ಇಸ್ಲಾಂನಲ್ಲಿ ಮದುವೆ ಅಂದ್ರೆ ಒಪ್ಪಂದ, ಜೀತವಲ್ಲ!
ಯುಸಿಸಿ ಹೆಸರಲ್ಲಿ ಮುಸ್ಲಿಮರ ವೈಯಕ್ತಿಕ ಕಾನೂನಿನಲ್ಲಿ ಮೂಗು ತೂರಿಸಲಾಗುತ್ತಿದೆ ಎಂದು ಕಿಡಿಕಾರಿದ ಓವೈಸಿ, ಮದುವೆ ಮತ್ತು ವಿಚ್ಛೇದನದ ನಿಯಮಗಳ ಬಗ್ಗೆ ವಿವರಣೆ ನೀಡಿದರು. "ಇಸ್ಲಾಂ ಧರ್ಮದಲ್ಲಿ ಮದುವೆ ಎಂಬುದು ಒಂದು ಸಾಮಾಜಿಕ ಒಪ್ಪಂದ (ಕಾಂಟ್ರಾಕ್ಟ್). ಹೊಂದಾಣಿಕೆ ಆಗದಿದ್ದರೆ ಮಹಿಳೆಗೆ ಸುಲಭವಾಗಿ ಆ ಸಂಬಂಧದಿಂದ ಹೊರಬರುವ (ವಿಚ್ಛೇದನ ಪಡೆಯುವ) ಹಕ್ಕಿದೆ.
ಆದರೆ, ಸರ್ಕಾರ ತರಲು ಹೊರಟಿರುವ ಕಾನೂನಿನಲ್ಲಿ ಮದುವೆಯಾದ ಮೇಲೆ ಕನಿಷ್ಠ ಒಂದು ವರ್ಷ ಒಟ್ಟಿಗೇ ಇರಬೇಕು ಎಂಬ ನಿಯಮ ಹೇರಲಾಗುತ್ತಿದೆ. ಇದು ಮುಸ್ಲಿಂ ಪರ್ಸನಲ್ ಲಾ ಮೇಲೆ ಹಿಂದೂ ವಿವಾಹ ಕಾಯಿದೆಯನ್ನು ಹೇರುವ ಹುನ್ನಾರವಲ್ಲದೆ ಬೇರೇನೂ ಅಲ್ಲ," ಎಂದಿದ್ದಾರೆ.
ಅಲ್ಲದೆ, "ಸಂವಿಧಾನದ ಚೌಕಟ್ಟನ್ನು ಮೀರಿ ನಡೆಯುತ್ತಿರುವ ದೇವೇಂದ್ರ ಫಡ್ನವೀಸ್ ಅವರಿಗೆ ಸಂವಿಧಾನ ಶಿಲ್ಪಿ ಬಾಬಾಸಾಹೇಬ್ ಅಂಬೇಡ್ಕರ್ ಅವರಿಗಿಂತ ಹೆಚ್ಚು ಬುದ್ಧಿವಂತಿಕೆ ಇದೆಯಾ?" ಎಂದು ಖಾರವಾಗಿ ಪ್ರಶ್ನಿಸಿದ್ದಾರೆ.
