ದ್ರಾವಿಡ ಪಕ್ಷಗಳ ರಾಜಕೀಯ ಭದ್ರಕೋಟೆಯನ್ನು ಭೇದಿಸಿದ ''ಜೋಸೆಫ್​ ವಿಜಯ್​ ಚಂದ್ರಶೇಖರ್''​ ಯಾರು?!

ವಿಜಯ್ ಅವರು 2026ರ ತಮಿಳುನಾಡು ಚುನಾವಣೆಯಲ್ಲಿ ಗೆದ್ದರೆ, ಕಳೆದ 49 ವರ್ಷಗಳಲ್ಲಿ ಯಾವುದೇ ಚಲನಚಿತ್ರ ನಟ ಸಾಧಿಸದ ದಾಖಲೆಯನ್ನು ಅವರು ಬರೆದಂತಾಗುತ್ತದೆ. 1977ರಲ್ಲಿ ಎಂ.ಜಿ. ರಾಮಚಂದ್ರನ್ ಅವರು ರಾಜಕೀಯವನ್ನು ಮರುರೂಪಿಸಿದ ನಂತರ, ಮತ್ತು ಜಯಲಲಿತಾ ಬಳಿಕ ತಮಿಳುನಾಡಿನ ಮುಖ್ಯಮಂತ್ರಿಯಾದ ಮೊದಲ ನಟ ಎಂಬ ಹೆಗ್ಗಳಿಕೆಗೆ ವಿಜಯ್​ ಪಾತ್ರರಾಗಿದ್ದಾರೆ. ಇದೇ ಮೊದಲ ಬಾರಿಗೆ ವಿಧಾನಸಭಾ ಚುನಾವಣೆಗೆ ಸ್ಪರ್ಧಿಸಿರುವ ನಟ ವಿಜಯ್ ಅವರ ಟಿವಿಕೆ ಪಕ್ಷ ತಮಿಳುನಾಡು ರಾಜಕೀಯದಲ್ಲಿ ಕ್ರಾಂತಿಯನ್ನು ಸೃಷ್ಟಿಸಿದೆ. ಆರಂಭಿಕ ಹಂತದ ಚುನಾವಣಾ ಫಲಿತಾಂಶದಲ್ಲಿ ಎರಡು ಪ್ರಬಲ ಮತ್ತು ಹಳೆಯ ಪಕ್ಷಗಳಾದ ಡಿಎಂಕೆ ಮತ್ತು ಎಐಎಡಿಎಂಕೆಯನ್ನು ಹಿಂದಿಕ್ಕಿ ಟಿವಿಕೆ ಭಾರೀ ಮುನ್ನಡೆಯಿಂಣದ ಗೆಲುವು ಸಾಧಿಸಿದೆ. 

ಹುಬ್ಬೇರಿಸುವ ವಿಚಾರ ಏನಪ್ಪಾ ಅಂದ್ರೆ ವಿಜಯ್​ಕಾಂತ್​​, ಕಮಲ ಹಾಸನ್​​ನಂತಹ, ಶರತ್​​ ಕುಮಾರ್​​ನಂತಹ ನಟರು ಪಕ್ಷವನ್ನ ಕಟ್ಟಿದರೂ ಸಹಿತ ಯಶಸ್ವಿಯಾಗಿರಲಿಲ್ಲ. ಆದರೆ ದಳಪತಿ ವಿಜಯ್​​ ಮೊಟ್ಟ ಮೊದಲ ಪ್ರಯತ್ನದಲ್ಲೇ ಈ ಮಟ್ಟಿನ ಯಶಸ್ಸು ಕಂಡಿರೋದು ತಮಿಳುನಾಡಿನ ಮತದಾರರು ಮತ್ತು ಅಭಿಮಾನಿಗಳಿಂದಲೇ ಆಗಿದೆ. 

ಕೇವಲ ಎರಡು ವರ್ಷ ಹಳೆಯದಾದ ವಿಜಯ್ ಅವರ ತಮಿಳಗ ವೆಟ್ರಿ ಕಳಗಂ ಅಧಿಕಾರದ ಚುಕ್ಕಾಣಿ ಹಿಡಿಯಲು 118 ಮ್ಯಾಜಿಕ್​ ನಂ ಆಗಿದೆ. ಟಿವಿಕೆ ಮುನ್ನಡೆಯಲ್ಲಿದ್ದು, ಸದನದಲ್ಲಿ ಬಹುಮತಕ್ಕೆ ಅಗತ್ಯವಿರುವ 118 ಸ್ಥಾನಕ್ಕೆ ಹತ್ತಿರವಾಗಿದೆ. ಬಹುತೇಕ ದಳಪತಿ ವಿಜಯ್​​​​ ಮುಖ್ಯಮಂತ್ರಿಯಾಗುವ ನಿರೀಕ್ಷೆಯಿದ್ದು, ಈಗಾಗಲೇ ಎಲ್ಲೆಡೆ ಟಿವಿಕೆ ಪಕ್ಷದ ಸದಸ್ಯರು ಗೆಲುವಿನ ಸಂಭ್ರಮಾಚರಣೆಗೆ ಸಿದ್ಧರಾಗಿದ್ದಾರೆ. 

ವಿಜಯ್ ಅವರು ತಮ್ಮ ಅಭಿಮಾನಿ ಬಳಗವನ್ನು ಮರುಸಂಘಟಿಸುವ ಕೆಲಸವನ್ನು 2009ರಲ್ಲೇ ಪ್ರಾರಂಭಿಸಿದ್ದರು. 'ವಿಜಯ್ ಮಕ್ಕಳ್ ಇಯಕ್ಕಂ' ಎಂಬ ಹೆಸರಿನಲ್ಲಿ ಔಪಚಾರಿಕವಾಗಿ ಅಭಿಮಾನಿ ಸಂಘಗಳನ್ನ ಸ್ಥಾಪಿಸಲಾಯ್ತು. ಆರಂಭದಲ್ಲಿ ಇದನ್ನು ಕೇವಲ ಜನಕಲ್ಯಾಣ ಮತ್ತು ಸೇವಾ ಜಾಲವೆಂದು ಗುರುತಿಸಲಾಗುತ್ತಿತ್ತು. ಆದರೆ, ಈ ಸಂಘಟನೆಯು ಕ್ರಮೇಣವಾಗಿ ಸಂಕಷ್ಟದ ಸಮಯದಲ್ಲಿನ ಪರಿಹಾರ ಕಾರ್ಯಗಳು, ಶೈಕ್ಷಣಿಕ ನೆರವು ಮತ್ತು ಸ್ಥಳೀಯ ಜನರ ಸಮಸ್ಯೆಗೆ ಬೆನ್ನೆಲುಬಾಗಿ ನಿಲ್ಲುವ ಮೂಲಕ ರಾಜ್ಯದ ಬೂತ್ ಮಟ್ಟದವರೆಗೂ ತನ್ನ ವ್ಯಾಪ್ತಿಯನ್ನ ವಿಸ್ತರಿಸಿ ಜನರ ವಿಶ್ವಾಸವನ್ನ ಗಳಿಸಿತು. 

2011ರಲ್ಲಿ, ಈ ಸಂಘಟನೆಯು ಎಐಎಡಿಎಂಕೆ (AIADMK) ನೇತೃತ್ವದ ಮೈತ್ರಿಗೆ ಬಹಿರಂಗ ಬೆಂಬಲ ನೀಡಿತು. ಇದು ವಿಜಯ್ ಅವರ ಮೊದಲ ನೇರ ಚುನಾವಣಾ ಮೈತ್ರಿಯಾಗಿದ್ದು, ಚಲನಚಿತ್ರ ನಟನೊಬ್ಬನ ವರ್ಚಸ್ಸು ಮತಗಳಾಗಿ ಪರಿವರ್ತನೆಯಾಗಬಲ್ಲದೇ ಎಂಬ ಪರೀಕ್ಷೆಯೂ ಆಗಿತ್ತು.

‘

2010 ಮತ್ತು 2020ರ ದಶಕದ ಆರಂಭದ ಅವಧಿಯಲ್ಲಿ, ವಿಜಯ್ ಅವರ ಸಿನಿಮಾ ಸಂಬಂಧಿತ ಸಾರ್ವಜನಿಕ ಕಾರ್ಯಕ್ರಮಗಳು ಹಲವು ಪ್ರಮುಖ ರಾಜಕೀಯ ನಿರ್ಧಾರಗಳ ಬದಲಾವಣೆಯನ್ನ ಪಡೆದುಕೊಳ್ಳಲು ಪ್ರಾರಂಭಿಸಿದವು. 2019 ರಲ್ಲಿ ಅವರು ಪೌರತ್ವ ತಿದ್ದುಪಡಿ ಕಾಯ್ದೆಯನ್ನು (CAA) ಟೀಕಿಸಿದ್ದು, ಅಭಿಮಾನಿಗಳಲ್ಲಿ ಮತ್ತು ತಮಿಳುನಾಡಿನ ಜನರಲ್ಲಿ ದಳಪತಿ ವಿಜಯ್​​ ಮೇಲಿನ ಗೌರವವನ್ನು ಹೆಚ್ಚಿಸಿತು. 

ಕೇವಲ ಸಿನಿಮಾಗೆ ಸೀಮಿತವಾಗದೆ ಅದರಾಚೆಗಿನ ವಿಷಯಗಳ ಬಗ್ಗೆ ನಿಲುವು ತೆಗೆದುಕೊಳ್ಳುವ ರೀತಿ ಜನರ ಓಲೈಕೆಗೆ ಇನ್ನಷ್ಟು ಸಹಾಯಕವಾಯ್ತು. 

2021ರ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ 'ವಿಜಯ್ ಮಕ್ಕಳ್ ಇಯಕ್ಕಂ' ಅಭ್ಯರ್ಥಿಗಳು ತಾವು ಸ್ಪರ್ಧಿಸಿದ್ದ ಬಹುಪಾಲು ಸ್ಥಾನಗಳನ್ನು ಗೆದ್ದುಕೊಂಡರು. ಈ ಜಾಲವು ಕೇವಲ ಜನಸಂದಣಿಯನ್ನು ಸೇರಿಸುವುದಲ್ಲದೆ, ಜನಪ್ರಿಯತೆಯನ್ನು ಮತಗಳನ್ನಾಗಿ ಪರಿವರ್ತಿಸಬಲ್ಲದು ಎಂಬುದನ್ನು ಈ ಗೆಲುವು ಸಾಬೀತುಪಡಿಸಿತು. ಅಲ್ಲದೇ ಪಕ್ಷದ ಅಧಿಕೃತ ಘೋಷಣೆಗೂ ಮುನ್ನವೇ ಸಂಘಟನಾ ಶಕ್ತಿಯ ಫಲ ವಿಜಯ್​​ಗೆ ಲಭಿಸಿತ್ತು. 

ಫೆಬ್ರವರಿ 2024ರಲ್ಲಿ ವಿಜಯ್ ಅವರು ಅಂತಿಮವಾಗಿ 'ತಮಿಳಗ ವೆಟ್ರಿ ಕಳಗಂ' (TVK) ಪಕ್ಷವನ್ನು ಸ್ಥಾಪಿಸುವ ಮೂಲಕ ರಾಜಕೀಯಕ್ಕೆ ಧುಮುಕಿದ್ರು. ಅಸಾಧಾರಣವಾದ ಸ್ಪಷ್ಟತೆಯೊಂದಿಗೆ ಈ ಹೆಜ್ಜೆ ಇರಿಸಿದ್ದ ವಿಜಯ್​​ (TVK) ಪಕ್ಷವು 2026ರ ವಿಧಾನಸಭಾ ಚುನಾವಣೆಯಲ್ಲಿ ಸ್ವತಂತ್ರವಾಗಿ ಸ್ಪರ್ಧಿಸಲಿದೆ, ಚುನಾವಣೆಗೂ ಮುನ್ನ ಯಾವುದೇ ಮೈತ್ರಿಗಳನ್ನು ಮಾಡಿಕೊಳ್ಳುವುದಿಲ್ಲ ಎಂದು ಅವರು ಘೋಷಿಸಿದರು.

ಆ ಘೋಷಣೆಯ ಬೆನ್ನಲ್ಲೇ ಅವರು ಚಿತ್ರರಂಗದಿಂದ ಹೊರಬರುವುದಾಗಿ ಪ್ರಕಟಿಸಿದರು, ಆ ಮೂಲಕ ಸುಮಾರು 70 ಸಿನಿಮಾಗಳನ್ನೊಳಗೊಂಡ ತಮ್ಮ ಮೂರು ದಶಕಗಳ ಸುದೀರ್ಘ ವೃತ್ತಿಜೀವನಕ್ಕೆ ತೆರೆ ಎಳೆದರು.

ಟಿವಿಕೆ (TVK) ಮುಂದಿನ ಎರಡು ವರ್ಷಗಳನ್ನು ತನ್ನ ಸಡಿಲವಾಗಿದ್ದ ಅಭಿಮಾನಿ-ಕಲ್ಯಾಣ ಸಂಘಟನೆಯನ್ನು ಜಿಲ್ಲಾ ಸಮಿತಿಗಳು, ವಿಧಾನಸಭಾ ಘಟಕಗಳು ಮತ್ತು ಬೂತ್ ಮಟ್ಟದ ತಂಡಗಳನ್ನೊಳಗೊಂಡ ಒಂದು ಔಪಚಾರಿಕ ಪಕ್ಷವನ್ನಾಗಿ ಪರಿವರ್ತಿಸಲು ಶ್ರಮಿಸಿತು. ಇದೇ ಸಮಯದಲ್ಲಿ ಶಿಕ್ಷಣ, ಉದ್ಯೋಗ, ಭ್ರಷ್ಟಾಚಾರ ವಿರೋಧಿ ಹೋರಾಟ ಮತ್ತು ಸಾಂಸ್ಥಿಕ ಹೊಣೆಗಾರಿಕೆಯ ಮೇಲೆ ಕೇಂದ್ರೀಕೃತವಾದ ತನ್ನ ಉದ್ದೇಶಗಳನ್ನು ಮತ್ತಷ್ಟು ಹರಿತಗೊಳಿಸಿತು. ವಿಜಯ್ ಅವರನ್ನು ಕೇವಲ ಆವೇಶದ ಭಾಷಣ ಮಾಡುವ ಸಾಂಪ್ರದಾಯಿಕ ನಾಯಕನಂತೆ ಬಿಂಬಿಸದೆ, ಜನರ ಮಾತುಗಳನ್ನು ಕೇಳುವ ಒಬ್ಬ ನಾಯಕನಂತೆ ಬಿಂಬಿಸಲಾಯಿತು. ಇದನ್ನು ಸಾಮಾಜಿಕ ಜಾಲತಾಣಗಳ 'ಟೌನ್ ಹಾಲ್' ಸಂವಾದಗಳು ಮತ್ತು ಅಚ್ಚುಕಟ್ಟಾಗಿ ನಿರ್ವಹಿಸಲಾದ ಸಾರ್ವಜನಿಕ ಸಭೆಗಳ ಮೂಲಕ ಇನ್ನಷ್ಟು ಜನಪ್ರಿಯಗೊಳಿಸಲಾಯಿತು.

2025ರಲ್ಲಿ ಕರೂರಿನಲ್ಲಿ ಟಿವಿಕೆ (TVK) ಸಂಬಂಧಿತ ಕಾರ್ಯಕ್ರಮವೊಂದರಲ್ಲಿ ಸಂಭವಿಸಿದ ಭೀಕರ ಕಾಲ್ತುಳಿತವು, ಒಬ್ಬ ರಾಜಕೀಯ ನಾಯಕನಾಗಿ ವಿಜಯ್ ಅವರು ಎದುರಿಸಿದ ದೊಡ್ಡ ಸವಾಲಾಗಿತ್ತು. ಆದರೆ ಈ ಘಟನೆಯ ನಂತರ ವಿಜಯ್​ ನೀಡಿದ ಪ್ರತಿಕ್ರಿಯೆ, ಅಳೆದು ತೂಗಿದಂತಿದ್ದ ಸಾರ್ವಜನಿಕ ವಿವರಣೆ ಮತ್ತು ಸರಿಪಡಿಸುವ ಕ್ರಮಗಳು—ಆಡಳಿತ ಮಟ್ಟದ ಕಠಿಣ ವಿಮರ್ಶೆಗಳನ್ನು ಅವರು ಹೇಗೆ ನಿಭಾಯಿಸಬಹುದು ಎಂಬುದಕ್ಕೆ ಆರಂಭಿಕ ಸೂಚನೆಯಂತಿದ್ದವು.

ಸ್ಪಷ್ಟ ಬಹುಮತ ಸಿಗದಿದ್ದರೂ ಸಹ, ಸುಮಾರು 110 ಸ್ಥಾನಗಳನ್ನು ಗೆದ್ದುಕೊಂಡರೆ ವಿಜಯ್ ಅವರು ಸರ್ಕಾರ ರಚನೆ ಮಾಡುತ್ತಾರೆ. ಅಂದರೆ ಮುಖ್ಯಮಂತ್ರಿಯಾಗಿ ಹೊರ ಹೊಮ್ಮಲಿದ್ದಾರೆ. ಚುನಾವಣೆಗೂ ಮುನ್ನ ಯಾವುದೇ ಮೈತ್ರಿ ಮಾಡಿಕೊಳ್ಳಲು ನಿರಾಕರಿಸಿರುವುದರಿಂದ, ಚುನಾವಣೆ ನಂತರದ ಯಾವುದೇ ಮೈತ್ರಿ ಮಾಡಿಕೊಂಡರೆ ಅದು ತೀವ್ರ ಚರ್ಚೆಗೆ ಕಾರಣವಾಗುತ್ತದೆ. 

ಅಸ್ತಿತ್ವದಲ್ಲಿರುವ ಎಐಎಡಿಎಂಕೆ ಪಕ್ಷಗಳ ಜೊತೆಗೆ ಟಿವಿಕೆ (TVK) ಒಂದು ಪ್ರಬಲ ಶಕ್ತಿಯಾಗಿ ಉದಯಿಸುತ್ತಿರುವುದರಿಂದ, ಎಂಜಿಆರ್ ಅವರ ಕಾಲದ ನಂತರ ತಮಿಳುನಾಡು ಈಗ ಅತ್ಯಂತ ವಿಶ್ವಾಸಾರ್ಹವಾದ 'ತ್ರಿಕೋನ ಸ್ಪರ್ಧೆ'ಗೆ ಸಾಕ್ಷಿಯಾಗುತ್ತಿದೆ. ಇಷ್ಟು ದಿನ ಇಬ್ಬರು ದ್ರಾವಿಡ ದೈತ್ಯರಲ್ಲೊಬ್ಬರನ್ನು ಅವಲಂಬಿಸಿದ್ದ ಸಣ್ಣ ಪಕ್ಷಗಳು ಈಗ ಇದ್ದಕ್ಕಿದ್ದಂತೆ ಮೂರನೇ ಆಯ್ಕೆಯನ್ನು ಕಾಣುತ್ತಿವೆ.

ಎಂಜಿಆರ್ ಅವರು ಪಕ್ಷದ ಸೀಳುವಿಕೆ ಮತ್ತು ಜನಕಲ್ಯಾಣ ಆಧಾರಿತ ಜನಪ್ರಿಯತೆಯ ಅಲೆಯ ಮೇಲೆ ಅಧಿಕಾರಕ್ಕೆ ಬಂದಿದ್ದರೆ, ವಿಜಯ್ ಅವರ ಆಕರ್ಷಣೆಯು ಇಂದಿನ ತಲೆಮಾರಿನವರನ್ನೂ ಮನ ಸೋಲುವಂತೆ ಮಾಡಿದೆ. 2026ರ ಬೆಳವಣಿಗೆಗಳು ಈಗಾಗಲೇ ತಮಿಳುನಾಡು ರಾಜಕೀಯದ ವ್ಯಾಕರಣವನ್ನಂತೂ ಬದಲಿಸಿವೆ. ಐದು ದಶಕಗಳ ನಂತರ 'ಸೇಂಟ್ ಜಾರ್ಜ್ ಕೋಟೆ'ಯೊಳಗೆ ಹೆಜ್ಜೆ ಇರಿಸಲು ಮುಂದಾದ ನಟ ವಿಜಯ್​​ ಎಂಬ ಹೆಗ್ಗಳಿಕೆಗೂ ವಿಜಯ್​ ಪಾತ್ರರಾಗಲಿದ್ದಾರೆ.