ ಕಾರ್ಮೋಡ ಆವರಿಸುವಂತೆ ಮಾಡಿದೆ. ಮಕ್ಕಳ ಕೈಗೆ ಬಲೂನ್‌ಗಳನ್ನು ನೀಡುವಾಗ ಅಥವಾ ಮಕ್ಕಳು ಅವುಗಳೊಂದಿಗೆ ಆಟವಾಡುವಾಗ ಪಾಲಕರು ಎಷ್ಟು ಎಚ್ಚರಿಕೆಯಿಂದ ಇರಬೇಕು ಎಂಬುದಕ್ಕೆ ಈ ಕರುಣಾಜನಕ ಘಟನೆಯು ಎಚ್ಚರಿಕೆಯ ಪಾಠವಾಗಿದೆ, (ಏಜೆನ್ಸೀಸ್​).