ಕಾಲೇಜು ವಿದ್ಯಾರ್ಥಿನಿಯ ಜೇನುನೊಣಗಳ ಸಾಹಸದ ಹಿಂದಿದೆ ಇಡೀ ವಿಶ್ವವನ್ನೇ ಉಳಿಸುವ ಒಂದು ಪ್ರಯತ್ನ! Bees

Bees : ತಮಿಳುನಾಡಿನ ಕೊಯಮತ್ತೂರು ಕೃಷಿ ವಿಶ್ವವಿದ್ಯಾಲಯದಲ್ಲಿ ಜಾಗತಿಕ ಜೇನುನೊಣ ದಿನಾಚರಣೆಯ (World Bee Day) ಅಂಗವಾಗಿ ನಡೆದ ಕಾರ್ಯಕ್ರಮದಲ್ಲಿ ಪ್ರಕೃತಿಯ ರಕ್ಷಕರಾದ ಜೇನುನೊಣಗಳನ್ನು ಸಂರಕ್ಷಿಸುವ ಸಂದೇಶವನ್ನು ಸಾರಲು ವಿದ್ಯಾರ್ಥಿನಿಯೊಬ್ಬಳು ಆಯ್ದುಕೊಂಡು ವಿಭಿನ್ನ ದಾರಿ ಎಲ್ಲರ ಗಮನ ಸೆಳೆದಿದೆ.

ವಿಶ್ವವಿದ್ಯಾಲಯದ ಅಗ್ರಿಕಲ್ಚರಲ್ ಎಂಟಮಾಲಜಿ (ಕೀಟಶಾಸ್ತ್ರ) ವಿಭಾಗದ ವಿದ್ಯಾರ್ಥಿನಿ ಭಾಗ್ಯಲಕ್ಷ್ಮಿ ಎಂಬಾಕೆ, ಕೇವಲ ಭಾಷಣಕ್ಕೆ ಸೀಮಿತವಾಗದೆ ಸಾವಿರಾರು ಜೇನುನೊಣಗಳನ್ನು ತನ್ನ ಮುಖದ ಮೇಲೆ ಗಡ್ಡದಂತೆ ಕೂರಿಸಿಕೊಂಡು ಅತ್ಯಂತ ಆರಾಮದಾಯಕವಾಗಿ ನಿಲ್ಲುವ ಮೂಲಕ ಇಡೀ ಕ್ಯಾಂಪಸ್ ಬೆರಗಾಗುವಂತೆ ಮಾಡಿದ್ದಾಳೆ.

ಪರಿಸರ ಸಮತೋಲನದಲ್ಲಿ ಜೇನುನೊಣಗಳ ಪಾತ್ರ ಎಷ್ಟು ಮುಖ್ಯ ಎಂಬುದನ್ನು ಜನರಿಗೆ ಮನವರಿಕೆ ಮಾಡಲು ಆಕೆ ಕೈಗೊಂಡ ಈ ಸಾಹಸದ ಅಪರೂಪದ ದೃಶ್ಯ ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ಎಲ್ಲರ ಗಮನ ಸೆಳೆಯುತ್ತಿದೆ.

ಇದೇ ಜೇನುನೊಣಗಳನ್ನು ಮೈಮೇಲೆ ಕೂರಿಸಿಕೊಳ್ಳುವ ಸಾಹಸವನ್ನು 'ಬೀ ಬೇರ್ಡಿಂಗ್' (Bee Bearding) ಎಂದು ಕರೆಯಲಾಗುತ್ತದೆಯಲ್ಲದೆ, ಇದನ್ನು ಸೂಕ್ತ ತರಬೇತಿ ಪಡೆದವರು ಮಾತ್ರ ಮಾಡಲು ಸಾಧ್ಯ. ಜೇನುನೊಣಗಳ ರಾಣಿಯನ್ನು (Queen Bee) ನಿಖರವಾಗಿ ಮುಖದ ಕೆಳಭಾಗದಲ್ಲಿ ಇರಿಸುವ ಮೂಲಕ ಇತರ ಸಾವಿರಾರು ಜೇನುನೊಣಗಳು ಅಲ್ಲಿಗೆ ಆಕರ್ಷಿತವಾಗುವಂತೆ ಮಾಡಲಾಗುತ್ತದೆ.

ಜೇನುನೊಣಗಳ ನಡುವೆಯೇ ಇದ್ದ ಭಾಗ್ಯಲಕ್ಷ್ಮಿ, ಒಂದು ಜೇನುನೊಣವೂ ತನಗೆ ಕಚ್ಚದಂತೆ ಹತ್ತಾರು ನಿಮಿಷಗಳ ಕಾಲ ಅತ್ಯಂತ ತಾಳ್ಮೆಯಿಂದ ನಿಂತು ಈ ಸಾಹಸ ಮೆರೆದಿದ್ದಾಳೆ. ಜೇನುನೊಣಗಳು ಮನುಷ್ಯರ ಶತ್ರುಗಳಲ್ಲ, ಅವುಗಳಿಗೆ ನಾವು ಹಾನಿ ಮಾಡದಿದ್ದರೆ ಅವು ಎಂದಿಗೂ ನಮ್ಮ ಮೇಲೆ ದಾಳಿ ಮಾಡುವುದಿಲ್ಲ ಎಂಬ ಉದಾತ್ತ ಸಂದೇಶವನ್ನು ಈಕೆ ಸಮಾಜಕ್ಕೆ ನೀಡಿದ್ದು, ವಿದ್ಯಾರ್ಥಿನಿಯ ಈ ಅಪರೂಪದ ಪ್ರದರ್ಶನವು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ರೈತರು ಹಾಗೂ ಮಕ್ಕಳಿಗೆ ಸಂಪೂರ್ಣ ಹೊಸ ಅನುಭವವನ್ನು ನೀಡಿತು.

ವಿಶ್ವವಿದ್ಯಾಲಯದ ಅಗ್ರಿಕಲ್ಚರಲ್ ಎಂಟಮಾಲಜಿ (ಕೀಟಶಾಸ್ತ್ರ) ವಿಭಾಗವು ಆಯೋಜಿಸಿದ್ದ ಈ ವಿಶೇಷ ಕಾರ್ಯಕ್ರಮವನ್ನು ವಿಶ್ವವಿದ್ಯಾಲಯದ ಪ್ರಭಾರ ಉಪಕುಲಪತಿ ಹಾಗೂ ಕುಲಸಚಿವ (ರಿಜಿಸ್ಟ್ರಾರ್) ಡಾ. ಕೆ. ಸುಬ್ರಮಣಿಯನ್ ಅವರು ಉದ್ಘಾಟಿಸಿದರು. ಜೇನುನೊಣಗಳ ಸಂರಕ್ಷಣೆ ಮತ್ತು ಜಾಗೃತಿಯ ಉದ್ದೇಶದಿಂದ ನಡೆದ ಈ ಕಾರ್ಯಕ್ರಮದಲ್ಲಿ ಜೇನು ಸಾಕಾಣಿಕೆದಾರರು, ರೈತರು, ವಿಜ್ಞಾನಿಗಳು ಹಾಗೂ ನೂರಾರು ವಿದ್ಯಾರ್ಥಿಗಳು ಸೇರಿದಂತೆ ಬೃಹತ್ ಸಂಖ್ಯೆಯಲ್ಲಿ ಸಾರ್ವಜನಿಕರು ಭಾಗವಹಿಸಿದ್ದರು.

ಒಂದು ವೇಳೆ ಜಗತ್ತಿನಲ್ಲಿ ಜೇನುನೊಣಗಳು ಸಂಪೂರ್ಣವಾಗಿ ಅಳಿದುಹೋದರೆ, ಇಡೀ ಭೂಮಿಯ ಪರಿಸರ ವ್ಯವಸ್ಥೆ ಮತ್ತು ಮಾನವನ ಆಹಾರ ಸರಪಳಿ ತೀವ್ರವಾಗಿ ಕುಸಿಯುತ್ತದೆ. ಏಕೆಂದರೆ ನಾವು ಸೇವಿಸುವ ಆಹಾರ ಧಾನ್ಯಗಳು, ತರಕಾರಿ ಹಾಗೂ ಹಣ್ಣು-ಹಂಪಲುಗಳು ಸೇರಿದಂತೆ ಶೇ. 70ಕ್ಕೂ ಹೆಚ್ಚು ಬೆಳೆಗಳ ಪರಾಗಸ್ಪರ್ಶಕ್ಕೆ ಜೇನುನೊಣಗಳೇ ಪ್ರಮುಖ ಕಾರಣವಾಗಿವೆ. ಇವುಗಳ ಅನುಪಸ್ಥಿತಿಯಲ್ಲಿ ಸಸ್ಯಗಳ ಸಂತಾನೋತ್ಪತ್ತಿ ನಿಂತುಹೋಗಿ ಕೃಷಿ ಉತ್ಪಾದನೆ ತಳಕಚ್ಚುತ್ತದೆ. ಇದು ಜಾಗತಿಕ ಮಟ್ಟದಲ್ಲಿ ಭೀಕರ ಆಹಾರದ ಅಭಾವ ಹಾಗೂ ಹಸಿವಿನ ಬಿಕ್ಕಟ್ಟನ್ನು ಸೃಷ್ಟಿಸುತ್ತದೆ. ಅಂತಿಮವಾಗಿ, ಸಸ್ಯಗಳನ್ನೇ ನಂಬಿರುವ ಜೀವಸಂಕುಲಗಳು ನಾಶವಾಗಿ, ಇಡೀ ಪ್ರಕೃತಿಯ ಸಮತೋಲನ ತಪ್ಪಿ ಮಾನವನ ಅಸ್ತಿತ್ವಕ್ಕೇ ದೊಡ್ಡ ಕುತ್ತು ಎದುರಾಗುತ್ತದೆ, (ಏಜೆನ್ಸೀಸ್​).