12 ವರ್ಷಗಳ ರಹಸ್ಯಕ್ಕೆ ಬಿತ್ತು ಅಧಿಕೃತ ಮುದ್ರೆ! ಮಹಾರಾಷ್ಟ್ರದಲ್ಲಿ ಮುಸ್ಲಿಂ ಮೀಸಲಾತಿ ಅಂತ್ಯದ ಹಿಂದಿರುವ 'ಆ' ಒಂದು ಕಾರಣವೇನು..? Muslim Reservation

ಸರ್ಕಾರದ ಪ್ರಕಾರ, ಇದು ಹೊಸ ನಿರ್ಧಾರವಲ್ಲ ಬದಲಾಗಿ ಹಳೆಯ ಕಾನೂನು ಸ್ಥಿತಿಯನ್ನು ಅಧಿಕೃತಗೊಳಿಸುವ ಕ್ರಮವಾಗಿದೆ. ಇದರ ಹಿಂದಿನ ಪ್ರಮುಖ ಕಾರಣಗಳು ಇಲ್ಲಿವೆ.

ಸುಗ್ರೀವಾಜ್ಞೆ ಅವಧಿ ಮುಕ್ತಾಯ: 2014ರಲ್ಲಿ ಕಾಂಗ್ರೆಸ್-ಎನ್‌ಸಿಪಿ ಸರ್ಕಾರವು ಚುನಾವಣೆಗೆ ಮುನ್ನ ಸುಗ್ರೀವಾಜ್ಞೆಯ ಮೂಲಕ ಈ ಮೀಸಲಾತಿಯನ್ನು ತಂದಿತ್ತು. ಆದರೆ 2014 ಡಿಸೆಂಬರ್ 23 ರೊಳಗೆ ಇದನ್ನು ಶಾಸನಸಭೆಯಲ್ಲಿ ಕಾನೂನಾಗಿ ಪರಿವರ್ತಿಸದ ಕಾರಣ ಅದು ತಾನಾಗಿಯೇ ರದ್ದಾಗಿತ್ತು.

ನ್ಯಾಯಾಲಯದ ತಡೆ: ಬಾಂಬೆ ಹೈಕೋರ್ಟ್ ಈ ಮೀಸಲಾತಿಯ ಅನುಷ್ಠಾನಕ್ಕೆ 2014ರ ನವೆಂಬರ್‌ನಲ್ಲೇ ತಡೆಯಾಜ್ಞೆ ನೀಡಿತ್ತು. ನಂತರ ಸುಪ್ರೀಂ ಕೋರ್ಟ್ ಕೂಡ ಈ ರದ್ದತಿಯನ್ನು ಎತ್ತಿ ಹಿಡಿದಿತ್ತು.

ದಾಖಲೆಗಳ ರದ್ದತಿ: ಈ ಮೀಸಲಾತಿ ಅಡಿಯಲ್ಲಿ ನೀಡಲಾಗಿದ್ದ ಜಾತಿ ಪ್ರಮಾಣಪತ್ರಗಳು ಮತ್ತು ಸಿಂಧುತ್ವ ಪ್ರಮಾಣಪತ್ರಗಳು ಇನ್ನು ಮುಂದೆ ಅಮಾನ್ಯವಾಗಲಿವೆ.

ಶಿಕ್ಷಣ ಮತ್ತು ಉದ್ಯೋಗ: ಸರ್ಕಾರಿ ಮತ್ತು ಅರೆ-ಸರ್ಕಾರಿ ಉದ್ಯೋಗಗಳಲ್ಲಿ ಹಾಗೂ ಶಿಕ್ಷಣ ಸಂಸ್ಥೆಗಳಲ್ಲಿ ಮುಸ್ಲಿಂ ಸಮುದಾಯಕ್ಕೆ ಸಿಗುತ್ತಿದ್ದ ಶೇ. 5ರಷ್ಟು ಪ್ರತ್ಯೇಕ ಕೋಟಾ ಇನ್ನು ಮುಂದೆ ಇರುವುದಿಲ್ಲ.

ಸೌಲಭ್ಯಗಳ ಸ್ಥಗಿತ: ವಿಶೇಷ ಹಿಂದುಳಿದ ವರ್ಗ-ಎ (SBC-A) ಅಡಿಯಲ್ಲಿ ಹೊಸದಾಗಿ ಜಾತಿ ಪ್ರಮಾಣಪತ್ರ ಅಥವಾ ನಾನ್-ಕ್ರೀಮಿ ಲೇಯರ್ ಪ್ರಮಾಣಪತ್ರಗಳನ್ನು ವಿತರಿಸುವುದನ್ನು ಸರ್ಕಾರ ನಿಲ್ಲಿಸಿದೆ.

ಹಳೆಯ ಸುತ್ತೋಲೆಗಳು ಅನೂರ್ಜಿತ: 2014 ಮತ್ತು 2015ರಲ್ಲಿ ಈ ಮೀಸಲಾತಿ ಸಂಬಂಧ ಹೊರಡಿಸಲಾಗಿದ್ದ ಎಲ್ಲಾ ಸರ್ಕಾರಿ ಆದೇಶಗಳನ್ನು ಈ ಹೊಸ ನಿರ್ಣಯವು ರದ್ದುಪಡಿಸಿದೆ.

ಸರ್ಕಾರದ ಈ ಕ್ರಮವನ್ನು ವಿರೋಧ ಪಕ್ಷಗಳು ತೀವ್ರವಾಗಿ ಖಂಡಿಸಿವೆ. ಸರ್ಕಾರವು ಅಲ್ಪಸಂಖ್ಯಾತರ ಹಕ್ಕುಗಳನ್ನು ಕಸಿಯುತ್ತಿದೆ ಎಂದು ಕಾಂಗ್ರೆಸ್ ನಾಯಕಿ ವರ್ಷಾ ಗಾಯಕ್ವಾಡ್ ಟೀಕಿಸಿದರೆ, ಇದು ಕೇವಲ ಆಡಳಿತಾತ್ಮಕ ತಿದ್ದುಪಡಿ, ಕಾನೂನುಬದ್ಧವಾಗಿ ಅಸ್ತಿತ್ವದಲ್ಲೇ ಇಲ್ಲದ ಮೀಸಲಾತಿಯನ್ನು ಅಧಿಕೃತವಾಗಿ ತೆಗೆದುಹಾಕಿದ್ದೇವೆ ಎಂದು ಆಡಳಿತ ಪಕ್ಷ ಸಮರ್ಥಿಸಿಕೊಂಡಿದೆ,(ಏಜೆನ್ಸೀಸ್).