ನಾಯಿಯನ್ನು ಕೊಂದ ಸೆಕ್ಯೂರಿಟಿ ಗಾರ್ಡ್​: ಪೊಲೀಸ್​ ಠಾಣೆ ಎದುರೇ ಮಹಿಳೆಯಿಂದ ಚಪ್ಪಲಿ ಏಟು; ವಿಡಿಯೋ ವೈರಲ್​! Viral Video

ನವದೆಹಲಿ: ದೇಶದ ರಾಜಧಾನಿ ದೆಹಲಿಯ ಕೀರ್ತಿ ನಗರ ಈಗ ಒಂದು ವೈರಲ್​ ವಿಡಿಯೋ (Viral Video) ದಿಂದ ಸೋಷಿಯಲ್ ಮೀಡಿಯಾದಲ್ಲಿ ಸದ್ದು ಮಾಡುತ್ತಿದೆ. ಕಾನೂನು ಪಾಲಿಸಬೇಕಾದ ಪೊಲೀಸರ ಮುಂದೆಯೇ ಮಹಿಳೆಯೊಬ್ಬರು ಸೆಕ್ಯೂರಿಟಿ ಗಾರ್ಡ್‌ಗೆ ಚಪ್ಪಲಿಯಿಂದ ಮನಬಂದಂತೆ ಹೊಡೆಯುತ್ತಿರುವ ದೃಶ್ಯ ಈಗ ಚರ್ಚೆಗೆ ವೇದಿಕೆ ಕಲ್ಪಿಸಿದೆ.

ಶನಿವಾರ (ಮೇ 9) ಬೆಳಿಗ್ಗೆ ಈ ಘಟನೆ ನಡೆದಿದ್ದು ಪ್ರಾಣಿ ಕಲ್ಯಾಣ ಕಾರ್ಯಕರ್ತೆ ಜಸ್ಮೀತ್ ಕೌರ್ ಅರೋರಾ, ಸಮವಸ್ತ್ರದಲ್ಲಿದ್ದ ಸೆಕ್ಯೂರಿಟಿ ಗಾರ್ಡ್ ಮೇಲೆ ಚಪ್ಪಲಿಯಿಂದ ಹೊಡೆದಿದ್ದಾರೆ. ಪ್ರತ್ಯಕ್ಷದರ್ಶಿಗಳ ಪ್ರಕಾರ, ಆ ಭದ್ರತಾ ಸಿಬ್ಬಂದಿ ಸ್ಥಳೀಯ ಬೀದಿ ನಾಯಿಯೊಂದನ್ನು ಕೋಲಿನಿಂದ ಹೊಡೆದು ಸಾಯಿಸಿದ್ದನಂತೆ, ಇದರಿಂದ ಕುಪಿತಳಾದ ಜಸ್ಮೀತ್ ಗಾರ್ಡ್ ಮೇಲೆ ದಾಳಿ ಮಾಡಿದ್ದಾರೆ.

ವಿಡಿಯೋದಲ್ಲಿ ಮಹಿಳೆ ಗಾರ್ಡ್‌ಗೆ ಚಪ್ಪಲಿಯಿಂದ ಹೊಡೆಯುತ್ತಿರುವಾಗ ಅಲ್ಲಿ ದೆಹಲಿ ಪೊಲೀಸರು ಮೌನ ಪ್ರೇಕ್ಷಕರಾಗಿ ನಿಂತಿರುವುದನ್ನು ನೋಡಬಹುದಾಗಿದೆ. ಗಾರ್ಡ್‌ನನ್ನು ರಕ್ಷಿಸುವ ಅಥವಾ ಮಹಿಳೆಯನ್ನು ತಡೆಯುವ ಯಾವುದೇ ಪ್ರಯತ್ನ ಅಲ್ಲಿ ಕಾಣಲಿಲ್ಲ. ಸ್ತಬ್ಧ ರಕ್ಷಕರಂತೆ ನಿಂತಿದ್ದ ಪೊಲೀಸರ ನಡೆ ಈಗ ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.

ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಸೋಷಿಯಲ್ ಮೀಡಿಯಾದಲ್ಲಿ ಕಮೆಂಟ್‌ಗಳ ಮಹಾಪೂರವೇ ಹರಿದುಬಂದಿದೆ. ಇಲ್ಲಿ ಯಾರು ಸರಿ? ಯಾರು ತಪ್ಪು? ಎಂಬ ಚರ್ಚೆ ಜೋರಾಗಿದೆ.

ತಪ್ಪೇನಿದೆ? ಬಾಯಿ ಇಲ್ಲದ ಪ್ರಾಣಿಯನ್ನು ಕ್ರೂರವಾಗಿ ಕೊಂದವನಿಗೆ ಇದು ಬೇಕಾಗಿತ್ತು. ಪೊಲೀಸರು ಕ್ರಮ ಕೈಗೊಳ್ಳದಿದ್ದಾಗ ಜನರೇ ನ್ಯಾಯ ಒದಗಿಸಬೇಕಾಗುತ್ತದೆ ಎಂದು ಕೆಲವರು ಜಸ್ಮೀತ್ ಪರ ಬ್ಯಾಟಿಂಗ್ ಮಾಡುತ್ತಿದ್ದಾರೆ.

ಗಾರ್ಡ್ ಕೂಡ ಮನುಷ್ಯನೇ. ಒಂದು ವೇಳೆ ನಾಯಿ ಕಡಿಯಲು ಬಂದಾಗ ಆತ ಸ್ವರಕ್ಷಣೆಗಾಗಿ ಹೊಡೆದಿದ್ದರೆ ಅದರಲ್ಲಿ ತಪ್ಪೇನು? ಆತನಿಗೂ ಸಂಸಾರವಿದೆ. ಮಹಿಳೆ ಕಾನೂನನ್ನು ಕೈಗೆತ್ತಿಕೊಂಡಿದ್ದು ತಪ್ಪು ಎಂದು ಗಾರ್ಡ್ ಬೆನ್ನಿಗೆ ನಿಂತಿದ್ದಾರೆ. ಅದೇ ಒಬ್ಬ ಹುಡುಗ ಮಹಿಳೆಗೆ ಈ ರೀತಿ ಹೊಡೆದಿದ್ದರೆ ಪೊಲೀಸರು ಸುಮ್ಮನೆ ಇರುತ್ತಿದ್ದರೇ? ಸ್ತ್ರೀ ಎಂಬ ಕಾರಣಕ್ಕೆ ಆಕೆಗೆ ಹೊಡೆಯುವ ಹಕ್ಕು ಸಿಗುತ್ತದೆಯೇ? ಎಂದು ನೆಟ್ಟಿಗರು ಕಿಡಿಕಾರುತ್ತಿದ್ದಾರೆ.

ಮಧ್ಯಮ ವರ್ಗದ ಜನರು ಮನುಷ್ಯರಿಗಿಂತ ಹೆಚ್ಚಾಗಿ ಸಾಕುಪ್ರಾಣಿಗಳ ಬಗ್ಗೆ ಕಾಳಜಿ ವಹಿಸುತ್ತಾರೆ ಎಂಬ ಟೀಕೆಗಳೂ ಕೇಳಿಬರುತ್ತಿವೆ. ಗಾರ್ಡ್ ಏನಾದರೂ ತಿರುಗಿ ಹೊಡೆದಿದ್ದರೆ ಪರಿಸ್ಥಿತಿ ಏನಾಗುತ್ತಿತ್ತು? ಕಾನೂನು ಇರುವುದು ಪೊಲೀಸ್ ಠಾಣೆಯಲ್ಲಿ ದೂರು ನೀಡಲು ಹೊರತು, ರಸ್ತೆಯಲ್ಲಿ ಚಪ್ಪಲಿ ಏಟು ನೀಡಲು ಅಲ್ಲ ಎಂಬುದು ವಿಮರ್ಶಕರ ವಾದವಾಗಿದೆ,(ಏಜನ್ಸೀಸ್​).