ನನಗೆ ಜವಾಬ್ದಾರಿ ಹೆಚ್ಚಾದಷ್ಟೇ ಉತ್ತಮ ಪ್ರದರ್ಶನ ಹೊರಬರುತ್ತೆ! ಫಿಟ್‌ನೆಸ್ ಹಾಗೂ ನಾಯಕತ್ವದ ರಹಸ್ಯ ಬಿಚ್ಚಿಟ್ಟ ಕಿಂಗ್ ಕೊಹ್ಲಿ! Virat Kohli

ಈ ಬಗ್ಗೆ ಬೆಂಗಳೂರಿನಲ್ಲಿ ಮಂಗಳವಾರ (ಮೇ.19) ನಡೆದ ಪ್ರತಿಷ್ಠಿತ ಆರ್​ಸಿಬಿ ಇನ್ನೋವೇಶನ್ ಲ್ಯಾಬ್ ಇಂಡಿಯನ್ ಸ್ಪೋರ್ಟ್ಸ್ ಸಮಿಟ್' ಮೂರನೇ ಆವೃತ್ತಿಯ ಹೈ-ವೋಲ್ಟೇಜ್ ಸೆಷನ್‌ನಲ್ಲಿ ಕೊಹ್ಲಿ ಭಾಗವಹಿಸಿ ಮಾತನಾಡಿದ್ದಾರೆ.

ನನಗಾಗಿ ಆಡುವುದಕ್ಕಿಂತ ದೊಡ್ಡ ಉದ್ದೇಶಕ್ಕಾಗಿ ಆಡಿದಾಗ ಸಾಮರ್ಥ್ಯ ಮೀರಿ ರನ್ ಹರಿಯುತ್ತೆ

ವಿಶ್ವ ಕ್ರಿಕೆಟ್‌ನ ಶ್ರೇಷ್ಠ ಚೇಸ್ ಮಾಸ್ಟರ್ ಎನಿಸಿಕೊಂಡಿರುವ ವಿರಾಟ್ ಕೊಹ್ಲಿ, ಕ್ರೀಡಾಂಗಣದಲ್ಲಿ ತಮಗೆ ತಾವೇ ಹೇಗೆ ಪ್ರೇರೇಪಿಸಿಕೊಳ್ಳುತ್ತಾರೆ ಎಂಬುದನ್ನು ವಿವರಿಸಿದ್ದಾರೆ. ನಾಯಕತ್ವದಲ್ಲಿ ಅಥವಾ ಪಂದ್ಯದ ಕಠಿಣ ಪರಿಸ್ಥಿತಿಯಲ್ಲಿ ನಿಮಗಾಗಿ ಯೋಚಿಸಲು ನಿಮಗೆ ಸಮಯವೇ ಇರುವುದಿಲ್ಲ. ಅದು ಕ್ರೀಡಾಪಟುವಿಗೆ ಅತ್ಯಂತ ಸುಂದರವಾದ ಜಾಗವಾಗಿದೆ. ನನಗಾಗಿ ಆಡುವುದನ್ನು ಬಿಟ್ಟು, ಒಂದು ದೊಡ್ಡ ಉದ್ದೇಶಕ್ಕಾಗಿ ಅಥವಾ ದೇಶದ ಹೆಮ್ಮೆಗಾಗಿ ನಾನು ಕಣಕ್ಕಿಳಿದಾಗ, ನನ್ನ ನಿಜವಾದ ಸಾಮರ್ಥ್ಯವನ್ನೂ ಮೀರಿ ಅದ್ಭುತವಾಗಿ ಪ್ರದರ್ಶನ ನೀಡಲು ನನಗೆ ಸಾಧ್ಯವಾಗುತ್ತದೆ ಎಂದರು.

ಇದೇ ವೇಳೆ ಟೀಮ್ ಇಂಡಿಯಾದ ಮಾಜಿ ಕೋಚ್‌ಗಳಾದ ರಾಹುಲ್ ದ್ರಾವಿಡ್ ಮತ್ತು ವಿಕ್ರಮ್ ರಾಥೋಡ್ ಅವರೊಂದಿಗಿನ ತಮ್ಮ ಸುಂದರ ದಿನಗಳನ್ನು ನೆನಪಿಸಿಕೊಂಡ ಕಿಂಗ್ ಕೊಹ್ಲಿ ಭಾವುಕರಾದರು. ನನ್ನ ಕೆರಿಯರ್‌ನ ಅತ್ಯಂತ ಕಠಿಣ ಘಟ್ಟದಲ್ಲಿ ಅವರು ನನ್ನನ್ನು ನೋಡಿಕೊಂಡ ರೀತಿ ಅದ್ಭುತವಾಗಿತ್ತು. ಮಾನಸಿಕವಾಗಿ ನನ್ನ ಭಾವನೆಗಳನ್ನು ಅರ್ಥಮಾಡಿಕೊಂಡು ಅವರು ನನಗೆ ನೀಡಿದ ಬೆಂಬಲವೇ ನಾನು ಮತ್ತೆ ಕ್ರಿಕೆಟ್ ಅನ್ನು ಪ್ರೀತಿಸುವಂತೆ ಮತ್ತು ಎಂಜಾಯ್ ಮಾಡುವಂತೆ ಮಾಡಿತು. ಅದಕ್ಕಾಗಿ ನಾನು ಅವರಿಗೆ ಹೃದಯದಾಳದಿಂದ ಧನ್ಯವಾದ ಅರ್ಪಿಸುತ್ತೇನೆ ಎಂದು ಕೃತಜ್ಞತೆ ಸಲ್ಲಿಸಿದ್ದಾರೆ.

ಜಾಗತಿಕ ಕ್ರೀಡಾಲೋಕದಲ್ಲಿ ವಿರಾಟ್ ಕೊಹ್ಲಿ ಅವರ ಕಠಿಣ ಫಿಟ್‌ನೆಸ್ ದಿನಚರಿ ಎನ್ನುವುದು ದೊಡ್ಡ ಚರ್ಚೆಯ ವಿಷಯವಾಗಿದೆ. ಆದರೆ, ಕೊಹ್ಲಿ ಇದನ್ನು ನೋಡುವ ದೃಷ್ಟಿಕೋನವೇ ಭಿನ್ನವಾಗಿದೆ. ಜನರು ನಾನು ಇಷ್ಟಪಡುವುದನ್ನು ಬಿಟ್ಟಿರುವುದನ್ನು ತ್ಯಾಗ ಎಂದು ಕರೆಯುತ್ತಾರೆ. ಆದರೆ ನಾನು ಅದನ್ನು ಕೇವಲ ನನ್ನನ್ನು ನಾನು ಸುಧಾರಿಸಿಕೊಳ್ಳುವ ಪ್ರಕ್ರಿಯೆ ಅಥವಾ ಶುದ್ಧೀಕರಣ ಎಂದು ಕರೆಯುತ್ತೇನೆ. ದೇಶಕ್ಕಾಗಿ ಆಡುವ ಇಂತಹ ಸುವರ್ಣ ಅವಕಾಶಕ್ಕೆ ನಾವು ಪ್ರಾಮಾಣಿಕವಾಗಿರಬೇಕು ಅಷ್ಟೇ ಎಂದಿದ್ದಾರೆ.

ಭಾರತ ತಂಡವನ್ನು ಪ್ರತಿನಿಧಿಸಬೇಕು, ಈ ಅತ್ಯುನ್ನತ ಮಟ್ಟದಲ್ಲಿ ಕ್ರಿಕೆಟ್ ಆಡಬೇಕು ಎಂದು ದೇಶದ ಲಕ್ಷಾಂತರ ಯುವಕರು ಹಗಲಿರಳು ಕನಸು ಕಾಣುತ್ತಿದ್ದಾರೆ. ಹಾಗಿರುವಾಗ ನಮಗೆ ಸಿಕ್ಕ ಅವಕಾಶಕ್ಕಾಗಿ ನಾವು ಫಿಟ್ ಆಗಿರುವುದನ್ನು ಏನೋ ದೊಡ್ಡ ಅಸಾಮಾನ್ಯ ವಿಷಯ ಎಂಬಂತೆ ಸಂಭ್ರಮಿಸಬಾರದು. ಇದು ಪ್ರತಿಯೊಬ್ಬ ಆಟಗಾರನಿಗೂ ಕಡ್ಡಾಯವಾದ ಸಾಮಾನ್ಯ ನಿಯಮವಾಗಬೇಕು. ಆಗ ಮಾತ್ರ ಆ ಕ್ರೀಡೆಯ ಸಂಸ್ಕೃತಿ ಬೆಳೆಯಲು ಸಾಧ್ಯ ಎಂದು ಕೊಹ್ಲಿ ಖಡಕ್ ಆಗಿ ಹೇಳಿದ್ದಾರೆ.

ಕ್ರಿಕೆಟ್‌ನಲ್ಲಿ ಕೇವಲ ರನ್ ಮತ್ತು ಶತಕಗಳ ಅಂಕಿ-ಅಂಶಗಳಷ್ಟೇ ಮುಖ್ಯವಲ್ಲ ಎಂದು ಪ್ರತಿಪಾದಿಸಿದ ಕೊಹ್ಲಿ, ನನ್ನ ಪಾಲಿಗೆ ಇಂಪ್ಯಾಕ್ಟ್ ಎಂದರೆ ಜನರ ಮನಸ್ಸಿನಲ್ಲಿ ನಂಬಿಕೆ ಹುಟ್ಟಿಸುವುದು. ಕಠಿಣ ಪರಿಸ್ಥಿತಿ ಹಾಗೂ ಒತ್ತಡದ ಸಮಯದಲ್ಲಿ ನೀವು ಹೇಗೆ ಪ್ರತಿಕ್ರಿಯಿಸುತ್ತೀರಿ, ನಿಮ್ಮ ಶಿಸ್ತು ಎಂತಹುದ್ದು ಎಂಬುದನ್ನು ನೋಡಿ ಸಾಮಾನ್ಯ ಜನರು ತಮ್ಮ ವೈಯಕ್ತಿಕ ಬದುಕಿನಲ್ಲಿ ಸ್ಫೂರ್ತಿ ಪಡೆದುಕೊಂಡರೆ, ಒಬ್ಬ ಅಥ್ಲೀಟ್ ಆಗಿ ಅದೇ ನನಗೆ ಸಿಗುವ ಅತ್ಯಂತ ದೊಡ್ಡ ತೃಪ್ತಿ ಎಂದು ಹೆಮ್ಮೆಯಿಂದ ಹೇಳಿದ್ದಾರೆ.

ಈ ಕ್ರೀಡಾ ಶೃಂಗಸಭೆಯಲ್ಲಿ ಕೇವಲ ವಿರಾಟ್ ಕೊಹ್ಲಿ ಸಂವಾದ ಮಾತ್ರವಲ್ಲದೆ, ಐಪಿಎಲ್ ಮತ್ತು ಡಬ್ಲ್ಯುಪಿಎಲ್ ಟೂರ್ನಿಗಳ ಆರ್ಥಿಕ ಬೆಳವಣಿಗೆ, ಭಾರತದ ಒಲಿಂಪಿಕ್ಸ್ ಕನಸುಗಳು ಹಾಗೂ ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಅಭಿಮಾನಿಗಳ ಅನುಭವವನ್ನು ಮತ್ತಷ್ಟು ವಿಶ್ವದರ್ಜೆಗೆ ಕೊಂಡೊಯ್ಯುವ ಕುರಿತು ಗಂಭೀರ ಚರ್ಚೆಗಳು ನಡೆದವು. ಭಾರತ ಸರ್ಕಾರದ ಕ್ರೀಡಾ ಇಲಾಖೆಯ ಕಾರ್ಯದರ್ಶಿ ಹರಿ ರಂಜನ್ ರಾವ್ (IAS), ಬೆಂಗಳೂರು ನಗರ ಪೊಲೀಸ್ ಕಮಿಷನರ್ ಸೀಮಂತ್ ಕುಮಾರ್ ಸಿಂಗ್ (IPS), ಜಂಟಿ ಪೊಲೀಸ್ ಕಮಿಷನರ್ ವಂಶಿ ಕೃಷ್ಣ (IPS), ಆದಿತ್ಯ ಬಿರ್ಲಾ ಗ್ರೂಪ್‌ನ ಸಂದೀಪ್ ಅಗರ್ವಾಲ್, ಆರ್‌ಸಿಬಿ ಸಿಇಒ ರಾಜೇಶ್ ಮೆನನ್ ಮತ್ತು ಆರ್‌ಸಿಬಿ ಕ್ರಿಕೆಟ್ ನಿರ್ದೇಶಕ ಮೊ ಬೊಬಾಟ್ ಸೇರಿದಂತೆ ಪ್ರಮುಖರು ಭಾಗವಹಿಸಿ ಕ್ರೀಡಾ ಮೂಲಸೌಕರ್ಯ ಹಾಗೂ ಕರಡು ನೀತಿಗಳ ಕುರಿತು ಮಹತ್ವದ ಒಳನೋಟಗಳನ್ನು ಹಂಚಿಕೊಂಡರು.