ಅಮೆಜಾನ್​ ಲೇಆಫ್ ಬೆನ್ನಲ್ಲೇ ಟೆಕ್ಕಿಗಳ ಉದ್ಯೋಗಕ್ಕೆ ಕುತ್ತು! ಆರ್ಥಿಕ ಸಮೀಕ್ಷೆಯಲ್ಲಿ ಹೊರಬಿತ್ತು ಅಚ್ಚರಿ ಮಾಹಿತಿ | IT Jobs

ನವದೆಹಲಿ: 2025-26ರ ಆರ್ಥಿಕ ಸಮೀಕ್ಷೆಯು ಭಾರತದಲ್ಲಿ ಐಟಿ ವಲಯ ಮತ್ತು ವೈಟ್ ಕಾಲರ್ ಉದ್ಯೋಗಗಳಿಗೆ ದೊಡ್ಡ ಕಂಟಕ ಕಾದಿದೆ ಎಂಬುದನ್ನು ಎಚ್ಚರಿಸಿದೆ. ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಕೃತಕ ಬುದ್ಧಿಮತ್ತೆ (AI) ಪ್ರಭಾವದಿಂದಾಗಿ ಟೆಕ್​ ಉದ್ಯೋಗಿಗಳು ತೀರ ಸಂಕಷ್ಟಕ್ಕೆ ಸಿಲುಕಲಿದ್ದಾರೆ ಎಂದು ಭವಿಷ್ಯ ನುಡಿದಿದೆ. ಅಸಲಿಗೆ. ಈಗಾಗಲೇ ಟೆಕ್​ ದೈತ್ಯ ಕಂಪನಿಗಳಾದ ಅಮೇಜಾನ್​, ಟಿಸಿಎಸ್​, ಮೈಕ್ರೋಸಾಫ್ಟ್​ನಂತಹ ಸಂಸ್ಥೆಗಳು ತನ್ನ ಉದ್ಯೋಗಿಗಳಿಗೆ ಗೇಟ್​ಪಾಸ್​ ಕೊಡಲು ಆರಂಭಿಸಿರುವುದು ಸದ್ಯ ಅಚ್ಚರಿಯ ಬೆಳವಣಿಗೆ.

ಸಮೀಕ್ಷೆಯಲ್ಲಿ, ಈ ಬೆಳವಣಿಗೆಗಳನ್ನು ನಿರ್ಣಯಿಸಲು ಯುಎಸ್‌ನಲ್ಲಿ ವೃತ್ತಿಪರ, ವ್ಯವಹಾರ ಮತ್ತು ಮಾಹಿತಿ ಸೇವೆಗಳ (PBIS) ವಲಯವನ್ನು ಪ್ರಮುಖ ಸೂಚಕವಾಗಿ ಬಳಸಲಾಯಿತು. ಡಿಸೆಂಬರ್ 2022ರ ಬಳಿಕ ಉತ್ಪಾದಕ ಎಐ ಆವಿಷ್ಕಾರಗಳನ್ನು ಪರಿಚಯಿಸಿದಾಗಿನಿಂದ ಜಿಡಿಪಿ ಬೆಳವಣಿಗೆ ಹೆಚ್ಚಾಗಿದೆ ಎಂದು ತಿಳಿಸಲಾಗಿದೆ. ಆದರೆ, ಉದ್ಯೋಗ ಬೆಳವಣಿಗೆಯೊಂದಿಗೆ ಹೊಂದಿಕೆಯಾಗುವುದಿಲ್ಲ. ಉದ್ಯೋಗ ಸೃಷ್ಟಿ ಮತ್ತು ಬೆಳವಣಿಗೆಯ ನಡುವಿನ ಸಂಬಂಧ ಉತ್ತಮವಾಗಿಲ್ಲ ಎಂದು ಹೇಳಿದೆ.

ಇದು "ದುರ್ಬಲಗೊಂಡ ಕನಿಷ್ಠ ಪ್ರತಿಕ್ರಿಯೆ" ಎಂದು ಕರೆಯಲಾಗಿದ್ದು, ಇದರರ್ಥ "ಪ್ರತಿ ಬಾರಿ ಉತ್ಪಾದನೆ ಅಥವಾ ಆರ್ಥಿಕ ಬೆಳವಣಿಗೆ ಹೆಚ್ಚಾದಾಗ ಉದ್ಯೋಗಗಳು ಹೆಚ್ಚಾಗುತ್ತವೆ ಎಂಬ ಸಾಂಪ್ರದಾಯಿಕ ಸಂಬಂಧವು ದುರ್ಬಲಗೊಂಡಿದೆ" ಎಂದು ಸಮೀಕ್ಷೆ ಒತ್ತಿ ಹೇಳಿದೆ. ಇದು ದಿಢೀರ್​ ಕುಸಿತಕ್ಕಿಂತ ಸ್ಥಿರ ಕುಸಿತ ಎಂದು ವಿವರಿಸಿದೆ. ಇದರಲ್ಲಿ ಮಾಹಿತಿ ಮರುಪಡೆಯುವಿಕೆ, ಸಾರಾಂಶ ಮತ್ತು ಪುನರಾವರ್ತಿತ ವ್ಯವಹಾರ ಕಾರ್ಯಗಳಿಗೆ ಸಂಬಂಧಿಸಿದ ಉದ್ಯೋಗಗಳ ಮೇಲೆ ಪರಿಣಾಮ ಬೀರುತ್ತದೆ ಎನ್ನಲಾಗಿದೆ.

ಕಡಿಮೆ ಡಿಜಿಟಲೀಕರಣ ಹೊಂದಿರುವ ವಲಯಗಳಲ್ಲಿ ಇದೇ ರೀತಿಯ ಪ್ರವೃತ್ತಿಗಳು ಕಂಡುಬರುವುದಿಲ್ಲ. ಆದರೆ, ವೈಟ್-ಕಾಲರ್ ಮತ್ತು ಎಐ ಆಧರಿತ ವಲಯಗಳಲ್ಲಿನ ಉದ್ಯೋಗಗಳಿಗೆ ಸೀಮಿತವಾಗಿವೆ ಎಂದು ಸಮೀಕ್ಷೆ ಹೇಳಿದೆ. ಕೃತಕ ಬುದ್ಧಿಮತ್ತೆ ಕಾರಣದಿಂದಾಗಿ ವೆಚ್ಚಗಳು ಕಡಿಮೆಯಾಗುವುದರಿಂದ ಈ ವಲಯಗಳು ಆಧುನಿಕ ಟೆಕ್ನಾಲಜಿಗಳತ್ತ ಸಾಗುತ್ತಿವೆ ಎಂದು ತಿಳಿಸಿದೆ. ಇದರ ಪ್ರಕಾರ, ಉದ್ಯೋಗಿಗಳನ್ನು ನೇಮಕ ಮಾಡಿಕೊಳ್ಳುವುದಕ್ಕಿಂತ ಎಐನಂತಹ ಸೂಪರ್​ಫಾಸ್ಟ್​ ಟೆಕ್ನಾಲಜಿ ಮೊರೆ ಹೋದರೆ, ಹಣ ಉಳಿತಾಯ ಆಗಲಿದೆ ಜತೆಗೆ ಲಾಭವು ಹೆಚ್ಚುತ್ತದೆ ಎಂಬುದು ಕಂಪನಿಗಳ ದೂರದೃಷ್ಟಿ.

ಕಡಿಮೆ ವೆಚ್ಚದಲ್ಲಿ ಗುಣಮಟ್ಟದ ಐಟಿ ಸೇವೆಗಳನ್ನು ಒದಗಿಸುವ ರಾಷ್ಟ್ರಗಳ ಪೈಕಿ ಭಾರತವು ವಿಶ್ವದಲ್ಲಿ ಮುಂಚೂಣಿಯಲ್ಲಿದೆ ಎಂಬುದರಲ್ಲಿ ಎರಡನೇ ಮಾತಿಲ್ಲ. ಆದರೀಗ, ಡಿಜಿಟಲ್​ ಲೋಕ ವೇಗವಾಗಿ ಆವರಿಸಿಕೊಂಡಿರುವ ಹಿನ್ನೆಲೆ ಉದ್ಯೋಗಿಗಳ ಕೆಲಸವನ್ನು ಇನ್ನಷ್ಟು ಬೇಗ ಮತ್ತು ಕಡಿಮೆ ಸಮಯ ಹಾಗೂ ವೆಚ್ಚದಲ್ಲಿ ಎಐ ಮಾಡುತ್ತಿರುವ ಕಾರಣ ಭಾರತಕ್ಕೂ ಈ ಬಿಸಿ ತಟ್ಟಲಿದೆ ಎಂದು ಸಮೀಕ್ಷೆ ಸ್ಪಷ್ಟಪಡಿಸಿದೆ.

ಈ ಪರಿಸ್ಥಿತಿಯನ್ನು ಪರಿಹರಿಸಲು ಸರ್ಕಾರದ ಹಸ್ತಕ್ಷೇಪದ ಅಗತ್ಯವಿದೆ ಎಂದು ಆರ್ಥಿಕ ಸಮೀಕ್ಷೆ ಸೂಚಿಸಿದೆ. ಎಐ ಆರ್ಥಿಕ ಮಂಡಳಿಯನ್ನು ಸ್ಥಾಪಿಸಲು ಇದು ಪ್ರಸ್ತಾಪಿಸಿದೆ. ಉದ್ಯೋಗಗಳ ಮೇಲೆ ಕೃತಕ ಬುದ್ಧಿಮತ್ತೆಯ ಪರಿಣಾಮವನ್ನು ನಿರ್ಣಯಿಸುವ ಮತ್ತು ಉದ್ಯೋಗಗಳನ್ನು ಉಳಿಸಿಕೊಳ್ಳಲು ಎಐ ಬಳಕೆಗೆ ಮಾರ್ಗಸೂಚಿಗಳನ್ನು ರೂಪಿಸುವ ಅಗತ್ಯವನ್ನು ಸರ್ವೆ ಒತ್ತಿ ಹೇಳಿದೆ,(ಏಜೆನ್ಸೀಸ್).