ಮೈದಾನದಿಂದ ಕೋಣೆಗೆ ಬಂದಿದ್ದಾರೆ; ಮುಂದೆ ಕಾರ್​​ನಲ್ಲಿ ಸಭೆ ನಡೆಸಬಹುದು: ಇಂಡಿಯಾ ಕೂಟದ ಸಭೆ ಬಗ್ಗೆ ಬಿಜೆಪಿ ವ್ಯಂಗ್ಯ | BJP

ನವದೆಹಲಿ: ಸೋಮವಾರ(ಜೂ. 08) ದೆಹಲಿಯ ಕಾನ್ಸ್ಟಿಟ್ಯೂಷನ್ ಕ್ಲಬ್‌ನಲ್ಲಿ ನಡೆದ ವಿಪಕ್ಷಗಳ ಇಂಡಿಯಾ ಮೈತ್ರಿಕೂಟದ ಸಭೆ ಬಗ್ಗೆ ಆಡಳಿತರೂಢ ಬಿಜೆಪಿ ಪ್ರತಿಕ್ರಿಯೆ ನೀಡಿದ್ದು, ಮೈದಾನದಿಂದ ಕೋಣೆಗೆ ಬಂದಿದ್ದಾರೆ, ಮುಂದೆ ಕಾರ್​​ನಲ್ಲಿ ಸಭೆ ನಡೆಸಬಹುದು ಎಂದು ವ್ಯಂಗ್ಯವಾಡಿದೆ.

ಈ ಕುರಿತು ದೆಹಲಿಯಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿರುವ ಬಿಜೆಪಿ ಸಂಸದ ಸಂಬಿತ್ ಪಾತ್ರ, ಡಿಎಂಕೆ ಮತ್ತು ಆಪ್​ನಂತಹ ಪಕ್ಷಗಳು ಮೈತ್ರಿಕೂಟವನ್ನು ತೊರೆದ ಬಳಿಕ ಇಂಡಿಯಾ ಬ್ಲಾಕ್ ಸಣ್ಣದಾಗಿದೆ. ಹಿಂದೆ ಮೈತ್ರಿಕೂಟದ ಸಭೆಗಳನ್ನು ಮೈದಾನದಲ್ಲಿ ನಡೆಸಲಾಗುತ್ತಿತ್ತು. ಆದರೆ ಈಗ ಅವುಗಳನ್ನು ಕಾನ್ಸ್ಟಿಟ್ಯೂಷನ್ ಕ್ಲಬ್‌ನಲ್ಲಿ ಒಂದು ಕೋಣೆಯಲ್ಲಿ ನಡೆಸಲಾಗಿದೆ. ಮುಂದೆ ಅವರು ಮೈದಾನವನ್ನು ತುಂಬಲ್ಲ ಎಂದಿದ್ದಾರೆ.

ತಮಿಳುನಾಡಿನಲ್ಲಿ ಕಾಂಗ್ರೆಸ್ ಬೇಗನೆ ಮತ್ತೊಂದು ಪಕ್ಷದೊಂದಿಗೆ ಮೈತ್ರಿ ಮಾಡಿಕೊಂಡು ಸರ್ಕಾರ ರಚಿಸಿತು. ಆದರೆ ಬಂಗಾಳದಲ್ಲಿ ಸೋತ ಬಳಿಕ ಕೆಟ್ಟದಾಗಿ ಕೂಗುತ್ತಿದ್ದಾರೆ. ಇಡೀ ದೇಶವೇ ಈ ಬೂಟಾಟಿಕೆಗೆ ಸಾಕ್ಷಿಯಾಗುತ್ತಿದೆ. ಈ ಯಾವುದೇ ಪಕ್ಷಗಳು ನೆಲದ ಮೇಲೆ ನಿಜವಾದ ಅಸ್ತಿತ್ವವನ್ನು ಹೊಂದಿಲ್ಲ. ಸಾರ್ವಜನಿಕ ಬೆಂಬಲ ಮತ್ತು ವಿಶ್ವಾಸಾರ್ಹತೆಯನ್ನು ಕಳೆದುಕೊಂಡಿವೆ ಎಂದು ಕಿಡಿಕಾರಿದ್ದಾರೆ.

ಸಭೆಯಲ್ಲಿ ಅಖಿಲೇಶ್ ಯಾದವ್ ಹಾಜರಿದ್ದರು. ಮಮತಾ ಜಿ ಅವರ ಪರಿಸ್ಥಿತಿಯನ್ನು ನೋಡಿದರೆ, ಅದೇ ಪರಿಸ್ಥಿತಿ ತಮಗೂ ಕಾದಿದೆಯೇ ಎಂದು ಅವರು ಆಶ್ಚರ್ಯ ಪಡುತ್ತಿರುವಂತೆ ಕಾಣುತ್ತಿತ್ತು. ರಾಹುಲ್ ಗಾಂಧಿ ಪಕ್ಕದಲ್ಲಿರುವ ಯಾರ ರಾಜಕೀಯ ಅದೃಷ್ಟವೂ ಸುಧಾರಿಸುವುದಿಲ್ಲ ಎಂದು ಪ್ರತಿಪಾದಿಸಿದ್ದಾರೆ.

ಪ್ರತಿ ಎರಡು ತಿಂಗಳಿಗೊಮ್ಮೆ ಸಭೆ ಸೇರುವ ಇಂಡಿಯಾ ಬ್ಲಾಕ್‌ನ ನಿರ್ಧಾರವನ್ನು ಅಪಹಾಸ್ಯ ಮಾಡಿದ ಪಾತ್ರಾ, ಪ್ರತಿ ಎರಡು ತಿಂಗಳಿಗೊಮ್ಮೆ ಸಭೆ ನಡೆಸಲು ನಿರ್ಧರಿಸಿದ್ದಾರೆ. ಹೀಗೆ ಮೂರನೇ ಅಥವಾ ನಾಲ್ಕನೇ ಸಭೆ ವೇಳೆಗೆ ಮೈತ್ರಿಕೂಟದ ಸಭೆಗಳನ್ನು ಕಾರಿನೊಳಗೆ ನಡೆಸಲಿದ್ದಾರೆ ಎಂದು ಹೇಳಿದ್ದಾರೆ.

ನವದೆಹಲಿಯ ಕಾನ್ಸಟ್ಯೂಷನ್​ ಕ್ಲಬ್​ನಲ್ಲಿ ನಡೆಯ ಇಂಡಿಯಾ ಮೈತ್ರಿಕೂಟದ ಸಭೆಯಲ್ಲಿ ಎಸ್​ಐಆರ್ ಮತ್ತು ಮತಗಳ್ಳತನ ಬಗ್ಗೆ ಚರ್ಚೆ ನಡೆದಿದ್ದು, ಜೊತೆಗೆ ನೀಟ್, ಸಿಬಿಎಸ್​ಇ ಅಕ್ರಮ ಹಿನ್ನೆಲೆ ಕೇಂದ್ರ ಸಚಿವ ಧರ್ಮೇಂದ್ರ ಪ್ರಧಾನ್ ರಾಜೀನಾಮೆ ಕೋರಿ ನಿರ್ಣಯ ಅಂಗೀಕರಿಸಲಾಗಿದೆ. ಡಿಎಂಕೆ, ಎಎಪಿ ಹೊರತುಪಡಿಸಿ ಉಳಿದ ಎಲ್ಲಾ ವಿಪಕ್ಷಗಳ ನಾಯಕರು ಸಭೆಯಲ್ಲಿ ಹಾಜರಾಗಿದ್ದರು (ಏಜೆನ್ಸೀಸ್).