ಇಂಗ್ಲಿಸ್- ಮಾರ್ಷ್ ಬ್ಯಾಟಿಂಗ್ ವೈಭವ: ರಾಜಸ್ಥಾನ್​ಗೆ ೨೨1 ರನ್​ಗಳ ಬೃಹತ್ ಗುರಿ ನೀಡಿದ ಪಂತ್​ ಪಡೆ! RRvsLSG

ಜೈಪುರದ ಸವಾಯಿ ಮಾನ್‌ಸಿಂಗ್ ಕ್ರೀಡಾಂಗಣದಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ಹಂಗಾಮಿ ನಾಯಕ ಯಶಸ್ವಿ ಜೈಸ್ವಾಲ್ ಟಾಸ್ ಗೆದ್ದು ಮೊದಲು ಬೌಲಿಂಗ್ ಮಾಡುವ ನಿರ್ಧಾರ ಕೈಗೊಂಡರು. ಆದರೆ, ಅವರ ಈ ಪ್ಲಾನ್ ಅನ್ನು ಲಕ್ನೋ ಆರಂಭಿಕರಾದ ಮಿಚೆಲ್ ಮಾರ್ಷ್ ಮತ್ತು ಜೋಶ್ ಇಂಗ್ಲಿಸ್ ಮೊದಲ ಓವರ್‌ನಿಂದಲೇ ಧ್ವಂಸಗೊಳಿಸಿದರು. ಈ ಆಸೀಸ್ ಜೋಡಿ ರಾಜಸ್ಥಾನ್ ಬೌಲರ್‌ಗಳನ್ನು ಕ್ರೀಡಾಂಗಣದ ಮೂಲೆ ಮೂಲೆಗೂ ಅಟ್ಟಾಡಿಸಿ ಚಚ್ಚಿತು.

ಜೋಶ್ ಇಂಗ್ಲಿಸ್ ಕೇವಲ ೨೯ ಎಸೆತಗಳಲ್ಲಿ ಭೀಕರ ೬೦ ರನ್ ಸಿಡಿಸಿ ಔಟಾದರೆ, ಮತ್ತೊಂದೆಡೆ ಕ್ರೀಸ್ ಕಚ್ಚಿ ನಿಂತ ಮಿಚೆಲ್ ಮಾರ್ಷ್ ಸಿಡಿಲಮರಿ ಬ್ಯಾಟಿಂಗ್ ಪ್ರದರ್ಶಿಸಿದರು. ಕೇವಲ ೫೭ ಎಸೆತಗಳನ್ನು ಎದುರಿಸಿದ ಮಾರ್ಷ್ ೯೬ ರನ್ ಬಾರಿಸಿ ಶತಕದ ಸನಿಹದಲ್ಲಿ ಔಟಾದರು. ಇವರಿಬ್ಬರು ಮೊದಲ ವಿಕೆಟ್‌ಗೆ ಬರೋಬ್ಬರಿ ೧೦೯ ರನ್‌ಗಳ ಜತೆಯಾಟವು ಎಲ್‌ಎಸ್‌ಜಿ ಐಪಿಎಲ್ ಇತಿಹಾಸದಲ್ಲೇ ಮೊದಲ ಬಾರಿಗೆ ಸತತ ನಾಲ್ಕು ಪಂದ್ಯಗಳಲ್ಲಿ ೫೦ ಪ್ಲಸ್ ರನ್‌ಗಳ ಆರಂಭಿಕ ಜೊತೆಯಾಟದ ಮಹಾ ದಾಖಲೆಯನ್ನು ಬರೆಯಿತು.

ಲಕ್ನೋ ತಂಡ ೨೫೦ ರನ್ ದಾಟುವ ಮುನ್ಸೂಚನೆ ನೀಡಿದ್ದಾಗ ರಾಜಸ್ಥಾನ್ ಪರ ಯುವ ಬೌಲರ್ ಯಶ್ ರಾಜ್ ಪುಂಜಾ ಅತ್ಯಂತ ಅದ್ಭುತ ಬ್ರೇಕ್‌ಥ್ರೂಗಳನ್ನು ತಂದುಕೊಟ್ಟರು. ೯ನೇ ಓವರ್‌ನ ಎರಡನೇ ಎಸೆತದಲ್ಲಿ ಭೀಕರವಾಗಿ ಬ್ಯಾಟಿಂಗ್ ಮಾಡುತ್ತಿದ್ದ ಜೋಶ್ ಇಂಗ್ಲಿಸ್ ಅವರನ್ನು ಬೌಲ್ಡ್ ಮಾಡುವ ಮೂಲಕ ಪುಂಜಾ ಈ ಜೋಡಿಯನ್ನು ಮುರಿದರು. ಆ ಬಳಿಕ ೧೩ನೇ ಓವರ್‌ನಲ್ಲಿ ಮತ್ತೊಮ್ಮೆ ದಾಳಿಗಿಳಿದ ಯಶ್ ರಾಜ್ ಪುಂಜಾ, ಅಪಾಯಕಾರಿ ಬ್ಯಾಟರ್ ನಿಕೋಲಸ್ ಪೂರನ್ ಅವರನ್ನು ಔಟ್ ಮಾಡಿ ರಾಜಸ್ಥಾನ್ ಪಾಳಯದಲ್ಲಿ ಭರವಸೆ ಮೂಡಿಸಿದರು.

ಆದರೆ, ಎರಡು ವಿಕೆಟ್ ಬಿದ್ದರೂ ಲಕ್ನೋ ರನ್ ವೇಗಕ್ಕೆ ಬ್ರೇಕ್ ಬೀಳಲಿಲ್ಲ. ಮಧ್ಯಮ ಕ್ರಮಾಂಕದಲ್ಲಿ ಕಣಕ್ಕಿಳಿದ ರಿಷಭ್ ಪಂತ್, ಮಾರ್ಷ್ ಅವರಿಗೆ ಸೂಕ್ತ ಸಾಥ್ ನೀಡಿ ತಂಡದ ಮೊತ್ತ ೨೦೦ರ ಗಡಿ ದಾಟುವಂತೆ ನೋಡಿಕೊಂಡರು. ಅಂತಿಮ ಓವರ್‌ಗಳಲ್ಲಿ ಲಕ್ನೋ ಬ್ಯಾಟರ್‌ಗಳು ಅಬ್ಬರಿಸಿದ್ದರಿಂದ ಎಲ್‌ಎಸ್‌ಜಿ ೨೨೦ ರನ್‌ಗಳ ಬೃಹತ್ ಸ್ಕೋರ್ ತಲುಪಲು ಸಾಧ್ಯವಾಯಿತು,(ಏಜೆನ್ಸೀಸ್​).