ಚೆಕ್​ ಡ್ಯಾಂನಲ್ಲಿ ಈಜು ಕಲಿಸುವ ನೆಪದಲ್ಲಿ ವಿದ್ಯಾರ್ಥಿನಿಯರ ಜತೆ ಅನುಚಿತ ವರ್ತನೆ: ಆಕ್ರೋಶದ ಬೆನ್ನಲ್ಲೇ ಪ್ರಾಂಶುಪಾಲ ಸಸ್ಪೆಂಡ್​! School Principal

ಜೈಪುರ: ಯಾವುದೇ ಸುರಕ್ಷತಾ ಮುನ್ನೆಚ್ಚರಿಕೆಗಳಿಲ್ಲದೆ ಅಪಾಯಕಾರಿ ಚೆಕ್ ಡ್ಯಾಮ್‌ಗೆ ವಿದ್ಯಾರ್ಥಿಗಳನ್ನು ಕರೆದೊಯ್ದು ಅವರೊಂದಿಗೆ ಸ್ನಾನ ಮಾಡಿದ ಶಾಲಾ ಪ್ರಾಂಶುಪಾಲರನ್ನು ( School Principal ) ಅಮಾನತು ಮಾಡಲಾಗಿದೆ. ಈ ಘಟನೆ ರಾಜಸ್ಥಾನದ ಅಲ್ವಾರ್​ನಲ್ಲಿ ನಡೆದಿದೆ.

ಅಲ್ವಾರ್​ನ ಸರ್ಕಾರಿ ಹಿರಿಯ ಮಾಧ್ಯಮಿಕ ಶಾಲೆಯ ಪ್ರಾಂಶುಪಾಲರಾದ ಲಾಲಚಂದ್ ಮೀನಾ ಅವರು ಸ್ವಾತಂತ್ರ್ಯ ದಿನಾಚರಣೆಯ ಸಂದರ್ಭದಲ್ಲಿ ಸುಮಾರು 200 ವಿದ್ಯಾರ್ಥಿಗಳನ್ನು ಯಾವುದೇ ಸುರಕ್ಷತಾ ಮುನ್ನೆಚ್ಚರಿಕೆಗಳಿಲ್ಲದೆ ಅಪಾಯಕಾರಿ ಚೆಕ್ ಡ್ಯಾಮ್‌ಗೆ ಕರೆದೊಯ್ದು ನಿಯಮಗಳನ್ನು ಉಲ್ಲಂಘಿಸಿರುವುದು ಬೆಳಕಿಗೆ ಬಂದಿದೆ. ಈ ಘಟನೆಗೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ತಕ್ಷಣವೇ ಎಚ್ಚೆತ್ತ ಶಿಕ್ಷಣ ಇಲಾಖೆಯು, ಕರ್ತವ್ಯ ಲೋಪ ಮತ್ತು ನೀತಿ ಸಂಹಿತೆ ಉಲ್ಲಂಘನೆಯ ಆರೋಪದ ಮೇರೆಗೆ ಪ್ರಾಂಶುಪಾಲರನ್ನು ತಕ್ಷಣವೇ ಅಮಾನತುಗೊಳಿಸಿ ಆದೇಶ ಹೊರಡಿಸಿದೆ. ಈ ಘಟನೆಯು ಶೈಕ್ಷಣಿಕ ವಲಯದಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.

ನಿಯಮಗಳ ಪ್ರಕಾರ ಯಾವುದೇ ಶೈಕ್ಷಣಿಕ ಪ್ರವಾಸ ಅಥವಾ ಹೊರಗಿನ ಚಟುವಟಿಕೆಗಳಿಗೆ ತೆರಳುವಾಗ ಕಟ್ಟುನಿಟ್ಟಾದ ಸುರಕ್ಷತಾ ಕ್ರಮಗಳನ್ನು ಅನುಸರಿಸಬೇಕಾಗುತ್ತದೆ. ಆದರೆ, ಈ ಪ್ರಕರಣದಲ್ಲಿ ಪ್ರಾಂಶುಪಾಲರು ಯಾವುದೇ ಮಹಿಳಾ ಶಿಕ್ಷಕಿಯರ ಉಪಸ್ಥಿತಿಯಿಲ್ಲದೆ, ಹೆಣ್ಣುಮಕ್ಕಳು ಸೇರಿದಂತೆ ಸುಮಾರು 200 ವಿದ್ಯಾರ್ಥಿಗಳ ದೊಡ್ಡ ಗುಂಪನ್ನು ದಟ್ಟ ಅರಣ್ಯದೊಳಗೆ ಸುಮಾರು ಎರಡು ಕಿಲೋಮೀಟರ್ ನಡೆದುಕೊಂಡು ಕರೆದೊಯ್ದಿದ್ದಾರೆ. ಯಾವುದೇ ಭದ್ರತಾ ವ್ಯವಸ್ಥೆ ಅಥವಾ ತುರ್ತು ಸುರಕ್ಷತಾ ಸಾಧನಗಳಿಲ್ಲದೆ ಅಪಾಯಕಾರಿ ಪ್ರದೇಶವನ್ನು ತಲುಪಿರುವುದು ಶಾಲಾ ಆಡಳಿತ ಮಂಡಳಿಯ ಸಂಪೂರ್ಣ ನಿರ್ಲಕ್ಷ್ಯವನ್ನು ತೋರಿಸುತ್ತದೆ.

ಸುಮಾರು 11 ಅಡಿಗಳಿಗೂ ಹೆಚ್ಚು ನೀರು ತುಂಬಿದ್ದ ಈ ಚೆಕ್ ಡ್ಯಾಮ್‌ನಲ್ಲಿ ಈಜುವುದನ್ನು ನಿಷೇಧಿಸಲಾಗಿದೆ. ಈ ಹಿಂದೆ ಹಲವು ಜನರು ಇಲ್ಲಿ ಮುಳುಗಿ ಸಾವಿಗೀಡಾಗಿರುವ ಹಿನ್ನೆಲೆಯಲ್ಲಿ ಕಳೆದ ನಾಲ್ಕು ವರ್ಷಗಳಿಂದ ಸಾರ್ವಜನಿಕರ ಪ್ರವೇಶವನ್ನು ಸಂಪೂರ್ಣವಾಗಿ ನಿರ್ಬಂಧಿಸಲಾಗಿದೆ. ಇಷ್ಟೆಲ್ಲಾ ಅಪಾಯಗಳಿದ್ದರೂ, ಪ್ರಾಂಶುಪಾಲರೇ ಖುದ್ದು ಮಕ್ಕಳಿಗೆ ಈಜು ಕಲಿಸುವ ನೆಪದಲ್ಲಿ ನೀರಿನೊಳಗೆ ಇಳಿದಿರುವುದು ಮತ್ತು ವಿದ್ಯಾರ್ಥಿಗಳನ್ನು ಅಪಾಯಕ್ಕೆ ನೂಕಿರುವುದು ಸ್ಥಳೀಯರಲ್ಲಿ ತೀವ್ರ ಆತಂಕ ಹಾಗೂ ಆಕ್ರೋಶವನ್ನು ಮೂಡಿಸಿದೆ.

ಸ್ಥಳೀಯ ನಿವಾಸಿಗಳ ಆರೋಪದ ಪ್ರಕಾರ, ಪ್ರಾಂಶುಪಾಲರು ಈಜು ಕಲಿಸುವ ಸಂದರ್ಭದಲ್ಲಿ ವಿದ್ಯಾರ್ಥಿನಿಯರೊಂದಿಗೆ ಅನುಚಿತವಾಗಿ ವರ್ತಿಸಿದ್ದಾರೆ ಮತ್ತು ಅವರನ್ನು ತಪ್ಪಾದ ರೀತಿಯಲ್ಲಿ ಸ್ಪರ್ಶಿಸಿದ್ದಾರೆ ಎಂಬ ಗಂಭೀರ ದೂರುಗಳು ಸಹ ಕೇಳಿಬಂದಿವೆ. ಅಧಿಕಾರಿಯೊಬ್ಬರು ಜವಾಬ್ದಾರಿಯುತ ಸ್ಥಾನದಲ್ಲಿದ್ದುಕೊಂಡು ವಿದ್ಯಾರ್ಥಿಗಳ ರಕ್ಷಣೆ ಮಾಡಬೇಕಾದವರೇ ಇಂತಹ ಅಸುರಕ್ಷಿತ ಮತ್ತು ಅನುಚಿತ ವರ್ತನೆಗೆ ಮುಂದಾಗಿರುವುದು ಪೋಷಕರ ಹಾಗೂ ಸಾರ್ವಜನಿಕರ ಕೆಂಗಣ್ಣಿಗೆ ಗುರಿಯಾಗಿದೆ.

ಶಿಕ್ಷಣ ಇಲಾಖೆಯ ಪ್ರಾಥಮಿಕ ತನಿಖೆಯಲ್ಲಿ ಇದು ಸರ್ಕಾರಿ ನೌಕರರ ನೀತಿ ಸಂಹಿತೆಯ ನೇರ ಉಲ್ಲಂಘನೆ ಎಂದು ದೃಢಪಟ್ಟಿದೆ. ಇದರ ಆಧಾರದ ಮೇಲೆ ರಾಜಸ್ಥಾನ ನಾಗರಿಕ ಸೇವೆಗಳ ನಿಯಮಗಳು, 1958ರ ಸೆಕ್ಷನ್ 13(1) ರಡಿಯಲ್ಲಿ ಪ್ರಾಂಶುಪಾಲ ಲಾಲಚಂದ್ ಮೀನಾ ಅವರ ವಿರುದ್ಧ ಅಧಿಕೃತ ವಿಭಾಗೀಯ ತನಿಖೆ ಆದೇಶಿಸಲಾಗಿದೆ. ಈ ತನಿಖೆಯ ವರದಿಯ ಬಳಿಕ ಅವರ ವಿರುದ್ಧ ಮತ್ತಷ್ಟು ಕಠಿಣ ಕಾನೂನು ಕ್ರಮ ಕೈಗೊಳ್ಳುವ ಸಾಧ್ಯತೆಯಿದೆ,(ಏಜೆನ್ಸೀಸ್​).