ತಲೆ ಬೋಳಿಸಿಕೊಂಡರೆ ಪ್ರೋತ್ಸಾಹ ಧನ ಕೊಡುವ ಆಮಿಷ; ಕೂದಲಿನಿಂದ ಹರಡುವ ಹೊಸ ರೋಗಕ್ಕೆ ಹೆದರಿ ಮೋಸ ಹೋದ ಮಹಿಳೆಯರು..Tamil Nadu

ಸಾಮಾನ್ಯವಾಗಿ ಸೈಬರ್ ಸೇರಿದಂತೆ ಹಲವು ವಂಚನಾ ಹಾದಿ ಮೂಲಕ ವಂಚಕರು ಹಣ ದೋಚುವ ಕೇಸ್ ನೋಡಿದ್ದೇವೆ.ಆದರೆ, ತಮಿಳುನಾಡಿನ ಸೇಲಂನಲ್ಲಿ ತಲೆ ಬುಡಕ್ಕೆ ಕೈ ಹಾಕಲಾಗಿದೆ. ಹೌದು ಸರ್ಕಾರಿ ಇಲಾಖೆಯ ಅಧಿಕಾರಿ ಎಂದು ನಂಬಿಸಿ, ಕೋವಿಡ್​ನಂತೆ ತಲೆ ಕೂದಲಿನಿಂದ ದೊಡ್ಡ ರೋಗ ಹರಡುತ್ತದೆ ಎಂದು ನಂಬಿಸಿ ಮಹಿಳೆಯರ ತಲೆ ಬೋಳಿಸಿದ ಘಟನೆ ವರದಿಯಾಗಿದೆ. ಇದೊಂದು ಕೂದಲು ಮಾರಾಟ ಮಾಡುವ ವಂಚನೆ ಜಾಲ ಎಂದು ಪೊಲೀಸರು ಶಂಕಿಸಿದ್ದಾರೆ.

ಸಂತ್ರಸ್ತ ಮಹಿಳೆಯರಲ್ಲಿ ಒಬ್ಬರಿಗೆ ಕರೆ ಮಾಡಿದ ವಂಚಕ ಆಕೆಯ ಹೆಸರು, ಕುಟುಂಬಸ್ಥರ ಬಗ್ಗೆ ಹೇಳುವ ಮೂಲಕ, ಅವರ ಭರವಸೆಯನ್ನು ಗಳಿಸಿದ. ಆನಂತರ ಹೇಳಿದ್ದು ಹೀಗೆ, "ಕೋವಿಡ್ ಹೋಲುವ ಹೊಸ ಸಾಂಕ್ರಾಮಿಕ ರೋಗ ಮಾನವನ ತಲೆ ಕೂದಲಿನಿಂದ ಹರಡುತ್ತದೆ. ತಲೆ ಬೋಳಿಸಿಕೊಳ್ಳುವ ಮೂಲ ಈ ರೋಗವನ್ನು ತಡೆಗಟ್ಟಬಹುದು. ಈ ಪ್ರಕ್ರಿಯೆ ಪ್ರೋತ್ಸಾಹಿಸಿದವರಿಗೆ ಸರ್ಕಾರ ಮಹಿಳೆಯರಿಗೆ 15,000 ರೂ. ಹಾಗೂ ಶಾಲಾ- ಕಾಲೇಜು ಮಕ್ಕಳಿಗೆ ಲ್ಯಾಪ್‌ಟಾಪ್ ಜೊತೆಗೆ 45,000 ರೂ. ನೀಡಲಾಗುತ್ತದೆ. ಪುರುಷರಿಗೆ 6,000 ರೂ. ಪ್ರೋತ್ಸಾಹ ಧನ ನೀಡಲಾಗುತ್ತದೆ" ಎಂದು ನಂಬಿಸಿದ್ದಾರೆ.

"ಈ ಪ್ರಕ್ರಿಯೆಗೆ ನಿಮ್ಮ ಗ್ರಾಮ ಮಾತ್ರ ಆಯ್ಕೆಯಾಗಿದೆ. ಅದರಲ್ಲೂ ಕೆಲವರನ್ನು ಆಯ್ಕೆ ಮಾಡಲಾಗಿದೆ ವಿದೇಶದಲ್ಲಿಯೂ ಹಲವರು ತಲೆ ಬೋಳಿಸಿಕೊಂಡು ತಮ್ಮ ಮನೆಯಲ್ಲಿ ಸುರಕ್ಷಿತವಾಗಿದ್ದಾರೆ. ನಾಳೆ ಗ್ರಾಮಕ್ಕೆ ಅಧಿಕಾರಿ ಬಂದು ಹಣ ನೀಡುವ ಮುನ್ನ ತಲೆ ಬೋಳಿಸಿಕೊಂಡಿರಿ" ಎಂದು ಪುಂಗಿ ಹೂದಿದ್ದ ಎನ್ನುವುದು ಮಹಿಳೆಯರು ಕೊಟ್ಟ ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ವ್ಯಕ್ತಿಯ ಮಾತು ನಂಬಿ ತಲೆ ಬೋಳಿಸಿಕೊಳ್ಳಲು 20 ಮಂದಿ ಮುಂದಾದರು. ಅದರಲ್ಲಿ ಮೂವರು ಅಂದೇ ತಲೆ ಬೋಳಿಸಿಕೊಂಡರು. ಸರ್ಕಾರ ಸಹಾಯ ಪಡೆದು ತಲೆ ಬೋಳಿಸಿಕೊಂಡು ನಮ್ಮನ್ನು ನಾವು ಸುರಕ್ಷಿತವಾಗಿಟ್ಟುಕೊಳ್ಳುತ್ತೇವೆ ಎಂದು ಮೂವರು ಹೇಳಿಕೊಂಡಿದ್ದರು.

ಸರ್ಕಾರಿ ಇಲಾಖೆಯ ಅಧಿಕಾರಿ ಎಂದು ಕರೆ ಮಾಡಿದ್ದ ವ್ಯಕ್ತಿಗೆ ಮಹಿಳೆಯರು ಕರೆ ಮಾಡಿದ್ದಾಗ ಆ ನಂಬರ್ ಸ್ವಿಚ್ ಆಫ್​ ಎಂದು ಬರುತ್ತತ್ತು. ಎಷ್ಟೇ ಬಾರಿ ಪ್ರಯತ್ನಿಸಿದರೂ ವಿಫಲವಾದಾಗ ತಾವು ಮೋಸ ಹೋಗಿದ್ದೇವೆ., ಇದೊಂದು ವಂಚನೆ ಜಾಲ ಎಂದು ಪೊಲೀಸರಿಗೆ ದೂರು ಕೊಟ್ಟಿದ್ದಾರೆ. ಆರೋಪಿಗಳಿಗಾಗಿ ಪತ್ತೆ ಕಾರ್ಯ ಮುಂದುವರೆದಿದೆ ಎನ್ನಲಾಗಿದೆ, (ಏಜೆನ್ಸೀಸ್).