ಬುಧವಾರ ಚೆನ್ನೈನ ಪಲ್ಲಿಕರನೈ ಪ್ರದೇಶದಲ್ಲಿ 21 ವರ್ಷದ ಅಜಯ್ ಎಂಬಾತನ್ನು ದುಷ್ಕರ್ಮಿಗಳ ತಂಡವೊಂದು ಅಪಹರಿಸಿತು. ಬಲವಂತವಾಗಿ ಆಟೋರಿಕ್ಷಾದಲ್ಲಿ ಕೂರಿಸಿಕೊಂಡು ಆ ಗುಂಪು ಕರೆದೊಯ್ದಿದೆ. ಈ ವೇಳೆ ದರೋಡೆಕೋರರು ಯುವಕನ ಬಳಿ ಹಣವನ್ನು ಕೇಳಿದ್ದಾರೆ. ಆದರೆ ತನ್ನ ಬಳಿ ಒಂದು ನಯಾಪೈಸೆಯೂ ಇಲ್ಲ ಎಂದು ಅಜಯ್ ಹೇಳಿದ್ದಾನೆ. ಇದರಿಂದ ಆಕ್ರೋಶಗೊಂಡ ಅಪಹರಣಕಾರರು ಆತನ ಮೇಲೆ ಮನಸೋ ಇಚ್ಛೆ ಹಲ್ಲೆ ನಡೆಸಿದ್ದಾರೆ. ಹಣ ಪಡೆಯಲೇಬೇಕೆಂಬ ದುರುದ್ದೇಶದಿಂದ ದರೋಡೆಕೋರರು ಯುವಕನಿಗೆ ಬೆದರಿಕೆ ಹಾಕಿ, ಆತನ ಮೊಬೈಲ್ ಮೂಲಕವೇ ತಕ್ಷಣ ಸಾಲ ನೀಡುವ ಆ್ಯಪ್ ಒಂದಕ್ಕೆ ಅರ್ಜಿ ಹಾಕುವಂತೆ ಬಲವಂತಪಡಿಸಿದ್ದಾರೆ.
ಅಪಹರಣಕಾರರ ಬೆದರಿಕೆಗೆ ಮಣಿದು ಅಜಯ್ ಮೊಬೈಲ್ ಆ್ಯಪ್ನಲ್ಲಿ ಸಾಲಕ್ಕಾಗಿ ಅರ್ಜಿ ಸಲ್ಲಿಸಿದ್ದು, ಕೆಲವೇ ಕ್ಷಣಗಳಲ್ಲಿ ಆತನ ಬ್ಯಾಂಕ್ ಖಾತೆಗೆ ಸಾಲದ ಹಣ ಜಮೆಯಾಗಿದೆ. ಹಣ ಖಾತೆಗೆ ಬರುತ್ತಿದ್ದಂತೆ ಆ ದುಷ್ಟರು, ಯುವಕನನ್ನು ನೇರವಾಗಿ ಹತ್ತಿರದ ಎಟಿಎಂ ಕೇಂದ್ರಕ್ಕೆ ಕರೆದೊಯ್ದಿದ್ದಾರೆ. ಅಲ್ಲಿ ಆತನಿಂದ ಬಲವಂತವಾಗಿ 9,500 ರೂಪಾಯಿ ಹಣವನ್ನು ನಗದು ರೂಪದಲ್ಲಿ ಡ್ರಾ ಮಾಡಿಸಿಕೊಂಡು ಕಸಿದುಕೊಂಡಿದ್ದಾರೆ. ಅಷ್ಟೇ ಅಲ್ಲದೆ, ಅಜಯ್ ಬಳಿ ಇದ್ದ ಬೆಲೆಬಾಳುವ ಮೊಬೈಲ್ ಫೋನ್ ಅನ್ನು ಕೂಡ ಕಿತ್ತುಕೊಂಡು ಸ್ಥಳದಿಂದ ಕಾಲ್ಕಿತ್ತಿದ್ದಾರೆ.
ದರೋಡೆಕೋರರ ಅಮಾನವೀಯ ಕೃತ್ಯದಿಂದ ಮಾನಸಿಕವಾಗಿ ಮತ್ತು ದೈಹಿಕವಾಗಿ ನೊಂದಿದ್ದ ಯುವಕ ಅಜಯ್, ತಕ್ಷಣವೇ ಪಲ್ಲಿಕರನೈ ಪೊಲೀಸ್ ಠಾಣೆಗೆ ತೆರಳಿ ನಡೆದ ಘಟನೆಯ ಕುರಿತು ದೂರು ದಾಖಲಿಸಿದ್ದಾರೆ. ಪ್ರಕರಣದ ಗಂಭೀರತೆಯನ್ನು ಪರಿಗಣಿಸಿದ ಚೆನ್ನೈ ಪೊಲೀಸರು ಕೂಡಲೇ ವಿಶೇಷ ತಂಡವನ್ನು ರಚಿಸಿ ತನಿಖೆ ಕೈಗೊಂಡರು. ಕೇವಲ ಕೆಲವೇ ಗಂಟೆಗಳಲ್ಲಿ ತಾಂತ್ರಿಕ ಸಾಕ್ಷ್ಯಗಳು ಮತ್ತು ಸ್ಥಳೀಯ ಸುಳಿವಿನ ಆಧಾರದ ಮೇಲೆ ಪೊಲೀಸರು ನಾಲ್ವರು ಆರೋಪಿಗಳನ್ನು ಹೆಡೆಮುರಿ ಕಟ್ಟುವಲ್ಲಿ ಯಶಸ್ವಿಯಾಗಿದ್ದಾರೆ.
