ಮದುವೆಯಾಗುವುದಾಗಿ 9.83 ಕೋಟಿ ರೂ. ಪಡೆದು ವಂಚನೆ ಆರೋಪ; ತೆಲುಗು ನಟಿ ಅಶು ರೆಡ್ಡಿ ವಿರುದ್ಧ ಕೇಸ್ ದಾಖಲು | Ashu Reddy

ಹೈದರಾಬಾದ್: ಮದುವೆಯಾಗುವುದಾಗಿ ನಂಬಿಸಿ ಸಾಫ್ಟ್‌ವೇರ್ ಎಂಜಿನಿಯರ್ ಒಬ್ಬರಿಗೆ ಸುಮಾರು 10 ಕೋಟಿ ರೂ. ವಂಚನೆ ಮಾಡಿದ ಆರೋಪದ ಮೇಲೆ ತೆಲುಗು ಬಿಗ್​ಬಾಸ್​ ಖ್ಯಾತಿಯ ನಟಿ ಅಶು ರೆಡ್ಡಿ ಮತ್ತು ಅವರ ಕುಟುಂಬ ಸದಸ್ಯರ ವಿರುದ್ಧ ಹೈದರಾಬಾದ್ ಸಿಸಿಎಸ್ ಪೊಲೀಸರು ಜಾಮೀನು ರಹಿತ ಪ್ರಕರಣ ದಾಖಲಿಸಿದ್ದಾರೆ.

ಲಂಡನ್‌ನಲ್ಲಿ ವಾಸಿಸುತ್ತಿರುವ ಹೈದರಾಬಾದ್​ ಮೂಲದ ಧರ್ಮೇಂದ್ರ ಎಂಬ ಸಾಫ್ಟ್​ವೇರ್ ಇಂಜಿನಿಯರ್ ಅವರ ತಂದೆ ಸತ್ಯನಾರಾಯಣ ಮೂರ್ತಿ ಅವರು ಹೈದರಾಬಾದ್‌ನ ಸಿಟಿ ಸೆಂಟ್ರಲ್ ಕ್ರೈಮ್ ಠಾಣೆಯಲ್ಲಿ ಭಾನುವಾರ(ಏ. 26) ದೂರು ನೀಡಿದ್ದು, ಪೊಲೀಸರು ನಟಿ ಆಶು ರೆಡ್ಡಿ, ಅವರ ಸಹೋದರಿ ದಿವ್ಯಾ ರೆಡ್ಡಿ ಹಾಗೂ ಕುಟುಂಬ ಸದಸ್ಯರ ವಿರುದ್ಧ ವಿವಿಧ ಸೆಕ್ಷನ್‌ಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಸತ್ಯನಾರಾಯಣ ಮೂರ್ತಿ ಅವರ ದೂರಿನ ಪ್ರಕಾರ, ಲಂಡನ್‌ನಲ್ಲಿ ವಾಸಿಸುತ್ತಿರುವ ತಮ್ಮ ಪುತ್ರನಿಗೆ ಮದುವೆಯಾಗುವುದಾಗಿ ನಂಬಿಸಿ ಆತನಿಂದ ಅಪಾರ ಪ್ರಮಾಣದ ಕೋಟ್ಯಂತರ ರೂ. ನಗದು ಮತ್ತು ಕಿಲೋ ಗಟ್ಟಲೆ ಚಿನ್ನವನ್ನು ಪಡೆದು ವಂಚನೆ ಮಾಡಿದ್ದಾರೆ ಎಂದು ಆರೋಪಿಸಿದ್ದಾರೆ.

2018ರಲ್ಲಿ ಲಂಡ್​ನಿಂದ ತಮ್ಮ ಪುತ್ರ ಹೈದರಾಬಾದ್​ಗೆ ಬಂದ ಬಳಿಕ ಆತನಿಗೆ ಪರಿಚಯವಾಗಿದ್ದ ಅಶುರೆಡ್ಡಿ, ರಿಲೇಷನ್​​ಶಿಪ್​ಗೆ ಒಪ್ಪಿಕೊಂಡು ಮದುವೆಯಾಗುವುದು 5 ಕೆಜಿ ಚಿನ್ನ ಸೇರಿ ಒಟ್ಟು 9.83 ಕೋಟಿ ರೂ. ಮೌಲ್ಯದ ಆಸ್ತಿಯನ್ನು ಪಡೆದುಕೊಂಡಿದ್ದಾಳೆ. ಈಗ ಮದುವೆಯಾಗದೇ ಮತ್ತು ನೀಡಿದ ಹಣವನ್ನು ವಾಪಸ್ ಮಾಡದೇ ವಂಚನೆ ಮಾಡಿದ್ದಾಳೆ.

ಈ ವಂಚನೆಯಲ್ಲಿ ಅವರ ಕುಟುಂಬ ಸದಸ್ಯರು ಸಹ ಭಾಗಿಯಾಗಿದ್ದಾರೆ. ನೀಡಿದ ಹಣವನ್ನು ಹಿಂತಿರುಗಿಸುವಂತೆ ಕೇಳಿದ್ರೆ ಅಶುರೆಡ್ಡಿ, ತಮ್ಮ ವಿರುದ್ಧ ಪ್ರಕರಣ ದಾಖಲಿಸುವುದಾಗಿ ಬೆದರಿಕೆ ಹಾಕಿದ್ದಾರೆ ಎಂದು ತಂದೆ ಆರೋಪಿಸಿದ್ದಾರೆ (ಏಜೆನ್ಸೀಸ್).