ಆಂತರಿಕ ಚರ್ಚೆಗಳು ಅಂತಿಮ ತೀರ್ಮಾನಗಳಲ್ಲ!
ಆಯೋಗದೊಳಗೆ ನಡೆಯುವ ಚರ್ಚೆಗಳ ಬಗ್ಗೆ ವಿವರಣೆ ನೀಡಿರುವ ECI, ಕಡತಗಳನ್ನು ಪರಿಶೀಲಿಸುವಾಗ ಅಧಿಕಾರಿಗಳು ಅಥವಾ ಆಯುಕ್ತರು ತಮ್ಮ ವೈಯಕ್ತಿಕ ಸಲಹೆ, ಅಭಿಪ್ರಾಯ ಅಥವಾ ಪ್ರಶ್ನೆಗಳನ್ನು ವ್ಯಕ್ತಪಡಿಸುವುದು ಸಹಜ ಪ್ರಕ್ರಿಯೆ. ಆದರೆ ಅಂತಹ ಆಂತರಿಕ ಚರ್ಚೆಗಳನ್ನೇ 'ಆಯೋಗದ ಅಂತಿಮ ತೀರ್ಮಾನ' ಎಂದು ಬಿಂಬಿಸಲು ಸಾಧ್ಯವಿಲ್ಲ. 2023ರ ಮುಖ್ಯ ಚುನಾವಣಾ ಆಯುಕ್ತರ ಕಾಯಿದೆಯ ಸೆಕ್ಷನ್ 18ರ ಅಡಿಯಲ್ಲಿ ಇವು ಔಪಚಾರಿಕ ಆದೇಶಗಳಾಗುವುದಿಲ್ಲ ಎಂದು ಆಯೋಗ ಸ್ಪಷ್ಟವಾಗಿ ಹೇಳಿದೆ.
SIR ಗೆ ಮೂವರ ಒಪ್ಪಿಗೆಯಿದೆ!
ಜೂನ್ 2025, ಅಕ್ಟೋಬರ್ 2025 ಹಾಗೂ ಮೇ 2026 ರಲ್ಲಿ ಹೊರಡಿಸಲಾದ ಮೂರೂ ವಿಶೇಷ ತೀವ್ರ ಪರಿಷ್ಕರಣೆ (SIR) ಆದೇಶಗಳು ಆಯೋಗದ ಸರ್ವಾನುಮತದ ನಿರ್ಧಾರಗಳೇ ಆಗಿವೆ. ಮೊದಲು ಒಬ್ಬ ಆಯುಕ್ತರು ಕಡತ ಪರಿಶೀಲಿಸಿದರೆ, ಬಳಿಕ ಇನ್ನೊಬ್ಬರು ನೋಡುತ್ತಾರೆ. ಅಂತಿಮವಾಗಿ ಮುಖ್ಯ ಚುನಾವಣಾ ಆಯುಕ್ತರ ಮುಂದೆ ಕಡತ ಮಂಡನೆಯಾಗುತ್ತದೆ. ತುರ್ತು ಸಂದರ್ಭಗಳಲ್ಲಿ ಡಿಜಿಟಲ್ ರೂಪದಲ್ಲೇ ಒಪ್ಪಿಗೆ ಪಡೆದು ದಾಖಲಿಸಿಕೊಳ್ಳಲಾಗುತ್ತದೆ ಎಂದು ಚುನಾವಣಾ ಆಯೋಗ ವಿವರಿಸಿದೆ.
'ಫಾರ್ಮ್ 6' ಬದಲಾಗಿದೆಯಾ? ಆಯೋಗ ಹೇಳಿದ್ದೇನು?
ಮತದಾರರ ನೋಂದಣಿಗೆ ಬಳಸುವ 'ನಮೂನೆ 6' (Form 6)ರಲ್ಲಿ ಅನಧಿಕೃತ ಬದಲಾವಣೆ ಮಾಡಲಾಗಿದೆ ಎಂಬ ಆರೋಪಕ್ಕೂ ಆಯೋಗ ತೆರೆ ಎಳೆದಿದೆ. "ಫಾರ್ಮ್ 6 ಅನ್ನು ಬದಲಿಸುವ ಅಧಿಕಾರ ಇರುವುದು ಕೇಂದ್ರ ಸರ್ಕಾರಕ್ಕೆ ಮಾತ್ರವೇ ಹೊರತು ನಮಗಲ್ಲ. SIR ಪ್ರಕ್ರಿಯೆಗೆ ಬೇಕಾಗಿರುವ ಘೋಷಣಾ ಪತ್ರ ಕೇವಲ ಪ್ರತ್ಯೇಕ ದಾಖಲೆಯಷ್ಟೇ" ಎಂದು ಆಯೋಗ ತಿಳಿಸಿದೆ.
