ತಮಿಳುನಾಡು ಚುನಾವಣೆ: ಇದು ತಮಿಳು ಮತ್ತು ದೆಹಲಿಯ ಹಿಂದುತ್ವ ಶಕ್ತಿಗಳ ನಡುವಿನ ಸ್ಪರ್ಧೆ: ಸಂಸದೆ ಕನಿಮೊಳಿ | MP Kanimozhi

ಚೆನ್ನೈ: ತಮಿಳುನಾಡಿನ ಈ ಚುನಾವಣೆ ತಮಿಳು ಮತ್ತು ದೆಹಲಿಯ ಹಿಂದುತ್ವ ಶಕ್ತಿಗಳ ನಡುವಿನ ಸ್ಪರ್ಧೆಯಾಗಿದ್ದು, ಮತ್ತೊಂದೆಡೆ ಇದು ತಮಿಳುನಾಡಿನ ಸ್ವಾಭಿಮಾನ ಮತ್ತು ಹಕ್ಕುಗಳನ್ನು ರಕ್ಷಿಸುವ ಚುನಾವಣೆ ಎಂಬುದನ್ನು ಮರೆಯಬಾರದು ಎಂದು ಡಿಎಂಕೆ ಸಂಸದೆ ಕನಿಮೊಳಿ ಕರುಣಾನಿಧಿ(MP Kanimozhi) ಹೇಳಿದ್ದಾರೆ.

ತಿರುಪ್ಪೂರ್ ಜಿಲ್ಲೆಯಲ್ಲಿ ಚುನಾವಣಾ ಪ್ರಚಾರವನ್ನುದ್ದೇಶಿಸಿ ಮಾತನಾಡಿರುವ ಅವರು, ಎಐಎಡಿಎಂಕೆ ಈಗ ಅಮಿತ್ ಶಾ ಡಿಎಂಕೆ ಆಗಿ ಮಾರ್ಪಟ್ಟಿದೆ. ಎಐಎಡಿಎಂಕೆ ಪ್ರಧಾನ ಕಾರ್ಯದರ್ಶಿ ಮತ್ತು ವಿಪಕ್ಷ ನಾಯಕ ಎಡಪ್ಪಾಡಿ ಕೆ ಪಳನಿಸ್ವಾಮಿ ಅವರು ರಾಜ್ಯ ಮತ್ತು ತಮ್ಮದೇ ಪಕ್ಷಕ್ಕೆ ದ್ರೋಹ ಬಗೆದಿದ್ದಾರೆ ಎಂದು ಕಿಡಿಕಾರಿದ್ದಾರೆ.

ಪಳನಿಸ್ವಾಮಿ ತಮ್ಮನ್ನು ಮುಖ್ಯಮಂತ್ರಿಯನ್ನಾಗಿ ಮಾಡಿದ ವಿಕೆ ಶಶಿಕಲಾ ಮತ್ತು ಈಗ ನಮ್ಮೊಂದಿಗೆ ಸೇರಿಕೊಂಡಿರುವ ಓ ಪನ್ನೀರ್ ಸೆಲ್ವಂ ಅವರಿಗೂ ದ್ರೋಹ ಬಗೆದಿದ್ದಾರೆ. ತಮಿಳುನಾಡು ಮತ್ತು ರೈತರ ವಿರುದ್ಧ ಕೇಂದ್ರ ಸರ್ಕಾರ ಜಾರಿಗೆ ತಂದಿರುವ ಕ್ರಮಗಳನ್ನು ಅವರು ವಿರೋಧಿಸಲಿಲ್ಲ. ಗ್ರಾಮೀಣ ಜನರ ಜೀವನೋಪಾಯದ ಮೇಲೆ ತೀವ್ರ ಪರಿಣಾಮ ಬೀರಿರುವ ಅಲ್ಪಸಂಖ್ಯಾತರ ವಿರುದ್ಧದ ಕಾನೂನುಗಳನ್ನು ಸಹ ಅವರು ವಿರೋಧಿಸಲಿಲ್ಲ ಎಂದು ವಾಗ್ದಾಳಿ ನಡೆಸಿದ್ದಾರೆ.

ಮುಂದುವರೆದು ಕಳೆದ ಚುನಾವಣೆಯಲ್ಲಿ ಮಹಿಳೆಯರಿಗೆ 1,000 ರೂ. ಗಳನ್ನು ನೀಡುವ ಭರವಸೆ ನೀಡಲಾಗಿತ್ತು. ಅದನ್ನು ಜಾರಿಗೆ ತರಲಾಗಿದೆ. ಸಿಎಂ ಎಂ.ಕೆ. ಸ್ಟಾಲಿನ್ ಮಹಿಳೆಯರಿಗಾಗಿ ಪ್ರತಿಯೊಂದು ಯೋಜನೆಯನ್ನು ವ್ಯವಸ್ಥಿತವಾಗಿ ಅಭಿವೃದ್ಧಿಪಡಿಸುತ್ತಿರುವುದರಿಂದ ತಮಿಳುನಾಡಿನ ಎಲ್ಲಾ ಮಹಿಳೆಯರು ಡಿಎಂಕೆ ಪರವಾಗಿದ್ದಾರೆ ಎಂದು ಹೇಳಿದ್ದಾರೆ (ಏಜೆನ್ಸೀಸ್).