8 ಅಡಿ 10 ಇಂಚಿನ ಕೂದಲಿನ ಮ್ಯಾಜಿಕ್​: ಕೇಶರಾಶಿ ಮೂಲಕ ಗಿನ್ನೆಸ್​ ದಾಖಲೆ ಬರೆದ ರೇಣು ಧರಿಯಾಲ್! Renu Dhariyal

ಹಲ್ದ್ವಾನಿ: ಉತ್ತರಾಖಂಡದ ರೇಣು ಧರಿಯಾಲ್ (Renu Dhariyal) ಎಂಬಾಕೆ ತನ್ನ ಅತಿ ಉದ್ದನೆಯ ಕೇಶರಾಶಿಯ ಮೂಲಕ ಜಾಗತಿಕ ಮಟ್ಟದಲ್ಲಿ ಭಾರತದ ಕೀರ್ತಿ ಪತಾಕೆ ಹಾರಿಸಿದ್ದಾರೆ.

ಅತಿ ಉದ್ದನೆಯ ಕೂದಲನ್ನು ಹೊಂದಿರುವ ಜೀವಂತ ಮಹಿಳೆ ಎಂಬ ಗಿನ್ನೆಸ್ ವಿಶ್ವ ದಾಖಲೆಯಲ್ಲಿ ತಮ್ಮ ಹೆಸರನ್ನು ಅಚ್ಚಳಿಯದೆ ದಾಖಲಿಸಿದ್ದಾರೆ. ರೇಣು ಅವರ ಈ ನೈಸರ್ಗಿಕ ಕೂದಲು ಬರೋಬ್ಬರಿ 271.50 ಸೆಂ.ಮೀ ಅಂದರೆ ಅಂದಾಜು 8 ಅಡಿ 10 ಇಂಚು ಉದ್ದವಿದೆ ಎಂದು ದಾಖಲೆಯಲ್ಲಿ ತಿಳಿಸಲಾಗಿದೆ.

ಕಳೆದ ಏಪ್ರಿಲ್‌ನಲ್ಲಿ ಹಲ್ದ್ವಾನಿಯಲ್ಲಿ ನಡೆದ ಪರಿಶೀಲನೆ ವೇಳೆ ಈ ಅಧಿಕೃತ ದಾಖಲೆ ದೃಢಪಟ್ಟಿದೆ. ಇದರೊಂದಿಗೆ ಈ ಹಿಂದೆ ಇದ್ದ 257.33 ಸೆಂ.ಮೀ ಉದ್ದದ ಹಿಂದಿನ ದಾಖಲೆಯನ್ನು ಇವರು ಮೀರಿಸಿ ಹೊಸ ಇತಿಹಾಸ ಸೃಷ್ಟಿಸಿದ್ದಾರೆ.

ಇದನ್ನೂ ಓದಿ: 14 ನೇ ದಿನಕ್ಕೆ ಕಾಲಿಟ್ಟ ಜಾರ್ಖಂಡ್​ ಪ್ರತಿಭಟನೆ: AISA ಅಧ್ಯಕ್ಷೆ ನೇಹಾ ಬೋರಾ ಮೇಲೆ 'ಇಂಕ್​ ​' ಅಟ್ಯಾಕ್; ನನ್ನ ಧ್ವನಿ ಹತ್ತಿಕ್ಕಲು ಸಾಧ್ಯವಿಲ್ಲ, ವಿಡಿಯೋ ವೈರಲ್​! Neha Bora Ink Attack

ಸುಮಾರು ಹತ್ತು ವರ್ಷಗಳ ಹಿಂದೆ ಅಂದರೆ 2015 ರಲ್ಲಿ ರೇಣು ತಮ್ಮ ಕೂದಲನ್ನು ಬೆಳೆಸುವ ಪಯಣವನ್ನು ಆರಂಭಿಸಿದ್ದರು. ಅಂದಿನಿಂದ ಇಂದಿನವರೆಗೆ ಅವರು ಒಮ್ಮೆಯೂ ತಮ್ಮ ಕೂದಲಿಗೆ ಕತ್ತರಿ ಹಾಕಿಲ್ಲ. ಭಾರತೀಯ ಸಂಸ್ಕೃತಿಯಲ್ಲಿ ಉದ್ದನೆಯ ಕೂದಲನ್ನು ಹೆಮ್ಮೆ, ಸೌಂದರ್ಯ ಹಾಗೂ ಸಾಂಸ್ಕೃತಿಕ ಪರಂಪರೆಯ ಪ್ರತೀಕವೆಂದು ಭಾವಿಸಲಾಗುತ್ತದೆ. ಇದೇ ವಿಚಾರವೇ ತನಗೆ ದೊಡ್ಡ ಪ್ರೇರಣೆಯಾಯಿತು ಎಂದು ರೇಣು ಗಿನ್ನೆಸ್ ಸಂಸ್ಥೆಗೆ ತಿಳಿಸಿದ್ದಾರೆ.

ಸುಮಾರು ಒಂಬತ್ತು ಅಡಿಯಷ್ಟು ಉದ್ದವಿರುವ ಕೂದಲನ್ನು ಆರೋಗ್ಯವಾಗಿಟ್ಟುಕೊಳ್ಳುವುದು ಸಾಮಾನ್ಯ ಮಾತಲ್ಲ. ಇದಕ್ಕೆ ಪ್ರತಿದಿನವೂ ಅಪಾರ ಕಾಳಜಿ ಹಾಗೂ ಸಮಯದ ಅವಶ್ಯಕತೆಯಿರುತ್ತದೆ. ರೇಣು ತಮ್ಮ ಕೂದಲನ್ನು ತೊಳೆಯಲು, ಒಣಗಿಸಲು ಮತ್ತು ಸಿಲುಕು ಬಿಡಿಸಲು ದಿನದಲ್ಲಿ ಗಂಟೆಗಟ್ಟಲೆ ಶ್ರಮಿಸಿದ್ದಾರೆಂದು ತಿಳಿಸಿದ್ದಾರೆ.

ವಿಶೇಷವೆಂದರೆ, ಮಾರುಕಟ್ಟೆಯಲ್ಲಿ ಸಿಗುವ ದುಬಾರಿ ಹಾಗೂ ರಾಸಾಯನಿಕಯುಕ್ತ ವಾಣಿಜ್ಯ ಉತ್ಪನ್ನಗಳ ಮೇಲೆ ಅವರು ಎಂದಿಗೂ ಅವಲಂಬಿತರಾಗಿರಲಿಲ್ಲ. ಬದಲಿಗೆ, ಮನೆಯಲ್ಲೇ ನೈಸರ್ಗಿಕ ಪದಾರ್ಥಗಳಿಂದ ತಯಾರಿಸಿದ ಎಣ್ಣೆ ಹಾಗೂ ಶಾಂಪೂಗಳನ್ನು ಬಳಸಿಕೊಂಡು ತಮ್ಮ ಕೂದಲನ್ನು ಜೋಪಾನ ಮಾಡುತ್ತಿದ್ದಾರಂತೆ.

ತಮ್ಮ ಈ ಸ್ವದೇಶಿ ಹಾಗೂ ಸಾಂಸ್ಕೃತಿಕ ಸೌಂದರ್ಯದ ಆರೈಕೆ ಪದ್ಧತಿಗಳನ್ನು ಅವರು ಸೋಷಿಯಲ್ ಮೀಡಿಯಾ ಮೂಲಕ ತಮ್ಮ ಫಾಲೋವರ್ಸ್‌ಗಳಿಗೂ ಹೇಳಿಕೊಡುತ್ತಿದ್ದು, ರಾಸಾಯನಿಕ ಮುಕ್ತ ಉತ್ಪನ್ನಗಳನ್ನು ಬಳಸುವಂತೆ ಎಲ್ಲರನ್ನೂ ಪ್ರೋತ್ಸಾಹಿಸುತ್ತಿದ್ದಾರೆ.

ಇಂದು ಸಾಮಾಜಿಕ ಜಾಲತಾಣಗಳಲ್ಲಿ ರೇಣು ಅವರ ಕೂದಲು ಭಾರೀ ವೈರಲ್ ಆಗಿದ್ದು, ಅವರನ್ನು ನೋಡಿದ ಪ್ರತಿಯೊಬ್ಬರೂ ಬೆರಗಾಗುತ್ತಿದ್ದಾರೆ. ಆದರೆ ಈ ಗಿನ್ನೆಸ್ ದಾಖಲೆಯು ಕೇವಲ ಒಂದು ಪ್ರಶಸ್ತಿಯಷ್ಟೇ ಅಲ್ಲ, ದೃಢಸಂಕಲ್ಪ ಮತ್ತು ತಮ್ಮ ಬೇರುಗಳಾದ ಸಂಸ್ಕೃತಿಯೊಂದಿಗೆ ಹೇಗೆ ಜೊತೆಯಾಗಿರಬಹುದು ಎಂಬುದಕ್ಕೆ ದೊಡ್ಡ ಉದಾಹರಣೆಯಾಗಿದೆ, (ಏಜನ್ಸೀಸ್​).